Янги ўқув йилига саноқли кунлар қолди: Амударё тумани ММТБга қарашли таълим муассасалари янги 2024-2025 ўқув йилига тайёрми?

Амударё туман ММТБ тасарруфида 86та умумий ўрта таълим мактаби, жами 134та, шу жумладан 52та давлат, 78та оилавий, 4та давлат-хусусий шерикчилик асосидаги мактабгача таълим ташкилотлари ҳамда ва “Баркамол авлод” болалар мактаби мавжуд.

Айни пайтда мактаблар қуввати 32 минг 635 ўринли бўлиб, ўқувчи сони эса 38 минг 813 нафарни ташкил этади.

3 ёшдан 7 ёшгача бўлган 12 минг 250 нафар болалар МТТларга қамраб олинган бўлиб, шундан давлат мактабгача таълим ташкилотларида 9615 нафар, давлат хусусий шериклик асосидаги МТТларда 300 нафар, оилавий МТТларда эса 2335 нафар кичкинтойлар тарбияланмоқда.

Таълим тизимига қаратилаётган эътибор, қолаверса, замон талабларидан келиб чиқиб, соҳада фаолият олиб бораётган 4061 нафар педагог ходимларнинг касбий малакасини оширишга, уларнинг ўз устларида ишлашларига алоҳида аҳамият берилмоқда.

Бугунги кунда туман ММТБ тасарруфидаги умумтаълим мактабларида фаолият олиб бораётган педагог ходимларнинг 293 нафари олий тоифали, 1937 нафари 1- ва 2-тоифали малакага эга билимдон ўқитувчилар ҳисобланади. Улардан 1720 нафари мутахассислик тоифасига эга бўлиб, 111нафар ўрта махсус маълумотли ўқитувчилар билан ўзаро тажриба алмашиш ва “ўрган-ўргат” тамойили асосида иш юритишлари учун зарур шароитлар яратилган.

Туман ММТБ тасарруфидаги “Баркамол авлод” болалар мактаби ва умумтаълим мактабларидаги ўқувчи-ёшларнинг истеъдод ва қобилиятларини ривожлантиришга қаратилган 67 та тўгаракларда уларнинг ўз иқтидорларини намоён этишлари учун барча имкониятлар мавжуд.

Бундан ташқари, 2024 йил давомида тумандаги 52та давлат мактабгача таълим ташкилотларига рақамлаштириш жараёнини амалга ошириш бўйича давлат бюджетидан жами 52 дона планшет ва 52 дона wi fi router, маҳаллий бюджет маблағлари ҳисобидан эса 42 дона принтер қурилмалари олиб берилди. Шунингдек, 28-сонли мактабга 1та компьютер, туман БАБМга 6та компьютер ва 1та электрон доска қурилмалари, давлатимиз раҳбарининг тегишли қарорига мувофиқ Республика бюджети маблағлари ҳисобидан 16та мактабга замонавий компьютер синф жамланмалари етказиб берилди.

Муҳтарам Президентимизнинг кўрсатмалари ва умумтаълим муассасаларини замон талаблари даражасида қуриш, таъмирлаш ва қайта реконструкция қилишга қаратилган 404-сонли Қарори асосида бир қатор мактабларда реконструкция ишларини амалга ошириш белгиланган. Хусусан, Беруний номли маҳалла ҳудудида жойлашган 31-сонли умумтаълим мактаби учун 330 ўринли қўшимча бино қуриш ишлари бошланиб, бугунги кунда мазкур бинонинг том қисмида бетон плиталарини ётқизиш ишлари ниҳоясига етказилмоқда.

Шунингдек, Хизр эли маҳалласи ҳудудида жойлашган 46-сонли умумтаълим мактабига 300 ўринга мўлжалланган қўшимча бино қурилиши, Жумур овул маҳалласи ҳудудида жойлашган 48-сонли умумтаълим мактабига 240 ўринга мўлжалланган қўшимча бино ва 12х24 ўлчамли спорт зали, Қангли овулида жойлашган 49-сонли мактабгача таълим ташкилоти учун янгидан 90 ўринга мўлжалланган бино ҳамда Қорамон маҳалласида давлат инвестиция дастури асосида 150 ўринга мўлжалланган давлат мактабгача таълим ташкилоти биноси қурилиши ишлари давом этмоқда.

“Ташаббусли бюджет” лойиҳасининг 2024 йил 1-мавсумида 3 та мактаб иштирок этиб, лойиҳа натижаларига кўра, 1- ва 41-сонли мактабларнинг ҳар бири 1 млрд 360 млн. сўмдан, 76-сонли мактаб жамоаси эса 860 млн. сўмлик маблағни ютиб олишга муваффақ бўлишди. 1-сонли ва 41-сонли мактаблар жамоаси томонидан ушбу маблағни жорий таъмирлаш ишларига, 76-сонли мактаб жамоаси томонидан эса дарс жараёни учун зарур замонавий ускуналар, жумладан, проектор, электрон доска, лаборатория жиҳозлари ва ҳоказоларга йўналтириш режалаштирилган.

Ўзбекистон Республикаси Мактабгача ва мактаб таълими вазирлиги томонидан янги ўқув йили олдидан жорий йил 5-10-август кунлари ҳудудий Педагогик марказида мастер-тренер ва тренер-координаторлар томонидан Амударё туманидан танлаб олинган 5 нафар директор, 3 нафар математика фани ўқитувчилари ва 6 нафар табиий фан ўқитувчиларига Сингапурнинг “Marshal Savendish Eduсation” ташкилоти билан ҳамкорликда ўқув жараёнига хорижий илғор тажрибаларни татбиқ этиш бўйича семинар ташкил этилди. Ушбу семинар каскад усулида жорий йил 19-24-август кунлари 31-, 40- ва 82-сонли мактабларда, ҳар бир мактабдан 1 нафар илғор ўқитувчилар учун, 26-31 август кунларида эса барча мактабларда ташкил этилиши режалаштирилган. Шунингдек, жорий йил 18-19 август кунлари Мўйноқ туманидаги “Оқ кема” ўқувчи-ёшлар лагерида анъанавий учинчи “Устозлар форуми” ўтказилиши белгиланган. Амударё туманидан 14 нафар илғор ўқитувчилар ушбу форумда иштирок этиши кутилмоқда.

Айни кунларда туман ММТБ тасарруфидаги барча ўқув муассасаларида “Билимлар куни” мактабларга илк қадам қўядиган болажонларга аталган 12 номдаги Президент совғалари тақдим этилмоқда. 2024-2025 ўқув йилида 3550 нафар болалар 1-синфга қабул қилиниши режалаштирилган. Янги ўқув йили бошланиши арафасида Президент совғаларини қувонч билан қабул қилаётган болажонларнинг қувончлари чексиз. Теварак-атрофлари ободонлаштирилган, дов-дарахтларига чиройли шакл берилиб, турфа гуллар ифор сочган таълим масканлари илмга чанқоқ, келажагимиз эгалари – Янги Ўзбекистон бунёдкорларини яна ўз бағрига олишга тайёр.

Робия Йўлдошева.