OBODLIK VA OZODALIK – SALOMATLIK GAROVI

2013-yil "Obod turmush yili” deb eʼlon qilinganligi munosabati bilan mamlakatimizda xalqning turmush darajasi va sifatini oshirish, farovonlik, tinchlik va totuvlikni taʼminlash vazifalarini amalga oshirishda oʻzini-oʻzi boshqarish organlari faollari, masʼul davlat organlari, jamoat tashkilotlari va deputatlar oldiga Davlat dasturida ustuvor vazifalar belgilab berildi.

Shular qatorida tumandagi ovul va mahallalar hududlarini obodonlashtirish, ijtimoiy soha obʼektlarining sanitariya holatini yaxshilash, fuqarolarning oʻzini-oʻzi boshqarish organlari faollari, hududiy profilaktika inspektorlari, xotin-qizlar qoʻmitasi hamda sanitariya holatiga masʼul davlat organi xodimlarining ijtimoiy faolligini oshirish, ular oʻrtasidagi ijtimoiy sheriklik munosabatlarini yanada kengaytirish, ushbu yoʻnalishdagi ishlarni tashkil etishga jamoatchilikni keng jalb etish, aholining bu boradagi huquqiy madaniyatini yanada oshirish maqsadida qabul qilingan tuman hokimining Farmoyishi ijrosini taʼminlash uchun tuman DSENM tomonidan qator ishlar amalga oshirilmoqda.

Jumladan, tuman xududidagi barcha ovul va mahallalar hududlarini obodonlashtirish, koʻkalamzorlashtirish, sanitariya holatini yaxshilash hamda aholi orasida keng turda sanitariya-targʻibot ishlarini tashkil qilish maqsadida tuman DSENM xodimlari barcha ovul va mahalla hududlariga bekitilgan boʻlib, aholining sanitariya madaniyatini oshirishda sezilarli darajada ishlar olib borishmoqda. Joriy yilning 3 oyi davomida DSENM mutaxassislari tomonidan mahalla hududlarida aholining ichimlik suvi, tuproq, atmosfera havosi, oziq-ovqat va nooziq ovqat mahsulotlaridan namunalar olinib, sanitariya-ximik laboratoriyasida 711 ta sinama va bakteriologik laboratoriyada 519 ta sinamalar olinib, tegishli xulosalar berildi.

Davlat dasturining ijrosini taʼminlash maqsadida tuman hokimligi tomonidan tasdiqlangan chora-tadbirlar rejasi asosida har bir okrug va mahalla kesimida tuzilgan ishchi guruh tomonidan hududlarda obodonlashtirish ishlarini tashkil etish, xonadonlarda ozodalikni saqlash, chiqindilarni oʻrada kompost qilish, koʻchalarni va hududlarni uy-roʻzgʻor chiqindilari va kir suvlari bilan ifloslamaslik, har bir xonadonlarda mevali va manzarali daraxt hamda uy oldida gul koʻchatlarini ekishni tashkil etish, aholi oʻrtasida har xil yuqumli kasalliklarning kelib chiqishining oldini olish uchun hududdagi xonadonlarda DSENM, tibbiyot xodimlari, mahalla ziyolilari va mahalla faollari, imom xatiblar ishtirokida aholi oʻrtasida sanitariya-targʻibot ishlari olib borilmoqda.

Nazorat davomida aniqlangan kamchiliklarni bartaraf qilish maqsadida har bir korxona, tashkilot va muassasa rahbarlariga, oʻzini-oʻzi boshqarish organlariga hamda mutasaddi tashkilotlarga DSENM ning chiqish xatlari bilan tegishli tavsiyalar, yuqumli kasalliklarning kelib chiqishining oldini olishga qaratilgan sanitariya talabnomalari tarqatildi. DSENM mutaxassislari tomonidan berilgan tavsiyalarning bajarilishi yuzasidan oʻrganishlar natijasida atrof muhitni va ochiq suv havzalarini maishiy chiqindilar bilan ifloslagan, shuningdek sanitariya qoida va meʼyorlari talablariga rioya qilmagan 87 nafar shaxslarga nisbatan Oʻzbekiston Respublikasi MJtK ning 53-moddasi asosida maʼmuriy javobgarlik ishi qoʻzgʻatilib, jarimaga tortildi.

Aholi oʻrtasida roʻyxatga olingan yuqumli kasalliklar boʻyicha joriy yilda 339 ta kasallik oʻchoqlari aniqlanib,  oʻchoqlarda oʻz vaqtida epidemiologik va sanitariya-gigiyenik tekshirishlar oʻtkazilib, kasallikni bartararaf qilish va aholi oʻrtasida tarqalishining oldini olish chora-tadbirlari oʻtkazildi, dezinfektsiya ishlari oʻz vaqtida olib borildi.

Joriy yilning 3 oyi davomida barcha ovul va mahallalar aholisi bilan deputat uchrashuvlari oʻtkazildi, aholi orasida kelib chiqayotgan muammolar birgalikda oʻrganib chiqilib, bartaraf qilish maqsadida tegishli korxona va tashkilotlarga "Deputat soʻrovnomasi” bilan murojaat qilinib, muammolar oʻz yechimini topmoqda.

 "Obod turmush yili”da har bir xonadonda obodonlashtirish, tozalikka rioya qilish, hududlarga mevali va manzarali daraxt hamda gul koʻchatlari ekib, koʻcha va mahallalarni obod qilish barchamizning burchimizdir. Chunki har bir xonadon ozodaligi va obodligi inson salomatligi garovidir.

T.BObOniyozov.

xalq deputatlari tuman Kengashi deputati, tuman Kengashining ijtimoiy-madaniy rivojlantirish hamda yoshlar siyosati va sogʻlom avlodni tarbiyalash masalalari boʻyicha doimiy komissiyasi raisi, tuman DSENM bosh shifokori.