Xalq deputatlari Amudaryo tuman Kengashining 81-sessiyasi toʻgʻrisida axborot

2024-yil 16-oktyabr kuni Amudaryo tumani hokimligining majlislar zalida Xalq deputatlari tuman Kengashining 81-sessiyasi boʻlib oʻtdi. Sessiyada deputatlar, tegishli tashkilotlar rahbarlari hamda ommaviy axborot vositalari vakillari ishtirok etdi.

Sessiyani Kengash raisining oʻrinbosari Gʻulomjon Eshniyozov ochdi va olib bordi. Sessiya kotibligiga 10-Tosh yop saylov okrugidan deputat Ilhom Polvonov saylandi.

Kun tartibidagi birinchi masala boʻyicha Oʻzbekiston Respublikasi Prezidentining Amudaryo tumanidagi Xalq qabulxonasi mudiri Anvar Orazbayev soʻzga chiqib, Xalq qabulxonasi, sektorlar va hududdagi tashkilotlar rahbarlarining aholi murojaatlari va muammolari bilan ishlashish holati hamda hududlardagi hokim yordamchilarining faoliyati yuzasidan axborotlar berdi.

Taʼkidlanganidek, Oʻzbekiston Respublikasi Prezidentining Virtual va Xalq qabulxonalari orqali 2024-yilning uchinchi choragi davomida tuman aholisi tomonidan jami 3 ming 627ta masalalar boʻyicha murojaatlar kelib tushgan. Shundan 3 ming 589ta murojaatlar koʻrib chiqilgan boʻlib, 2 ming 649tasi qanoatlantirilgan, 1 ming 403tasi murojaatchilar foydasiga ijobiy hal qilingan. Murojaatlarning 2 ming 626tasi tumandagi davlat organlari, idora va tashkilotlar tomonidan, qolganlari esa Qoraqalpogʻiston Respublikasi, viloyatlar va Toshkent shahri hamda Respublikaning boshqa tuman va shaharlaridagi davlat organlari, vazirlik va boshqarmalar tomonidan oʻrganib chiqilgan.

Oʻtgan 9 oy davomida hokim yordamchilari tomonidan oilaviy tadbirkorlikni rivojlantirish dasturlari doirasida 3 ming 672 nafar fuqaroga 52,8 mlrd. soʻm miqdorida imtiyozli kreditlar ajratilgan. Hisobot davrida 184 nafar fuqaroga jami 1,76 mlrd. soʻmlik subsidiya ajratilgan. 819 nafar shaxs kasb-hunar va tadbirkorlikka oʻqitilib, 3 ming 726 nafar shaxsning bandligi taʼminlangan. Jumladan, 2 ming 235 nafar fuqaro doimiy ish bilan taʼminlangan boʻlsa, 1 ming 495 nafari oʻzini-oʻzi band qilgan.

Sessiya kun tartibidagi navbatdagi masala yuzasidan Amudaryo tumani Ichki ishlar boʻlimi boshligʻi Muxammetali Xojamurotov hisobot berdi. Hisobotda qayd qilinganidek, tuman hududida jamoat xavfsizligini taʼminlash, huquqbuzarlik va jinoyatlarning barvaqt oldini olish maqsadida “Profilaktika kuni” tadbirlari davomida 146 ta jinoyatlar muxokama qilingan, 38 ming 76ta xonadon oʻrganilib, huquqbuzarlik sodir etish yoki undan jabrlanish ehtimoli yuqori boʻlgan 1 ming 572 nafar shaxslar bilan ijtimoiy profilaktik tadbirlarni amalga oshirish boʻyicha “Mahalla yettiliklari”ga xulosalar taqdim etilgan. Mahalla faollari tomonidan 1 ming 218 nafar ijtimoiy profilaktika obʼekti boʻlgan shaxslarning muammolarini ijobiy hal etish choralari koʻrilib, 1 ming 239 nafar shaxslar profilaktik hisobga olingan. 6 ming 679 nafar shaxslarga huquqbuzarlik sodir qilganligi uchun maʼmuriy choralar koʻrilgan. Hisobot davrida ichkilikga ruju qoʻygan 96 nafar shaxs va 1 ming 78 nafar ruhiy kasallar majburiy davolashga yotqizilgan hamda bosim va zoʻravonlikka uchragan 243 nafar xotin-qizlarga himoya orderlari berilgan.

Kun tartibidagi barcha masalalar boʻyicha faol muhokamalardan keyin Xalq deputatlari tuman Kengashining tegishli qarorlari qabul qilindi.

Sessiyadan keyin tuman hokimi Sobir Xoʻjametov masʼullar bilan birgalikda 5-yil davomida Amudaryo tamanining ijtimoiy-iqtisodiy rivojlanishiga qoʻshgan hissasi, tuman miqyosida oʻtkazilgan tadbirlarda faol ishtiroki, aholining ijtimoiy himoyaga muhtoj qatlamlarini  har tomonlama qoʻllab-quvvatlash, ularning muammolarini hal qilish borasidagi faolligi hamda homiylik ishlari bilan boshqalarga namuna boʻlgani uchun xalq deputatlari Amudaryo tuman Kengashining barcha deputatlariga tuman hokimligining tashakkurnomasi va esdalik sovgʻalarini topshirdi.