63-sonli umumtaʼlim maktabida savodxonlik bayrami boʻlib oʻtdi

Har yili Yangi yil bayrami yaqinlashgan pallalarda yurtimiz maktablaridagi 1-sinf oʻquvchilari “Alifbe” kitobi bilan xayrlashib, “Oʻqish” kitobi bilan tanishishni boshlaydilar. Barcha harflar bilan tanishib, yod olgan jajji oʻquvchilar asta-sekinlik bilan harflardan soʻzlar tuzishni, keyinchalik esa soʻzlardan gaplar tuzishni oʻrganishadi. Bunda ularga albatta ustozlari yaqindan yordam berishadi, bilmaganlarini oʻrgatib, ilm olishda yoʻl-yoʻriq koʻrsatadilar. Shuningdek, ustozlari jajji bolajonlarga “Vatan”, “ona”, “maktab” kabi tushunchalarning mazmuni uqtirishadi. Bir-biridan qiziqarli mavzularda darslar oʻtib, oʻquvchilarning shaxsiy fikri va dunyoqarashi bilan qiziqishadi. Savodxonlik bayrami esa, oʻquvchi hayotida yangi bir sahifa ochadigan va ilm-u, maʼrifat tantana qiladigan qadrdon bayramdir.

Amudaryo tumani maktabgacha va maktab taʼlimi boʻlimiga qarashli 63-sonli umumtaʼlim maktabida ham ana shunday bayram tadbiri boʻlib oʻtdi. Tadbirda maktabning 1-sinf oʻquvchilari va ularning ota-onalari, sinf rahbari Nilufar Iskandarova, maktab direktori Akbar Rajapov, maktab direktorining maʼnaviy-maʼrifiy ishlar boʻyicha oʻrinbosari Ravshanbek Shomurotov, xalq deputatlari tuman Kengashi deputati Bahrom Shermanov, Jumurtov shaharcha fuqarolar yigʻini raisi Damir Xoʻjamurodov hamda ustozlar, maktab oʻquvchilari ishtirok etdilar.

Tadbirni maktab direktori Akbar Rajapov kirish soʻzi bilan ochib berdi va 1-sinf oʻquvchilarini Alifbedagi harflarni aʼlo darajada oʻrganib chiqishgani bilan tabriklab, ilm dunyosi tomon qoʻyayotgan ilk qadamlari qutlugʻ boʻlishini tiladi.

Shundan keyin, 1-sinf sinf rahbari Nilufar Iskandarova boshchiligida tashkillashtirilgan bayram kechasining badiiy qismiga navbat berildi. Jajji oʻquvchilar Alifbedan oʻrin olgan harflarga atab sheʼrlar aytishdi. Turli xil mavzularda bir-biridan ajoyib qoʻshiqlar kuylashib, raqsga tushdilar.

Ha, savodxonlik bayrami har bir kichkintoyning hayotidagi eng hayajonli va unutilmas kun. Chunki ular ushbu kunda bogʻchada oʻtkazilgan tadbirlardagi ishtirokidan farqli oʻlaroq, ilk marotaba oʻz isteʼdodlarini, qobiliyatlarini sahnada namoyon qiladilar. Bogʻchada yodlashga topshiriq qilib berilgan sheʼrlarni ota-onalari va aka-opalari koʻmagida yodlashgan boʻlsa, endilikda maktabdagi topshiriqlarni oʻzlari erkin turda bajarishga harakat qiladilar. Demak, maktab bilim berishdan tashqari, insonni mustaqil boʻlishga va oʻz ustida oʻzi ishlashga ham oʻrgatadi.

Maʼlumot oʻrnida, “Alifbe” soʻzi arab alifbosining dastlabki ikki harfi – “alif” va “be”larning birikishidan hosil boʻlgan. Biror-bir tilning harflar sistemasi maʼlum bir tartibda joylashtirilgan yozuv belgilari yoki boʻgʻin belgilar majmui Alifbo deyiladi. Ilk alifbo miloddan avvalgi 2000-yil oxirlarida shakllangan degan taxminlar mavjud. Fanda bundan ilgari Misr iyerogliflari sanoq tizimi mavjud boʻlgan, degan faazlar ham bor.

Turkiy xalqlarning Oʻrxun-Enasoy va Uygʻur yozuvlari boʻlgan. Ularni aks ettirgan harflar jadvali tovush belgilari haqidagi boshqa manbalardagi maʼlumotlar hamda ana shu yozuv vositasida bitib qoldirilgan qadimiy yodgorliklar asosida tuzilgan.

Tadbir soʻngida bayram kechasiga Qorbobo va Qorqiz tashrif buyurishdi. Aziz bolajonlarni va ustozlarni Yangi yil bilan tabriklab, oʻquvchilarning bayramga tayyorlab kelgan sheʼrlarini tinglashdi. Shundan soʻng, Qorbobo bolajonlarni yana bir bora yangi yil va savodxonlik bayrami bilan tabriklab, oʻzi bilan birga olib kelgan sovgʻalarini ulashdi.

Ha, oramizda saxovatpesha va qoʻli ochiq insonlar koʻp. Ana shunday insonlardan biri, soʻzimiz avvalida tilga olganimiz – xalq deputatlari Amudaryo tuman Kengashi deputati Bahrom Shermanovdir. U bolajonlarni qoʻshaloq bayramlar bilan tabriklab, oʻquvchilarni xursand qilish maqsadida oʻz hisobidan tayyorlab kelgan sovgʻalarni ulashib, ularning kelgusidagi oʻqish va ishlariga zafarlar tiladi. Bayram bahona oʻquvchilarning koʻngillariga olam-olam quvonch ulashdi.

Aziza Madrahimova