Oʻzbekiston Ekologiya partiyasi tashkil topganiga 6-yil toʻldi

Bundan 6-yil muqaddam - 2019-yil 8-yanvar kuni mamlakatimiz siyosiy maydoniga Oʻzbekiston Ekologik partiyasi yangi siyosiy kuch sifatida kirib kelgan edi. 

Tashkil etilganiga endigina 6-yil boʻlgan partiyamiz ona tabiatni muhofaza qilish, aholining ekologik madaniyatini oshirish, kelajak avlodga yaxshi tabiiy sharoit qoldirish yoʻlida keng koʻlamli ishlar amalga oshirdi, muhim siyosiy jarayonlarda faol ishtirok etdi. Bir soʻz bilan aytganda, katta siyosiy maydonda oʻz oʻrniga ega boʻldi.

Hech kimga sir emas, bugun dunyoda roʻy berayotgan ekologik hodisalar nihoyatda katta koʻlam va miqyos kasb etmoqda. Ana shunday sharoitda mamlakatimizdagi ekologik holatni yaxshilash, yashil hududlarni kengaytirish, yashil iqtisodiyotga oʻtishni jadallashtirish orqali kelajak avlodga yaxshi tabiiy muhit qoldirish maqsadida partiyamiz oʻz gʻoya va tashabbuslarini ilgari surmoqda. 

Bu borada bir qancha yutuqlarga erishdik, desak, mubolagʻa boʻlmaydi. Partiyamizning Oliy Majlis Qonunchilik palatasidagi fraktsiyasi tashabbusi bilan ekologiya va atrof-muhitni muhofaza qilishga oid bir qator qonun hujjatlari qabul qilindi. Hududlardagi deputatlik guruhlari hamda ekofaollarimiz tomonidan olib borilgan targʻibotlar natijasida aholining ona tabiatga boʻlgan munosabati oʻzgarmoqda. 

Hozirgi kunda tumanimizda partiyamiz aʼzolari soni 2600 nafardan oshdi. Bu esa fuqarolarimiz ekologik holatni toʻgʻri anglagan holda Oʻzbekiston Ekologik partiyasining gʻoya va maqsadlarini qoʻllab-quvvatlayotganini koʻrsatadi. 

Prezidentimiz tashabbusi bilan 2025-yilning “Atrof-muhitni asrash va yashil iqtisodiyot yili” deb eʼlon qilinishi ekologiyaning bugungi kunda qay darajada ahamiyatli ekanini koʻrsatib turibdi. 

Oldimizda ekologik barqarorlikka erishish, yurtimizni yashil makonga aylantirishdek ulkan maqsadlar turibdi. Ana shu yoʻlda barchangizga kuch-quvvat va muvaffaqiyatlar tilaymiz!

Saʼdulla Sadikov, partiyaning tuman Kengashi raisi