Energiya samaradorligi va energiya tejamkorligi – taraqqiyot asosi

Soʻnggi yillarda mamlakatimizda mavjud resurslarni va ishga solinmagan salohiyatni jalb etish orqali energiya samaradorligini oshirish, energiya tejovchi texnologiyalar va qayta tiklanuvchi energiya manbalarini keng joriy etish, iqtisodiyot tarmoqlari va ijtimoiy sohaning energiya sarfi hajmini keskin kamaytirish, shuningdek, yoqilgʻi-energetika resurslaridan oqilona va samarali foydalanishni taʼminlashga alohida eʼtibor qaratilib, bu borada tizimli ishlar amalga oshirilmoqda. Amudaryo tumanida tashkil etilgan seminarda ham shu kabi muhim masalalar muhokama qilindi.

Tumanimizning Toshqalʼa mahallasida respublika miqyosidagi masʼul rahbarlar ishtirokida boʻlib oʻtgan seminarda energiya samaradorligiga erishish, energiya tejamkor vositalardan foydalanish, aholi turmush sharoitlarini yaxshilash, kambagʻallikni qisqartirish, tadbirkorlikni rivojlantirish kabi masalalar xususida soʻz yuritildi.

Seminarda Respublikadagi shahar va tumanlar hokimlarining oʻrinbosarlari, tijorat banklari masʼullari, tashkilotlarlar rahbarlari hamda aholi vakillari ishtirok etdi. Unda masʼullar tomonidan energiya tejamkorligi bugunning eng ahamiyatli masalasi ekanligi, mavjud resurslardan samarali foydalanish, qolaversa, aholi bandligini taʼminlash, yangi ish oʻrinlarini yaratish, tadbirkorlikni rivojlantirish uchun yaratilayotgan imkoniyatlar xususida atroflicha maʼlumotlar berildi.

Taʼkidlanganidek, xonalarining eshik va deraza romlari qishda issiq, yozda sovuq haroratni saqlash uchun izolyatsiya qilingan boʻlishi, energiya tejamkor maishiy texnika va yoritish uskunalaridan foydalanish – energiya samaradorligi uchun dastlabki qadam hisoblanadi. Shuningdek, tabiiy va suyultirilgan gazdan tejamkorlik bilan foydalanib, yuqori samaradorlikka erishish mumkin. Isitish va sovitish jihozlaridan ham toʻgʻri, oqilona foydalanish – resurslarni tejashga va eng muhimi oila xarajatlarini minimallashtirishga xizmat qiladi.

Seminarda bino-inshootlarni, xonadonlarni loyihalashtirishda qurilish materiallarini toʻgʻri tanlash, jihozlash jarayonida ham energiya resurslaridan samarali foydalanishga alohida eʼtibor qaratish lozimligi taʼkidlandi va tegishli tavsiyalar berildi.

Darhaqiqat, mavjud energiya resurslaridan tejamkorlik bilan foydalanish – davr talabi. Masalan, foydalanilmayotgan elektr jihozlari va yoritish uskunalarini tarmoqdan uzib qoʻyish, yaʼni ofis yoki yashash xonalaridan chiqayotganda elektr jihozlarini kutish rejimida qoldirmasdan, ularni oʻchirib, tarmoqdan uzish orqali ham tejamkorlikka hissa qoʻshish mumkin. Shuningdek, ish joyi va xonadonlarni koʻproq tabiiy yorugʻlikdan yaʼni quyosh nuridan foydalangan holda yoritishga alohida eʼtibor qaratish zarur.

Seminarda bundan tashqari kambagʻallik darajasini qisqartirishda aholi tomorqalaridan unumli foydalanish, uy sharoitida dehqonchilikni rivojlantirish, bu boradagi bilimlarni yanada oshirish lozimligi taʼkidlandi. Tadbirkorlini rivojlantirish borasidagi yangi imkoniyatlar, yoshlarni, xotin-qizlarni kasb-hunarga oʻqitish masalalariga ham alohida toʻxtalib oʻtildi.

Charos Arslonova, tuman hokimligining Axborot xizmati rahbari.