Futbol boʻyicha qizlar oʻrtasida musobaqa tashkil etildi
Sport inson salomatligi va jamiyat taraqqiyotining muhim omili hisoblanadi. Xususan, ayol-qizlarning sport bilan shugʻullanishi jamiyatda sogʻlom turmush tarzini shakllantirishga, yoshlarning jismoniy hamda maʼnaviy kamolotiga xizmat qiladi.
Yaqinda Amudaryo tumani sport maktabi tashabbusi bilan Xolimbeg ovuli hududidagi sunʼiy qoplamali mini-futbol maydonchasida futbol boʻyicha ayol-qizlar oʻrtasida musobaqa tashkil etildi. Murosasiz kechgan bahslar sportchilar uchun katta tajriba maktabi boʻlib, qizlar futboli rivoji yoʻlida muhim ahamiyat kasb etdi.
Turnirda Xorazm viloyati hamda Qoʻngʻirot va Xoʻjayli tumanlaridan kelgan tajribali sportchilardan iborat jamoalar ishtirok etishdi. Musobaqada 8ta jamoa gʻalaba uchun oʻzaro kuch sinashdi. Har bir oʻyin muxlislar uchun jozibador va murosasiz bellashuvlarga boy boʻldi.
Futbol anʼanaviy ravishda koʻproq erkaklar oʻyini sifatida qaralsa-da, bugungi kunda ayol-qizlar ham ushbu sport turiga katta qiziqish bildirmoqda. Oʻzbekistonda ayol-qizlar futboliga boʻlgan eʼtibor tobora ortib, turli musobaqalar tashkil etilmoqda. Tumanimizda oʻtkazilgan mazkur musobaqa ham shu yoʻnalishdagi muhim tadbirlardan biri boʻldi.
Har bir jamoa maydonda oʻzining kuchli tomonlarini namoyish etishga intildi. Musobaqa davomida tezkor hujumlar, chiroyli paslar va mustahkam himoya koʻzga tashlandi. Ayniqsa, jamoalar taktik jihatdan mukammal oʻyin koʻrsatishga harakat qilishdi.
Qizgʻin kechgan bahslar yakunida Xoʻjayli tumani futbolchi qizlari 1-oʻrinni qoʻlga kiritdi. Ular yaxshi oʻyini, toʻpni toʻgʻri nazorat qilishi va kuchli himoyasi bilan raqiblaridan ustun keldi. Amudaryo jamoasi esa 2-oʻrinni egalladi, tumanimiz sportchilari mehmon jamoalarga munosib qarshilik koʻrsatib, oʻz kuchini namoyish etishdi. Qoʻngʻirot jamoasi esa musobaqa davomida yaxshi harakat qilib, kuchli raqiblarga jiddiy qarshilik koʻrsatgan holda 3-oʻrinni qoʻlga kiritdi.
Musobaqa yakunida gʻolib jamoalar Amudaryo tumani sport maktabi tomonidan diplom va esdalik sovgʻalari bilan taqdirlandi. Tadbir tashkilotchilari, jumladan, tuman sport maktabi rahbariyati musobaqa ishtirokchilarining kelgusida yanada yuqori marralarni zabt etishlariga tilakdosh boʻldilar.
Murabbiylar esa oʻyin davomida yoʻl qoʻyilgan xatolarga eʼtibor qaratib, jamoalarga bir qator tavsiyalar berishdi. Jumladan, toʻpni oshirishda aniqlikka eʼtibor qaratish, hujumda yanada samarali harakat qilish, himoyada eʼtiborliroq boʻlish kabi muhim jihatlar alohida taʼkidlandi. Kelgusi musobaqalarda ishtirokchilar oʻz xatolari ustida ishlab, yanada kuchliroq jamoa sifatida maydonga chiqishlariga shubha yoʻq.
Bunday musobaqalar nafaqat yosh sportchilarga tajriba orttirish imkonini beradi, balki ayol-qizlar futboliga boʻlgan qiziqishni oshirishga ham xizmat qiladi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
