TUMANNING QATOR HUDUDLARIGA IChIMLIK SUVI QUVURLARI TORTILMOQDA. SUV QAChON KELADI?
Suv – tiriklikning asosi, u bor joyda hayot qaynaydi va rivojlanadi. Bugungi ekologik holat va dunyoning ayrim burchaklarida kuzatilayotgan toza ichimlik suvi tanqisligi muammosi bizni shukur qilishga hamda obi-hayotni tejab ishlatishga chorlamoqda. Chindan-da, har neʼmatning soʻrovi bor. Suv ham Yaratganning bir neʼmati, uni isrof qilish katta gunoh boʻlsa, aksincha, toza ichimlik suvi yetib bormagan manzillarga suv yetkazish, saratonda suvsiragan bir jonzotga suv berish savob amallardan biridir.
Bugungi kunda yurtimizda suv taʼminotini yaxshilash, aholini toza ichimlik suvi bilan markazlashgan holda taʼminlash masalalariga alohida eʼtibor qaratilmoqda. Natijada yurtimizning olis hududlarida ham suv taʼminoti muammolari ijobiy yechim topmoqda. Oldingiday yetti mahalla naridan paqirda suv tashish holatlari asta-sekin ertakka aylanib bormoqda.
Xabaringiz bor, Qoraqalpogʻiston Respublikasining Amudaryo, Beruniy, Qoraoʻzak, Qoʻngʻirot, Nukus va Moʻynoq tumanlaridagi aholi va xoʻjalik yurituvchi subʼektlarning sifatli ichimlik suvi taʼminotini yanada yaxshilash maqsadida Oʻzbekiston Respublikasi va Osiyo taraqqiyot banki oʻrtasida 2018-yil 28-dekabrda “Oʻzbekistonning gʻarbiy qismida ichimlik suvi taʼminoti tizimlarini rivojlantirish” loyihasini amalga oshirish uchun qiymati 145 mln AQSh dollari miqdorida qarz bitimi imzolangan edi. Oʻzbekiston Respublikasi Prezidentining 2019-yil 9-apreldagi Qarori asosida bu boradagi amaliy ishlar boshlab yuborildi.
Loyiha doirasida Amudaryo tumanida ham aholining toza ichimlik suvi bilan markazlashgan holda taʼminlanish darajasini sezilarli darajada yaxshilash koʻzda tutilgan. Loyihani amalga oshirish uchun Ozarbayjonning “ArchiCO Engineering company” qurilish korxonasi bilan hamkorlikda, qiymati 29 mln 30 ming AQSh dollariga teng shartnoma tuzildi. Loyihaga asosan tumanimizning Navoiy, Beruniy va Bobur nomli, Boʻston, Chordara, Boy ovul, Olmazor, Gulzor, Doʻstlik, Arna boʻyi, Jumur ovul, Kuyuk koʻpir, Tosh yop, Xizir eli, Qilichboy ovul va mahallalarida jami 300 km dan ortiq uzunlikdagi ichimlik suvi tarmoqlari hamda 3 ta ichimlik suvi obʼekti qurilishi va rekonstruktsiya qilinishi belgilangan.
Hozirgi kunda pudratchi tashkilotning 12 ta brigada tarkibidagi 155 nafar ishchisi 30 ta texnika yordamida “RU-1” nasos stantsiyasidan Qilichboy suv rostlash uzeliga, shuningdek, tuman markaziga, Kuyuk koʻpir ovuli hududiga va Kuyuk koʻpir ovuli hududidan “Yarimchi” nasos stantsiyasiga polietilen quvurlar yotqizib, qurilish va rekonstruktsiya ishlarini amalga oshirmoqda.
Ayni kunlarda tumanimizdagi Xitoy va Kuyuk koʻpir ovullari hududida hamda Mangʻit shahrining 1-qurilish hududida suv quvurlarini tortish jarayonlari uzluksiz davom ettirilib, shu kungacha tuman hududida jami 180 ming 106 metr uzunlikda turli xil oʻlchamdagi polietilen quvurlar yotqizildi.
Shu bilan birga, ishlar jadal surʼatlarda davom ettirilib, “RU-1” nasos stantsiyasida demontaj ishlari olib borilmoqda. Mazkur stantsiyadagi 2 ta 4 ming 300 metr kub suv saqlovchi rezervuarlarni tashqi qoplama bilan qoplash va betonlashtirish ishlariga hozirlik koʻrilmoqda.
Qayd etish kerakki, ushbu loyiha amalga oshishi natijasida Amudaryo tumanining ichimlik suvi bilan taʼminlanganlik darajasi 48,5 foizdan 80 foizga yetkazilishi koʻzda tutilgan boʻlib, 2026-yil sentyabrgacha yuqorida tilga olingan hududlar markazlashgan suv taʼminoti bilan toʻliq qamrab olinadi.
Albatta, xalqni rozi qilish yoʻlida amalga oshirilayotgan islohotlar bugun faqatgina qogʻozda emas, amalda ham oʻz ifodasini topmoqda. Biz esa, issiqni issiq, sovuqni sovuq demay, xalqimizni obi-hayot bilan taʼminlash borasida fidoyi mehnat qilayotgan soha xodimlarining xayrli ishlariga unum va baraka tilaymiz.
Aziza MADRAHIMOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
