Aholi tomorqalari va ijaraga olingan yerlardan samarali foydalanish boʻyicha koʻrgazmali seminar boʻlib oʻtdi

Amudaryo tumanidagi mahallalarda Oʻzbekiston Respublikasi Prezidenti tomonidan joriy qilingan yangi tizim asosida tomorqa va aholi tomonidan ijaraga olingan yerlardan samarali foydalanish, shu orqali oilalar daromadlarini oshirish masalasida seminar tashkil etildi.

Seminarda Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov, Sanoat, qurilish, transport va aloqa masalalari qoʻmitasi raisi Islam Sdiqov, tuman hokimi Sobir Xoʻjametov, tumandagi 49 ta ovul va mahallalar “yettilik”lari, tijorat banklari masʼullari hamda OAV vakillari ishtirok etdilar.

Seminar ishtirokchilari dastlab tumanning Doʻrman ovulida yashovchi namunali tomorqachilar faoliyati bilan tanishdi. Doʻrmanlik Sardor Abdirimovning 5 sotix yer maydonida yetishtirilayotgan qulupnayidan bu yil ilk hosil olinmoqda. Sardor Abdirimovning dehqonchilik faoliyatini yanada rivojlantirish maqsadidagi tashabbusi hokim yordamchisi tomonidan qoʻllab-quvvatlanib, oʻtgan yili tadbirkorlik uchun 100 mln soʻm imtiyozli kredit mablagʻi ajratilgan va ushbu mablagʻ evaziga tomorqadagi 5 sotix yer maydoniga issiqxona qurilgan edi. Ayni paytda oilaviy mehnat natijasida issiqxonada yetishtirilayotgan qulupnaylar pishib, hosilga kirgan. Qulupnay hosilidan esa 150-200 mln soʻmgacha daromad olish rejalashtirilmoqda.

Shuningdek, dehqonchilikning sir-asrorlarini ota-bobolaridan oʻrganib kelgan doʻrmanlik Islombek Xoʻjaniyazov tomorqasidagi 4 sotix yer maydonida tashkil etilgan issiqxonada ham turli xil koʻchatlar yetishtirmoqda. Qolaversa, pomidor va bodring mahsulotlaridan ham yaxshigina daromad olinadi. 2023-yilda hokim yordamchisining qoʻllab-quvvatlashi bilan 27 mln soʻm imtiyozli kredit mablagʻi hisobiga issiqxonada yetishtirilgan koʻchatlar va mahsulotlarni ichki bozorlarda sotish yoʻlga qoʻyilgan. Shu orqali oilaning 4 nafar aʼzosining bandligi taʼminlangan. Yerdan va yaratilayotgan imkoniyatlardan samarali foydalanish natijasida oilaning umumiy yillik daromadi 90-100 mln soʻmni tashkil etmoqda.

Taʼkidlash joizki, muhtaram Prezidentimiz tomonidan joriy qilingan yangi tizim asosida aholining tomorqa va ijara yerlaridan samarali foydalanishi orqali daromadlarini oshirish maqsadida Doʻrman ovuli Oltin soy koʻchasida har biri 1 sotixdan boʻlgan 20 ta issiqxonalar qurilib, hudud aholisining bandligi taʼminlanishiga va daromad olishiga zamin yaratilmoqda.

Seminarda mobaynida nafaqat dehqonchilik, balki chorvachilik, parrandachilikni ham yoʻlga qoʻygan doʻrmanlik Qudrat Yoʻldashevning faoliyati bilan ham yaqindan tanishildi. Xonadondagi 20 sotix tomorqada yetishtirilayotgan turli sabzavot mahsulotlaridan yiliga ikki marta hosil olinayotgan boʻlib, daromad ham yaxshigina.

Xolimbeg ovulida yashovchi namunali tomorqachi Erkinboy Qoʻshayev faoliyatini oʻrganish mobaynida koʻrgazmali seminar ishtirokchilari limon yetishtirish boʻyicha oʻzaro bilim va tajriba almashdilar. Tomorqaning 1 sotix yer maydonida tashkil qilingan issiqxonada yetishtirilayotgan limondan bu yil ikkinchi marotaba hosil olinmoqda. Shuningdek, limon koʻchatlarini koʻpaytirish orqali tumanning boshqa hududlarida ham ushbu faoliyatni rivojlantirish yoʻlga qoʻyilmoqda.

Shu bilan birga, tomorqada qulupnay, xurmo mevalari, kartoshka, piyoz, karam kabi turli sabzavotlardan ham yaxshi hosil olinadi. Erkinboy Qoʻshayev quyonchilik, chorvachilik va parrandachilikni ham yoʻlga qoʻygan boʻlib, oilaviy mehnat natijasida yillik daromadi 90-100 mln soʻmni tashkil etadi.

Seminar ishtirokchilarining keyingi manzili Oq oltin ovulida koʻchat yetishtirishda ilgʻor tomorqachilardan biri boʻlgan Anvar Kamolov xonadoni boʻldi. Seminar ishtirokchilari yuqori bayramona tayyorgarlikda kutib olindi. Milliy taomlarimiz, oziq-ovqat mahsulotlari bilan bezatilgan dasturxon Navroʻzning tobora yaqinlashayotganini yana bir bor esga soldi.

Tomorqada tashkil qilingan issiqxonada turli xil koʻchatlar yetishtirish yoʻlga qoʻyilgan boʻlib, 2023-yilda hokim yordamchisining koʻmagi bilan 33 mln soʻm imtiyozli kredit mablagʻi evaziga olingan mototransport vositasi orqali yetishtirilgan koʻchatlarni ichki bozorga olib borib sotish yoʻlga qoʻyilgan. Shuningdek, buyurtma asosida ham koʻchatlar yetishtirilib, tadbirkor bir yil davomida 60-70 mln soʻmgacha daromad olmoqda.

Toʻlqin ovuli ham dehqonchilik, tomorqachilik yuqori darajada rivojlangan hududlardan biri boʻlib, namunali tomorqa yer egalari ham talaygina. Shulardan biri Mansur Muxtarov tomorqasda 3 sotix yer maydonida koʻchatchilik uchun issiqxona tashkil qilib, 5-6 nafar ishsiz xotin-qizlarning bandligini taʼminlagan. Issiqxonada turli gullar, sabzavotlar va poliz ekinlari koʻchatlari yetishtirilib, ovul aholisiga hamda ichki bozorda sotish yoʻlga qoʻyilgan. Tomorqa haqiqiy daromad manbai ekanligini bilgan tadbirkor oʻz faoliyatini yanada kengaytirishni rejalashtirmoqda.

Toʻlqinlik yana bir ilgʻor tomorqachi Azimjon Muxtarov esa 7 sotix issiqxonasida pomidor va bodring mahsulotlarini yetishtirib, 2 marotaba yaxshi hosil va yuqori daromad olib kelmoqda.

Seminar ishtirokchilari tomorqalar hamda ijaraga olingan yerlarda tashkil etilgan ishlar bilan tanishish mobaynida oʻzlari ham ushbu soha boʻyicha qoʻshimcha bilim va tajribaga ega boʻldilar.

Charos Arslonova, tuman hokimligining Axborot xizmati rahbari.