48-sonli MTTda sumalak sayli boʻlib oʻtdi
Yurtimizda Navroʻzi olam shukuhi kezib yurgan pallalarda xalqimiz milliy anʼanalarimizga koʻra, sumalak sayllarini oʻtkazishadi. Sumalak tayyorlash davomida bugʻdoyni undirishdan tortib, to sumalak dasturxonlarga yetib borgunicha boʻlgan jarayonni mehmondoʻst va tanti xalqimiz “sumalak toʻyi”ga aylantirib yuborishadi. Sababi, qoʻshnisining oʻchogʻidan chiqqan tutunni koʻrgan har oʻzbek borki, qoʻshnisidan xabar olib, yordamlashishga, xayrli ishga hissa qoʻshishga oshiqadi. Sumalak pishayotgan qozon atrofida mahalla ahli jamuljam boʻlib, galdagi bahorga eson-omon yetkazgani uchun Yaratganga shukronalar aytib, yurtimiz tinchligini soʻrab duoga qoʻl ochishadi. Ha, Navroʻzi olam mana shunday sumalakli tadbirlari bilan goʻzal. Zaminga tiriklik, uygʻonish, rizq-u roʻz olib kelgani uchun ham qadrli!
Ushbu milliy taom nafaqat qarindosh-urugʻlar, qoʻni-qoʻshnilar ishtirokida, balki yurtimiz boʻylab barcha idora va tashkilotlar, massalarda faoliyat koʻrsatib kelayotgan hamkasblar, katta-kichik davralarda ham zoʻr ishtiyoq, bayramona ruh ila tayyorlanadi. Bu esa, mehnat jamoasi oʻrtasidagi mehr-oqibatni, doʻstona yaqinlikni yanada mustahkamlaydi. Shu bilan birga, hamkasblarning ishdan ortib, maʼnaviy hordiq olishiga ham hissa qoʻshadi.
Ana shunday sumalak sayllaridan biri yaqinda tumanimizning Xolimbeg ovulida joylashgan 48-sonli maktabgacha taʼlim tashkilotida ham boʻlib oʻtdi. Tashkilot xodimlari erta tongdan bogʻcha binosida jamuljam boʻlib, sumalak tayyorlashga kirishdilar. Tashkilot rahbari Xosiyat Qurbanbayeva boshchiligida tashkil qilingan sumalak saylida muassasa xodimlari Aziza Rajabova, Muhabbat Jumamurodova, Zulfiya Atabayeva, Yulduz Ismailova, Muhabbat Eshimbetova, Toʻlgʻanoy Bobojonova, Zamira Mangliyeva, Mohira Toʻrayevalar ishtirok etdilar.
Maʼnaviy hordiq olish, milliy qadriyatlarimizni targʻib qilish va jamoadagi oʻzaro ahillikni mustahkamlash maqsadida tashkil qilingan sumalakda bayramona tilaklar aytilib, ezgu niyatlar ila kapgir aylantirildi.
Tadbir davomida tashkilot ishchi xodimlari tomonidan akkordeon va doiralarda musiqalar chalinib, jarayon raqs, kuy-qoʻshiqlar, oʻyin-kulgilar bilan davom etdi. Sumalak ana shunday oʻyin-kulgilari bilan yanada esda qolarli oʻtdi.
Tayyor holga kelgan milliy taom hamkasblar tomonidan tatib koʻrilib, tashkilot tarbiyalanuvchilariga ham ulashildi.
Maʼlumot uchun, 48-sonli maktabgacha taʼlim tashkiloti 2019-yilda foydalanishga topshirilgan boʻlib, 75-oʻringa moʻljallangan. Hozirgi kunda 90 nafar bolajonlar ushbu maskanda tarbiyalanmoqda. Shuningdek, tashkilotda 21 nafar xodim faoliyat yuritib kelmoqda.
Maʼlumotlarga koʻra, sumalak qadimdan, ayrim maʼlumotlarga koʻra 3000-yildan beri, bahorni kutib olish, dehqonchilik ishlarining boshlanishi arafasida tayyorlab kelinadi. XX asrning 90-yillaridan boshlab, ushbu shohona taomni pishirish Navroʻz bayramida, ayniqsa, ayollar oʻrtasida katta tantana bilan oʻtkazila boshlangan.
Darhaqiqat, sumalak uzoq tarixga ega milliy taom hisoblanib, u haqida turli xil rivoyat va afsonalar yuradi. Necha-necha asrlar oʻtsa-da, bizgacha yetib kelgan bu taomni hamda uning tayyorlanish jarayonidagi oʻziga xos qadriyatlarni biz ham avlodlarga bus-butunligicha yetkazish har birimiz uchun muhim vazifadir. Albatta, bunda yuqorida qayd etilgan sumalak sayllarining oʻrni beqiyos.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
