Jinoyatchilik va huquqbuzarliklarning oldini olish borasida mahallalarda amalga oshirilayotgan ishlar oʻrganildi

Soʻnggi yillarda mamlakatimizda tinchlik va osoyishtalikni taʼminlashning mutlaqo yangi mexanizmlarini joriy etish, huquqbuzarlikni sodir etishga sabab boʻlayotgan ijtimoiy-maishiy muammolarni ijtimoiy profilaktika choralari tizimi orqali hal etish hamda aholida shaxsiy xavfsizlik hissini shakllantirish borasida samarali chora-tadbirlar amalga oshirildi.

Shu bilan birga mahallalarda xavfsiz muhitni yaratishning tashkiliy-profilaktik asoslarini zamon talablariga moslashtirish, sodir etiladigan qonunbuzilishlarning asl omillarini oʻz vaqtida aniqlash va kompleks chora-tadbirlar bilan manzilli bartaraf etish orqali jinoyatchilikning barvaqt oldini olish tizimining samaradorligini yanada oshirish dolzarb vazifa sifatida namoyon boʻlmoqda.

Ushbu vazifalarni samarali amalga oshirish hamda davlat organlari va tashkilotlarining respublika mahallalarida huquqbuzarliklar profilaktikasi sohasidagi faoliyatini 2025-yilda sifat jihatdan yangi bosqichga olib chiqish maqsadida 2025-yilning 3-yanvar sanasida Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi 1-sonli qarori imzolandi.

Mazkur qarorning Amudaryo tumanidagi ijrosi bilan tanishish maqsadida respublika masʼullaridan iborat ishchi guruh tumanimizda boʻldi.

Ishchi guruh vakillari tumanda oʻtgan davr mobaynida jinoyatchilik va huquqbuzarliklar sonining oshishi boʻyicha “qizil hudud”ga kiritilgan mahallalardagi vaziyat bilan tanishdi. Xususan, Beshtom, Gulzor, Bosuv, Doʻstlik, A.Navoiy nomli mahallalarda “yettilik” masʼullari bilan suhbatlar olib borildi, bu borada amalga oshirilgan ishlar holati oʻrganildi hamda mavjud kamchiliklarni bartaraf qilish boʻyicha tegishli tavsiya va koʻrsatmalar berildi.

Oʻrganishlar mobaynida aholi xonadonlarida, ayniqsa, koʻp qavatli uylarda xavfsizlik choralari koʻrilganligi, yaʼni kuzatuv kameralarining oʻrnatilganligi koʻzdan kechirildi.

Shuningdek, tuman Ichki ishlar boʻlimi xodimlariga davlatimiz rahbarining 1-sonli qarori bilan belgilab berilgan jinoyatchilik va huquqbuzarliklarning oldini olishdagi ustuvor vazifalar xususida tushuntirish-targʻibot ishlari olib borildi.

Taʼkidlash joizki, mazkur hujjat bilan 2024-yilda jinoyat sodir etilgan har bir mahallada kriminogen vaziyatni barqarorlashtirish hamda jinoyatlarni barvaqt profilaktika qilishning mahallalar kesimida choraklik manzilli chora-tadbirlarini belgilagan holda mahalla – tuman – viloyat darajasida uning ijrosi uchun bevosita masʼul rahbarlarni biriktirish va aniq sohaviy javobgarlikni yuklash, kriminogen vaziyat ogʻir mahallalarda ilmiy-amaliy yondashuvlar asosida joylarga chiqqan holda maqsadli oʻrganishlarni oʻtkazish orqali huquqbuzarliklarga sabab boʻlayotgan asl omillarni aniqlash va barham berish boʻyicha tashkiliy-huquqiy choralarni koʻrish kabi ustuvor vazifalar belgilab berilgan.

Ishchi guruh vakillari tomonidan olib borilgan targʻibot ishlari mobaynida mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarning oldini olishda “Mahalla yettiligi” har bir vakilining aniq masʼuliyatini belgilash, ushbu toifadagi huquqbuzarliklar profilaktikasiga alohida yondashish zarurligi, aholining huquqiy ongi, ijtimoiy faolligi va fuqarolik masʼuliyatini oshirish, jinoyat sodir etilishiga sabab boʻlishi mumkin boʻlgan ijtimoiy muammolarni hal etishga jamoatchilik vakillari, nuroniylar va mahalla faollarini keng jalb etib borish lozimligi tushuntirildi.

Qolaversa, mahallalar jamoat joylari va yashash xonadonlarida xavfsiz muhit yaratish, fuqarolar hayoti, sogʻligʻi va mol-mulkiga har qanday tajovuzlarning oldini olish maqsadida huquqbuzarliklar profilaktikasiga zamonaviy raqamli texnologiyalar va texnik vositalarni keng joriy etish zarurligi taʼkidlandi.

Ishchi guruh aʼzolari tuman hokimligida jinoyatchilik va huquqbuzarliklarning oldini olish borasidagi ishlarni muvofiqlashtiruvchi maxsus shtab faoliyati bilan tanishdi. Jarayon mobaynida profilaktika doirasida amalga oshirilayotgan ishlar tahlil qilindi hamda aniqlangan kamchiliklarning bartaraf qilish boʻyicha tegishli koʻrsatmalar berildi.

Charos Arslonova, tuman hokimligining Axborot xizmati rahbari.