11-sonli maktabda “Assalom, Navroʻz!” nomli bayram tadbiri boʻlib oʻtdi

Yasharish va yangilanish ayyomi boʻlgan Navroʻzi olam haqida gap ketganida har bir insonning oʻz bolaligi, ushbu bayram bilan bogʻliq xotiralari yodiga tushadi. Sababi, bolalikdagi “chakman tosh”, “quvlashmachoq”, “bekinmachoq”, “arqon tortishuv”, “varrak uchirish” singari koʻplab oʻyinlar aynan bahor mavsumi hamda Navroʻz arafasida oʻynaladi. Shu kabi xalq oʻyinlari bolajonlarga olam-olam zavq ulashadi. Qishning izgʻirin havosidan charchagan odamlar Navroʻzga – “Yangi kun”ga yetganiga shukronalar aytib, bir-birlarining holidan xabar oladilar. Koʻk somsa-yu, koʻk chuchvara, sumalak kabi bahoriy taomlarni tayyorlab, mahalladoshlarga ilinadilar. Ha, bahor ana shunday saxovat va mehr-oqibat fasli. Navroʻz esa, dillarni dillarga bogʻlovchi shafoat, muruvvat, oʻzaro bagʻrikenglik mujassam boʻlgan koʻhna bayram.

2009-yil 30-sentyabrda Navroʻz bayrami UNESCO tarafidan nomoddiy madaniy meros sifatida roʻyxatiga kiritilib, 2010-yil 23-fevralda BMT Bosh Assambleyasining 64-sessiyasida 21-mart “Xalqaro Navroʻz kuni” deb eʼlon qilinishi ushbu bayramning maqomini yanada yuksaklarga koʻtardi. Sana munosabati bilan joylarda turli xil tadbirlar, sumalak sayllari oʻtkazilib kelinadi.

Yaqinda Amudaryo tumanidagi 11-sonli maktabda “Assalom, Navroʻz!” nomli bayram tadbiri boʻlib oʻtdi. Bayram milliy oʻzligimizni anglash, oʻquvchilar qalbida milliy anʼanalarimizga hurmat va muhabbat uygʻotish, oʻquvchilar va mehnat jamoasi qalbiga bayramona shukuh olib kirish maqsadida tashkil qilindi.

Maktabning maʼnaviy-maʼrifiy ishlari boʻyicha direktor oʻrinbosari Qunduzoy Xalmuratova tashkilotchiligida oʻtkazilgan bayram tadbirini maktab direktori Ulugʻbek Mamutov kirish soʻzi bilan ochib berib, maktab maʼmuriyatini va oʻquvchilarni bayram bilan qizgʻin muborakbod etdi.

Shundan keyin bayram dasturi boshlandi.

Tadbirni maktab psixologi Dilnoza Shamurotova olib bordi. Tadbirni maktabning 9-sinf oʻquvchilari oʻzlari tayyorlagan, Navroʻz anʼanalarini aks ettiruvchi sahna koʻrinishlari bilan boshlab berdi. 3-, 4-, 5-, 6-, 7-, 8- va 10- sinf oʻquvchilari esa, oʻzlarining bayramona raqslari, dilrabo qoʻshiqlari va milliy chiqishlari bilan davraga yanada fayz kiritdilar.

Soʻzimiz avvalida Navroʻz bayramida oʻtkaziladigan milliy oʻyinlar haqida soʻz yuritgan edik. Darhaqiqat, ushbu bahor bayramini milliy xalq oʻyinlarisiz tasavvur qilib boʻlmaydi. Asrlar osha avloddan avlodga oʻtib kelayotgan, ana shunday milliy oʻyinlardan biri bu – “Arqon tortishuv” oʻyinidir. Qadimda bu oʻyin Navroʻz bayramida, xalq sayllarida, toʻy va marosimlarda zoʻr ishtiyoq bilan oʻtkazilgan. Ushbu oʻyin endilikda ham milliy bayramlarimizda musobaqa tarzida oʻtkazilib kelinadi. Shiddatli va qizgʻin kechgan “Arqon tortishuv” musobaqasida maktabning 11-a sinf yigitlari 1-oʻrin, 9-a sinf oʻquvchilari 2-oʻrin, 10-sinf yigitlari esa 3-oʻrinni egalladilar. Gʻolib jamoalar faxriy yorliqlar bilan taqdirlandi.

Shuningdek, “Eng yaxshi raqs”, “Eng yaxshi qoʻshiq”, “Eng yaxshi milliy libos”, “Eng yaxshi guruh raqsi”, “Eng yaxshi kompozitsiya”, “Eng yaxshi milliy raqs” va “Eng yaxshi zamonaviy raqs” nominatsiyalari boʻyicha gʻoliblar aniqlanib, ularga ham faxriy yorliqlar topshirildi.

Aziza Madrahimova