Energiya resurslaridan oqilona foydalanish – qonuniylik va barqarorlik kafolati

Energiya resurslaridan samarali foydalanish mamlakat iqtisodiy barqarorligi va aholi turmush darajasini oshirishda muhim ahamiyat kasb etadi. Elektr energiyasi va tabiiy gazning noqonuniy isteʼmoli nafaqat milliy resurslarni talon-toroj qilishga, balki butun tizimning izdan chiqishiga ham sabab boʻladi. Shu bois, prokuratura organlari tomonidan mazkur sohada nazorat kuchaytirilib, energiya resurslarini tejamkorlik bilan taqsimlash va ulardan qonuniy foydalanishni taʼminlash maqsadida izchil ishlar olib borilmoqda.

28-mart kuni Amudaryo tumani prokuraturasi tomonidan elektr energiyasi va tabiiy gaz isteʼmoli boʻyicha nazorat tadbirlari tashkil etildi.

Tekshiruvlar davomida aniqlangan qonunbuzarlik holatlarini bartaraf etish yuzasidan masʼul tashkilotlarga topshiriqlar berildi. Jumladan, “Hududiy elektr tarmoqlari” aktsiyadorlik jamiyatiga qarashli Amudaryo tuman elektr taʼminoti korxonasi va “Hududgaz Qoraqalpogʻiston” aktsiyadorlik jamiyatiga qarashli “Amudaryo tumangaz” gaz taʼminoti boʻlimi faoliyati oʻrganildi. Elektr va gaz taʼminoti obʼektlarining holati tahlil qilinib, mavjud texnik va tashkiliy muammolarni hal qilish choralari koʻrildi.

Shuningdek, dispetcherlik xizmatlari, isteʼmolchilar murojaatlarini qabul qilish markazlari va gaz taʼminoti infratuzilmasi tekshiruvdan oʻtkazildi. Tekshiruvlar davomida gaz ballonlarini toʻldirish va tarqatish shoxobchalaridagi kamchiliklar, tabiiy gaz saqlash zaxira omborlarining holati ham tahlil qilindi. Barcha aniqlangan kamchiliklar boʻyicha zudlik bilan choralar koʻrildi va qonuniylikni taʼminlashga qaratilgan ishlarning samaradorligi oshirildi.

Shu kuni tuman Prokuraturasi tashabbusi bilan energiya taʼminotini yaxshilashga qaratilgan aniq choralar ham amalga oshirildi. Jumladan, Chordara mahallasi hududida joylashgan Qilichboy koʻchasidagi eski yogʻoch elektr ustunlari yangi mustahkam ustunlarga almashtirildi. Bu hudud aholisining elektr taʼminotidagi uzilishlarni bartaraf etishga va energiya taʼminotining barqarorligini taʼminlashga xizmat qiladi.

Bundan tashqari, Arna boʻyi mahalla fuqarolar yigʻini hududida tabiiy gaz isteʼmolida ikki bosqichli tizimga oʻtish ishlari amalga oshirildi. Bu tizim gaz taqsimotini xavfsiz va samarali yoʻlga qoʻyish imkonini berib, noqonuniy ulanishlarning oldini olishga ham xizmat qiladi.

Energiya resurslaridan qonuniy va tejamkorlik bilan foydalanish har bir fuqaro va tadbirkorning nafaqat huquqiy, balki ijtimoiy masʼuliyati hamdir. Davlat idoralari va huquq-tartibot organlari tomonidan olib borilayotgan chora-tadbirlar nafaqat iqtisodiy barqarorlikni taʼminlash, balki noqonuniy foydalanish holatlariga qarshi samarali kurashishda ham muhim ahamiyat kasb etadi.

Elektr energiyasi va tabiiy gaz taʼminoti boʻyicha mavjud muammolarni aniqlash va ularni hal etish orqali aholi hayoti yengillashadi, resurslardan oqilona foydalanish taʼminlanadi. Bu esa oʻz navbatida, mamlakatning energetik xavfsizligini mustahkamlash va barqaror rivojlanishini taʼminlashga xizmat qiladi.

Sh. Joldasov, Amudaryo tuman prokurorining katta yordamchisi.