Prezident sovrini uchun “Xorijiy tillarni oʻqitish boʻyicha eng yaxshi maktab” tanlovi oʻtkazildi

Xorijiy tillarni oʻrganish va erkin suhbatlasha olish darajasida bilish – zamon talabi. Shu sababli davlatimiz tomonidan bugungi kunda xorijiy tillarni oʻrgatish va oʻqitish masalasiga alohida eʼtibor qaratilib kelinmoqda. Jumladan, umumtaʼlim maktablarida oʻquvchilarning xorijiy tillarni oʻrganishga boʻlgan ishtiyoqini oshirish, ularga bu borada sifatli taʼlim berish hamda oʻquvchilarning bilim darajasini sinovdan oʻtkazib, munosib baholash masalalariga ham urgʻu berilmoqda.

Oʻzbekiston Respublikasi Prezidentining “Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida”gi Qarori hamda Vazirlar Mahkamasining “Iqtidorli oʻquvchilar oʻrtasida fan olimpiadalarini oʻtkazish tizimini takomillashtirish hamda xorijiy tillarni oʻqitish boʻyicha eng yaxshi maktabni aniqlash tizimini joriy etish toʻgʻrisida” gi Qarori asosida 27-mart kuni Amudaryo tumanidagi 40-sonli umumiy oʻrta taʼlim maktabi binosida “Xorijiy tillarni oʻqitish boʻyicha eng yaxshi maktab” tanlovi oʻtkazildi.

Prezident sovrini uchun oʻtkazilgan tanlovda tumandagi 86 ta umumiy oʻrta taʼlim maktablarining 7-9-sinf oʻquvchilaridan iborat 385 nafar oʻquvchi yoshlar ishtirok etishdi.

Tanlovni tuman Maktabgacha va maktab taʼlimi boʻlimi boshligʻi Yalgʻash Shamuratov kirish soʻzi bilan ochib berib, tanlov ishtirokchilariga omad tiladi. Bundan tashqari, tanlovga Qoraqalpogʻiston Respublikasi Maktabgacha va maktab taʼlimi vazirligi boʻlim boshligʻi Hamidulla Begdullayev, tuman ixtisoslashtirilgan maktabi direktorining oʻrinbosarlari Ravshan Xalmuratov va Muyassar Raxmatullayevalar umumiy rahbarlik qilishdi. Har bir maktab jamoasidan ingliz tiliga qiziqadigan 5 nafar ishtirokchi test sinovlarida ishtirok etdilar. Test topshiriqlari Fan olimpiadalari markazi tomonidan muhrlangan holatda yetkazib berildi. Ishtirokchilarga test topshiriqlari va javob varaqalari tarqatilgach, testlarni yechish uchun 2 soat vaqt berildi.

Mazkur test jarayonlari davomida nafaqat oʻquvchilarning xorijiy til boʻyicha bilimlari sinovdan oʻtkaziladi, balki bu jarayonda chet tili oʻqituvchilarining ham bilim koʻrsatkichlari baholanadi. Tanlov gʻoliblari Oʻzbekiston Respublikasi Prezidentining sovrini bilan mukofotlanadi. Bunda tanlovning tuman va shahar bosqichida 1-oʻrinni egallab, gʻoliblikni qoʻlga kiritgan maktabga — 100 million soʻm, 2-oʻrin uchun — 75 million soʻm, 3-oʻrin uchun — 50 million soʻm miqdorida mukofot puli berilishi belgilangan.

Test jarayonlari davomida oʻquvchilar oʻzlarining bor bilim va salohiyatini namoyon qilishga harakat qildilar. Jarayon yakunida oʻquvchilarining test natijalari boʻyicha javob varaqalari yigʻib olindi. Endilikda ular markazlashgan holda, Toshkent shahrida, kompyuter yordamida tekshiriladi va tanlov natijalari 10 kundan keyin eʼlon qilinadi. Tanlovning bu yilgi oʻzgachaligi – javob varaqalari hakamlar hayʼati tomonidan emas, balki toʻgʻridan-toʻgʻri kompyuter texnologiyasi yordamida tekshirilishida. Albatta, bu baholash jarayonlaridagi shaffoflikni taʼminlaydi.

Eslatib oʻtamiz, 2023-2024 oʻquv yili “Xorijiy tillarni oʻqitish boʻyicha eng yaxshi maktab” tanlovida 40-maktab jamoasi 1-oʻrinni, 32-maktab 2-oʻrinni va 1-maktab 3-oʻrinni qoʻlga kiritib, oʻz navbatida tegishli pul mukofotlari bilan taqdirlangan edi.

Taʼkidlash joizki, maktablar oʻrtasida sogʻlom raqobat muhitini shakllantirish, ularda xorijiy tillarni oʻqitishning darajasi va sifatini oshirishni ragʻbatlantirish, pedagog-oʻqituvchilarning faolligini oshirish, oʻqitish sifati boʻyicha xalqaro mezon va standartlarga muvofiq yuqori koʻrsatkichlarga erishishga zamin yaratish – tanlovning maqsadi hisoblanadi.

Ushbu tanlov maktablarda xorijiy tillarni oʻqitish boʻyicha amalga oshirilayotgan chora-tadbirlar natijadorligini tahlil qilish, xorijiy tillar boʻyicha oʻquvchilarga sifatli taʼlim berayotgan, samarali faoliyat olib borayotgan oʻqituvchilarni aniqlash va ragʻbatlantirish, maktablarda xorijiy tillarni oʻrgatish boʻyicha koʻrsatilayotgan taʼlim xizmatlari sifati va samaradorligini oshirish, ularda amalga oshirilayotgan ishlar va erishilayotgan natijalar toʻgʻrisida keng jamoatchilikni xolis axborotlar bilan taʼminlash, tanlovda yuqori koʻrsatkichlarni qayd etgan maktablar tajribasini ommalashtirish kabi maqsadlarga ham xizmat qiladi.

Aziza Madrahimova