Obodonlashtirish ishlari tizimli tarzda tashkil etilmoqda

Amudaryo tumani kun sayin yangi qiyofa kasb etmoqda. Hudud infratuzilmasining yaxshilanishi, yashil hududlarning kengayishi va aholining turmush sifatiga ijobiy taʼsir koʻrsatuvchi chora-tadbirlar izchil amalga oshirilmoqda. Mutaxassislar va mutasaddilar shaharsozlik qoidalariga amal qilgan holda, obodonlashtirish ishlarini jadallik bilan olib borishmoqda. Yoʻllarni taʼmirlash, jamoat joylarini koʻkalamzorlashtirish, tungi yoritish tizimini yaxshilash va sanitariya chora-tadbirlarini kuchaytirish orqali masʼul tashkilotlar aholi turmush farovonligiga katta hissa qoʻshmoqda.

Tuman Obodonlashtirish boshqarmasi tomonidan jo­riy yilgi bahor mavsumida umumiy hisobda 25 mingdan ortiq mevali va manzarali daraxt koʻchatlari ekish rejalashtirilgan.

Shu kunlarda Beshtom mahallasi hududida shoʻrlangan tuproq yerlar tozalanib, yangi ochilgan maydonlarga koʻchatlar oʻt­qazilyapti. Shuningdek, tuman boʻylab 22 gektar yer maydonda archa, tut hamda mevali va turli xil manzarali daraxtlar ekilishi rejalashtirilgan. Bu ekologik muhitni yaxshilashga, havo tozaligini taʼminlashga va atrof-muhit koʻrkamligiga xizmat qiladi.

Bahor mavsumida bosh­qarmaga qarashli issiqxonada 100 ming tupdan ortiq gul yetishtirilishi koʻzda tutilgan. Hozirda petuniya, katarantus, zaʼfaron kabi turli xil xushmanzara gullar parvarish qilinmoqda.

Tumanda ichki yoʻllarni taʼmirlash ishlari ham keng koʻlamda olib borilmoqda. Chekka qishloqlardagi tuproqli yoʻllar bosqichma-bosqich taʼmirlanib, qum-shagʻal aralashmasi yotqizilmoqda.

Yuqori qishloq, Ayoqchi mahallalari, Xolimbeg va Qipchoq ovullarida belgilangan vazifalar rejadan ortiq bajarildi. Shu kunlarda Xitoy ovulida tuproqli ichki yoʻllarga qum-shagʻal aralashmasi yotqizish ishlari jadal davom etmoqda. Bu nafaqat haydovchilar, balki piyodalar uchun ham qulaylik yaratadi. Yoʻllarning yaxshilanishi tumanda transport harakatining tartibli va xavfsiz boʻlishiga katta hissa qoʻshadi.

Koʻchalarda tungi yoritish tizimini takomillashtirish ishlari ham muntazam ravishda olib borilmoqda. Markaziy koʻchalardagi tungi yoritish chiroqlari koʻzdan kechirilib, eski va nosoz chiroqlar zamonaviy yoritish uskunalariga almashtirilmoqda. Bu esa aholining tungi vaqtda xavfsiz harakatlanishiga sharoit yaratib, kechasi harakat xavfsizligini oshirish va shahar qiyofasini yanada chi­royli qilishga xizmat qiladi.

Bahor faslida quturish va boshqa kasalliklarning oldini olish maqsadida tuman Obodonlashtirish boshqarmasining max­sus brigadasi tomonidan sanitariya tadbirlari kuchaytirilmoqda. Xususan, daydi itlar nazorati kuchaytirilib, ular maxsus oʻrinlarga joylashtirilmoqda. Bu, ayniqsa, Doʻstlik mahallasidagi koʻp qavatli uylar atrofida koʻp uchraydigan muammolardan biri edi. Mazkur chora-tadbirlar aholi xavfsizligini taʼminlash, sanitariya holatini yaxshilash va infektsiya tarqalishining oldini olish maqsadida olib borilmoqda.

Tumanda olib borilayotgan keng koʻlamli ishlar hududning umumiy qiyofasini tubdan oʻzgartirmoqda. Obodonlashtirish, yoʻllarni taʼmirlash, tungi yoritish tizimini yaxshilash va sanitariya chora-tadbirlarini kuchaytirish orqali aholi uchun yanada qulay, xavfsiz va zamonaviy muhit yaratilmoqda. Rivojlanayotgan infratuzilma, qulay ekologik muhit va aholi turmush sifatining yaxshilanishi esa Amudaryo tumanini yanada farovon va jozibali hududga aylantirishi shubhasiz.

Shohzod Qurbonboyev.