Xalq deputatlari Amudaryo tumani Kengashining 8-sessiyasi toʻgʻrisida axborot

Joriy yilning 4-aprel kuni Amudaryo tumani hokimligining majlislar zalida VII chaqiriq Xalq deputatlari tuman kengashining navbatdagi 8-sessiyasi boʻlib oʻtdi. Sessiya majlisida deputatlar, hokim oʻrinbosarlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Xalq deputatlari tuman kengashi Raisining oʻrinbosari – “3-Doʻstlik” saylov okrugidan deputat Madamin Kazakov ochdi va olib bordi. Sessiya kotibligiga “9-Qilichboy” saylov okrugidan deputat Muhabbat Rahimova saylandi.

Kun tartibidagi dastlabki masala – 2025-yilning birinchi choragi davomida huquqbuzarliklar profilaktikasi va jinoyatchilikka qarshi kurashish boʻyicha amalga oshirilgan ishlar yuzasidan tuman Ichki ishlar boʻlimi boshligʻi Muxametali Xojamuratov hisobot berdi.

Hisobotda jamoat tartibini saqlash, fuqarolarning tinchligi va xavfsizligini taʼminlash, jinoyatchilik va huquqbuzarliklarning oldini olish, sodir etilgan jinoyatlarni oʻz vaqtida fosh qilish, hududda kriminogen vaziyatni barqarorlashtirishga qaratilgan bir qator tezkor profilaktik tadbirlar amalga oshirilayotganligi xususida soʻz yuritildi.

Sessiya kun tartibidagi Qoraqalpogʻiston Respublikasi byudjetining 2025-yil yanvar holatiga aniqlangan erkin qoldiq mablagʻlari hisobidan tuman Obodonlashtirish boshqarmasiga mablagʻlar ajratish toʻgʻrisidagi masala yuzasidan tuman hokimligining moliya, iqtisodiyot va kambagʻallikni qisqartirish masalalari boʻyicha bosh mutaxassisi Otabek Olloyorov axborot berdi. Axborotda Amudaryo ustiga qurilgan, hozirda foydalanilmayotgan eski ponton koʻprik qismlaridan ochiq osmon ostidagi muzey tashkil qilish uchun mablagʻ ajratish toʻgʻrisida taklif bildirildi. Ushbu taklif barcha deputatlar tomonidan bir ovozdan maʼqullandi.

Kun tartibidagi navbatdagi – “Tashabbusli byudjet”ning joriy yilgi 1-mavsumi yakunlariga koʻra gʻolib deb topilgan loyihalarni tasdiqlash toʻgʻrisidagi masala yuzasidan tuman hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Bahodir Ernazarov hisobot berdi.

Hisobotda “Tashabbusli byudjet”ning joriy yilgi 1-mavsumida 10-martdan 20-martga qadar boʻlib oʻtgan ovoz berish jarayoni yakunlariga koʻra eng koʻp ovoz toʻplagan 11 ta tashabbus gʻolib deb topilgani, ushbu tashabbuslarning umumiy qiymati 16 mlrd 497 mln 828 ming soʻmni tashkil etishi qayd qilindi va mazkur loyihalar haqida batafsil maʼlumot berildi.

Shuningdek, tuman hokimi oʻrinbosari Bahodir Ernazarov Oʻzbekiston Respublikasi Vazirlar Mahkamasining “Shaharlar va boshqa aholi punktlari koʻchalari hamda ichki xoʻjalik yoʻllari infratuzilmasini yanada takomillashtirish toʻgʻrisida”gi qarori ijrosi borasida tumanda amalga oshirilayotgan ishlar yuzasidan ham hisobot berdi.

Sessiya majlisida Oʻzbekiston Respublikasi Prezidentining Qoraqalpogʻiston Respublikasi Amudaryo tumanidagi Xalq qabulxonasi mudiri Anvar Orazbayev davlat organlari va boshqa tashkilotlarning uyma-uy yurish, murojaatlar bilan ishlash, ijtimoiy va boshqa obʼektlarda aniqlangan muammolarni hal qilish borasidagi faoliyatini tizimli oʻrganish, koʻrib chiqilishi majburiy boʻlgan taqdimnomalar kiritish borasida 1-chorak davomida amalga oshirilgan ishlar toʻgʻrisidagi masala yuzasidan hisobot berdi.

Hisobotda Oʻzbekiston Respublikasi Prezidentining Amudaryo tumanidagi Xalq qabulxonasiga Virtual va Xalq qabulxonalari orqali 2025-yil boshidan 31-mart sanasiga qadar jami 1 ming 106 ta masalalar boʻyicha murojaatlar kelib tushgani, ushbu murojaatlardan 900 tasi koʻrib chiqilgani, 682 tasi qanoatlantirilgani qayd qilindi. Hisobot davrida 381 ta murojaatlar huquqiy maʼlumot berish orqali hal qilingan boʻlsa, 24 ta murojaatlar uzoq muddatli nazoratga olingan, 194 ta murojaatlar egalariga esa tushuntirishlar berilgan. Ushbu murojaatlarning 3 tasi koʻrmasdan qoldirilgani, 5 tasi rad etilib, 16 tasi tugatilgani, qolgan 206 ta murojaatlar esa koʻrib chiqish jarayonida ekani taʼkidlandi.

Sessiya kun tartibidagi navbatdagi masala boʻyicha tuman suv yetkazib berish xizmati davlat muassasasi direktori Shukurlo Yusupov hisobot berib, isteʼmolchilar kesimida ekinlarni sugʻorish uchun suv olish limitlari boʻyicha deputatlarga maʼlumotlar berdi. Hisobotda keltirilishicha, 2025-yil vegetatsiya davrida tuman boʻyicha jami 38 ming 108 gektar ekin ekiladigan maydonda, shundan 16 ming gektar paxta, 5 ming 809 gektar kuzgi bugʻdoy va 9 ming 647 gektar boshqa ekinlar, 6 ming 652 gektar tomorqa yer maydonlarini sugʻorish rejalashtirilgan va shu maqsadda suv olish limitlari ishlab chiqilgan.

Sessiya kun tartibiga kiritilgan barcha masalalar atroflicha koʻrib chiqilib, muhokama qilindi va tegishli qarorlar qabul qilindi. Shu bilan tuman Kengashining 8-sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.