“Tashabbusli byudjet” mablagʻlari hisobidan 40-sonli maktab hududida zamonaviy sport maydonchasi qurilib, foydalanishga topshirildi

Yurtimizda soʻnggi yillarda fuqarolarning ijtimoiy hayotdagi ishtiroki va tashabbuslarini ragʻbatlantirish, mahalliy muammolarni hal etishga keng jamoatchilikni jalb etish maqsadida “Tashabbusli byudjet” mexanizmi joriy etildi. Mazkur tizim orqali aholi tomonidan bildirilgan takliflar ovoz berish orqali saralanib, eng munosiblari davlat byudjeti hisobidan moliyalashtirib kelinmoqda. Bu jarayon aholi talab va ehtiyojlarini hisobga olgan holda hududlardagi infratuzilmani yaxshilashga xizmat qilmoqda.

“Tashabbusli byudjet”ning 2024-yilgi mavsumi doirasida Amudaryo tumanidagi 40-sonli umumtaʼlim maktabi jamoasi tomonidan taqdim etilgan maktab hududida mini futbol maydoni barpo etishga doir loyiha gʻolib deb topilgan edi. Natijada mazkur ijtimoiy ahamiyatga molik loyihaga davlat byudjeti hisobidan 1 milliard 282 million soʻm mablagʻ yoʻnaltirildi.

Loyiha asosida zamonaviy mini futbol hamda voleybol va basketbol oʻyinlari uchun maydon qurildi. Qurilish ishlari “Mang‘it Invest Maksimum” masʼuliyati cheklangan jamiyati tomonidan yuqori sifatda va qisqa muddatda bajarildi. Sport inshootining yon va ustki qismi maxsus qoplamalar bilan taʼminlangani maydondan turli mavsumlarda ham samarali foydalanish imkonini yaratadi.

Joriy yilning 7-mart kuni mazkur maydonning ochilish marosimi tantanali ruhda oʻtkazildi. Tadbirda tuman taʼlim boʻlimi masʼullari, maktab pedagogika jamoasi, Yangiobod mahallasi “yettilik” aʼzolari, mahalliy faollar, yoshlar hamda jamoatchilik vakillari ishtirok etdi.

Tadbirda soʻzga chiqqanlar tomonidan “Tashabbusli byudjet” loyihasi aholining jamiyat hayotidagi ishtirokini taʼminlash, byudjet mablagʻlaridan samarali foydalanish va fuqarolar fikrini inobatga olish borasida muhim platformaga aylanayotgani taʼkidlandi. Shuningdek, bunday loyihalar joylardagi ijtimoiy-iqtisodiy sharoitlarni yaxshilashga, yosh avlodni sportga jalb etishga xizmat qilayotgani qayd etildi.

Bayramona tadbir davomida maktab oʻquvchilari tomonidan kontsert dasturlari, oʻrtoqlik uchrashuvlari tashkil etildi. Xususan, yuqori sinf oʻquvchilari oʻrtasida futbol va basketbol boʻyicha oʻyinlar oʻtkazildi.

Aytish lozimki, ushbu sport maydonining foydalanishga topshirilishi maktab oʻquvchilari hamda mahalliy yoshlar uchun zamonaviy sport bilan shugʻullanish imkoniyatini yaratib, ularning sogʻlom turmush tarziga rioya etishlari, jismoniy faolligi va musobaqalardagi ishtirokini kuchaytirishga turtki boʻladi.

Mazkur loyiha samarasida, ilgarilari mavjud boʻlmagan infratuzilma yaratilib, yoshlar uchun yangi imkoniyat eshiklari ochildi. Endilikda maktab jamoasi va faol oʻquvchilar ushbu maydondan unumli foydalangan holda sport yoʻnalishidagi salohiyatlarini namoyon etishlari mumkin.

Shohzod Qurbonboyev.