UYShINLIK TADBIRKOR MAHALLASIDA TIBBIY PUNKT QURILIShIGA HOMIYLIK QILADIGAN BOʻLDI
Xalqimizning oʻz hayotidan rozi yashashini taʼminlash, ayniqsa, ularga tibbiy xizmat koʻrsatishni yaxshilash, eng chekka hududlardagi aholini ham zamonaviy tibbiy xizmat bilan qamrab olish borasidagi saʼy-harakatlar tufayli mamlakatimizning barcha hududlarida, shu barobarida Amudaryo tumanida ham yangi-yangi tibbiyot muassasalari qad rostlab, aholining tibbiy xizmatga boʻlgan ehtiyoji qondirilishi uchun zarur sharoitlar yaratib berilayotgani quvonarli holat.
Uyshin mahallasi Amudaryo tumanining qardosh Turkmaniston Respublikasi bilan chegaradosh, olis va eng chekka hududida joylashgan. Mahalla aholisiga Qipchoq shaharcha fuqarolar yigʻini hududidagi 1-sonli oilaviy poliklinikasi tomonidan birlamchi tibbiy xizmat koʻrsatiladi. Mahalla bilan oilaviy poliklinika orasidagi masofa 8-9 chaqirim boʻlib, aholi muntazam ravishda avtotransport qatnovidagi muammolar tufayli tibbiy xizmatdan foydalanishda qiyinchiliklarga duch kelib kelayotgan edi. Chunki qishning qor-yomgʻirli, izgʻirinli kunlarida, yozning jazirama issigʻida transport vositasini kutish yoki yayov yoʻl bosib, poliklinikaga qatnash aholi, ayniqsa keksalarga qiyinchilik tugʻdirardi.
Mavjud qiyinchilikni bartaraf etish, aholining hech qanday toʻsiqlarsiz tibbiy xizmatdan samarali foydalanishlarini taʼminlash maqsadida Qoraqalpogʻiston Respublikasi Sogʻlikni saqlash Vazirligiga Uyshin mahallasi hududida mahalla tibbiy punktini tashkil etish orqali aholiga namunali tibbiy xizmat koʻrsatishni yaxshilash boʻyicha taklif bildirilgan va ushbu taklif inobatga olinib, uyshinliklar uchun mahalla tibbiy punkti binosi qurilishi rejalashtirilgan edi.
Yaqinda mana shu binoning tamal toshi qoʻyilib, qurilish ishlari boshlanishi munosabati bilan tadbir oʻtkazildi. Tadbirda Qoraqalpogʻiston Respublikasi Sogʻliqni saqlash vaziri Murad Qurbanov, Amudaryo tumani hokimi Sobir Xoʻjametov, tuman Tibbiyot birlashmasi bosh shifokori Faxriddin Abdullayev, mahalla fuqarolar yigʻinlari masʼullari va jamoatchilik vakillari ishtirok etishdi.
Xalqimizga xos boʻlgan saxovatpeshalik, elparvarlik xislatlari hamisha qadrlanadi. Qolaversa, haqiqiy saxovatpesha inson oʻz eli, Vatani uchun qilayotgan xayrli ishlarini hech qachon koʻz-koʻzlamaydi, maqtanmaydi. Yaqinda ism-sharifini oshkor etishni istamagan uyshinlik saxovatpesha, elparvar tadbirkor mahalla ahliga qulaylik yaratish maqsadida mahalla tibbiy punkti binosi qurilishiga homiylik qilish istagini bildirdi.
Mazkur bino qurilishi yakunlangach, uyshinliklar birlamchi tibbiy xizmatdan foydalanish uchun Qipchoq shaharchasi markazida joylashgan, 8-9 chaqirim masofa olisdagi oilaviy poliklinikaga qatnamaydigan boʻlishadi va Uyshin mahallasining oʻzida namunali birlamchi tibbiy xizmatlardan foydalana boshlaydilar.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
