Korruptsiyaga qarshi kurash yoʻnalishida amalga oshirilayotgan ishlar tahlil qilindi

Soʻnggi yillarda mamlakatimizda barcha sohalar qatori xalq taʼlimi tizimida ham shaffoflikni taʼminlash, davlat mablagʻlaridan maqsadli foydalanish va korruptsiyaning har qanday koʻrinishlariga chek qoʻyish boʻyicha izchil islohotlar amalga oshirilmoqda. Davlat siyosatining ustuvor yoʻnalishlaridan biriga aylangan mazkur vazifalar yuzasidan joylarda ham aniq chora-tadbirlar belgilanib, ularning ijrosi taʼminlanmoqda. Yaqinda Amudaryo tuman Maktabgacha va maktab taʼlimi boʻlimi binosida joriy yilning birinchi choragi davomida korruptsiyaga qarshi kurashish boʻyicha amalga oshirilgan ishlar tahliliga bagʻishlab oʻtkazilgan yigʻilish ham shu yoʻnalishdagi ishlarning amaliy ifodasi boʻldi.

Yigʻilishni boʻlim boshligʻi Yalgʻash Shomuratov kirish soʻzi bilan ochib, ishtirokchilarga korruptsiyaga qarshi kurashish borasidagi fikr-mulohazalarini bayon qildi. Taʼlim tizimida korruptsiyaviy harakatlarni aniqlash, ularga barham berish va oldini olish, kelib chiqishi mumkin boʻlgan sabab va shart-sharoitlarni bartaraf etishga qaratilgan huquqiy asoslar yaratilib, ichki idoraviy mexanizmlar joriy etilgani alohida qayd qilindi.

Korruptsiyaning oldini olish maqsadida davlat byudjetidan ajratilayotgan mablagʻlarni maqsadli sarflash, byudjet qonunchiligiga rioya qilish boʻyicha muntazam ravishda monitoring va nazorat ishlari amalga oshirilmoqda. Shu bilan birga, korruptsiyaga olib keluvchi shart-sharoitlar — huquqiy madaniyatning pastligi, ijro tizimining samarasizligi, iqtisodiy qiyinchiliklar kabi omillarni bartaraf etishga qaratilgan majmuaviy choralar koʻrilmoqda.

2025-yilning birinchi choragida tumandagi 86 ta umumtaʼlim maktabi, “Barkamol avlod” bolalar maktabi hamda 52 ta davlat maktabgacha taʼlim tashkilotlarida jami 147-marta korruptsiyaga qarshi targʻibot va tushuntirish tadbirlari oʻtkazildi. Unda “Korruptsiyaga qarshi kurashish toʻgʻrisida”gi hamda “Manfaatlar toʻqnashuvi toʻgʻrisida”gi qonunlar mazmun-mohiyati yuzasidan keng qamrovli axborotlar berildi.

Shuningdek, tuman Maktabgacha va maktab taʼlimi boʻlimi rahbariyati tashabbusi bilan barcha taʼlim muassasalari rahbarlari ishtirokida 3-marta maxsus seminarlar oʻtkazildi.

Korruptsiyaga qarshi kurashishning muhim yoʻnalishlaridan biri sifatida “Korruptsiyasiz soha” loyihasining amaliy ijrosini taʼminlashga qaratilgan “Yoʻl xaritasi” asosida joriy etilgan tizim doirasida 2025-yil uchun barcha xodimlardan deklaratsiyalar olindi.

Qoraqalpogʻiston Respublikasi Maktabgacha va maktab taʼlimi vazirligining 2025-yil 25-mart kungi tegishli xati ijrosi yuzasidan tizimdagi xodimlarning huquqiy savodxonligini oshirish, huquqiy madaniyatini shakllantirish hamda jamiyatda korruptsiyasiz muhit yaratish maqsadida taqdimot va qoʻllanmalar, videorolik hamda tarqatma materiallar barcha tizim tashkilotlariga yetkazildi. Shuningdek, boʻlimga tegishli taqdimot, videomateriallar va qoʻllanmalar ham yetkazilib, ulardan xizmat jarayonida samarali foydalanish xodimlarga tavsiya etildi.

Shu bilan birga, barcha muassasa rahbarlari korruptsiyaga qarshi kurashish yuzasidan vazirlikning kafolat xati va 16 ta lokal hujjat bilan yozma ravishda tanishtirildi va muntazam ravishda ogohlantirish tadbirlari olib borilmoqda.

Bugun taʼlim sohasini har qanday manfaat ustuvorligidan himoya qilish, haqqoniylik va adolat tamoyillarini qaror toptirishda tizimli yondashuv mavjud. Korruptsiyaga nisbatan murosasiz munosabatni shakllantirish, huquqiy madaniyatni yuksaltirish va shaffof muhitni yaratish – taʼlim sifatini oshirish hamda kelajak avlodni sogʻlom muhitda tarbiyalashning muhim shartidir.

G.Jumaniyazova, Amudaryo tumani Maktabgacha va maktab taʼlimi boʻlimi korruptsiyaga qarshi kurash boʻyicha masʼul xodimi.

Shohzod Qurbonboyev, jurnalist.