Amudaryolik tarbiyachi mamlakat miqyosida "Yilning eng fidokor tarbiyachisi" sifatida eʼtirof etildi

Yurtimizda taʼlim sohasini tubdan isloh etish, ayniqsa, maktabgacha taʼlim tizimini zamon talablari asosida takomillashtirish borasida izchil ishlar amalga oshirilmoqda. Chunki bolaning atrof-muhitni anglashi, bilim va koʻnikmalarni oʻzlashtirishi aynan shu davrdan boshlanadi. Shu bois, maktabgacha taʼlim muassasalarida taʼlim-tarbiya jarayoni samaradorligini oshirish, tarbiyachilarning bilim va mahoratini yuksaltirish, ularni ragʻbatlantirish dolzarb ahamiyat kasb etadi.

Shu maqsadda Maktabgacha va maktab taʼlimi vazirligi tashabbusi bilan 2019-yildan buyon anʼanaviy tarzda “Yilning eng yaxshi tarbiyachisi” kasbiy koʻrik-tanlov oʻtkazib kelinmoqda. Tanlov orqali pedagoglarning ilgʻor tajribasi ommalashtiriladi, ijodkorlik va yetakchilik qobiliyatlari eʼtirof etiladi. Shu bilan birga, bu tanlov soha vakillari oʻrtasida ijodiy muhit yaratish, sogʻlom raqobatni kuchaytirish hamda eng faol tarbiyachilarni ragʻbatlantirishga xizmat qiladi.

Joriy yilgi tanlovning saralash bosqichlari mart–aprel oylarida tashkil etilib, final bosqichi 24–25-aprel kunlari Toshkent shahridagi Abdulla Avloniy nomidagi pedagogik mahorat milliy institutida boʻlib oʻtdi. Respublika miqyosida oʻtkazilgan mazkur nufuzli tanlovda yurtimizning barcha hududlaridan yetuk mutaxassislar ishtirok etdi.

Ushbu tanlovda Amudaryo tumani 2-sonli davlat maktabgacha taʼlim tashkiloti tarbiyachisi Mavluda Kamolova “Yilning eng fidokor tarbiyachisi” nominatsiyasida munosib ishtirok etib, faxrli 3-oʻrinni qoʻlga kiritdi. Bu yutuq — uning uzoq yillik mehnati, yuksak masʼuliyat bilan amalga oshirayotgan pedagogik faoliyatining amaliy samarasidir. Tanlov ishtirokchilari pedagogik mahorat, bolalarga individual yondashuv, metodik yangiliklardan samarali foydalanish hamda tashabbuskorlik kabi muhim mezonlar asosida baholandi.

Mavluda Kamolovaning respublika miqyosidagi yutugʻi munosabati bilan tuman Maktabgacha va maktab taʼlimi boʻlimi tomonidan maxsus tadbir tashkil etildi. Unda boʻlim boshligʻi Yalgʻash Shomurotov, boʻlim metodisti Hulkar Babajanova, maktabgacha taʼlim tashkiloti direktori hamda tarbiyachilar ishtirok etdi. Tadbir davomida Mavluda Kamolova hamda uning ustozi – 2-sonli davlat maktabgacha taʼlim tashkiloti direktori Muhabbat Xudaybergenovaga boʻlim rahbariyati nomidan tashakkurnoma va qimmatbaho sovgʻalar topshirildi.

Tadbirda soʻzga chiqqanlar tomonidan Mavluda Kamolovaning mehnatsevarligi, tashabbuskorligi, doimiy izlanishda boʻlishi, bolalarga nisbatan mehribon va eʼtiborli munosabati eʼtirof etildi hamda kelgusidagi muvaffaqiyatlariga tilakdoshlik bildirildi. Shuningdek, uning bugungi yutugʻi nafaqat shaxsiy muvaffaqiyat, balki butun tuman maktabgacha taʼlim tizimi uchun faxr va ilhom manbai ekani taʼkidlandi.

Mavluda Kamolova 2017-yilda Nukus davlat pedagogika institutining bakalavriat bosqichini muvaffaqiyatli yakunlab, shu yilning oʻzida Amudaryo tumanidagi 2-sonli davlat maktabgacha taʼlim tashkilotida psixolog sifatida mehnat faoliyatini boshlagan. 2019-yildan buyon esa mazkur tashkilotda tarbiyachi sifatida ishlab kelmoqda. Uning tarbiyaviy uslubi, bolalarga boʻlgan mehri, ishga masʼuliyatli munosabati doim hamkasblari va rahbarlar tomonidan yuqori baholanadi.

Darhaqiqat, bunday yuqori eʼtirof va mukofotlar soha pedagoglarini yanada ruhlantiradi, yangi gʻoya va tashabbuslar bilan ishlashga undaydi. “Yilning eng yaxshi tarbiyachisi” kabi tanlovlar maktabgacha taʼlim tizimida ilgʻor tajribani ommalashtirish, ijodkorlik muhitini shakllantirish hamda kelajak avlod tarbiyasida zamonaviy yondashuvlarni tatbiq etishda muhim ahamiyat kasb etadi.

Shohzod Qurbonboyev.