Probatsiya nazoratidagi shaxslar bilan ochiq muloqot tashkil etildi

Yurt tinchligi va barqaror rivoji, avvalo, aholi oʻrtasida huquqbuzarlik va jinoyat sodir etilishining oldini olishga qaratilgan tizimli ishlar samarasiga bogʻliq. Mamlakatimizda jinoyatchilikning barvaqt oldini olish, jazo muddatini oʻtab qaytgan shaxslarni jamiyatga moslashtirish va ularni qayta jinoyat sodir etishdan saqlashga alohida eʼtibor qaratilmoqda. Ayniqsa, haftaning har payshanba kuni “Profilaktika kuni” sifatida belgilanib, shu kuni turli targʻibot va tushuntirish tadbirlari amalga oshirilmoqda.

Profilaktika kuni doirasida mahallalarda fuqarolar bilan ochiq muloqotlar, huquqiy savodxonlikni oshirishga qaratilgan seminarlar, turli profilaktik reydlar va ish oʻrinlarini yaratishga doir amaliy uchrashuvlar oʻtkazib kelinmoqda.

Yaqinda Amudaryo tumani Ichki ishlar boʻlimi majlislar zalida Probatsiya xizmati nazoratida turgan, jazo muddatini oʻtab qaytgan shaxslar ishtirokida ochiq muloqot tashkil etildi. Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, tuman prokurori, adliya maslahatchisi Bahrom Masharipov hamda tuman IIB boshligʻi, podpolkovnik Muhammadali Xojamuratov ishtirok etdi.

Uchrashuvda Prezidentimizning 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarori mazmun-mohiyati keng tushuntirildi. Qarorda belgilangan vazifalar ijrosi doirasida mahallalarda kriminogen vaziyatni bartaraf etish, probatsiyadagi shaxslarning ijtimoiy hayotga qaytishi uchun zarur shart-sharoitlar yaratish, ularni huquqiy yoʻnalishda qoʻllab-quvvatlash masalalari muhokama etildi.

Shuningdek, mahalla faollari, psixologlar va profilaktika inspektorlari oʻrtasida hamkorlikni mustahkamlash orqali har bir fuqaroning holati individual oʻrganilishi lozimligi taʼkidlandi.

Mutasaddi rahbarlar tomonidan qayd etilganidek, bugungi kunda probatsiyada turgan shaxslarga qayta hayotni boshlash, mehnat faoliyati bilan band boʻlish, taʼlim olish va tadbirkorlik bilan shugʻullanish uchun davlat tomonidan keng imkoniyatlar yaratib berilmoqda. Bu esa ularning jamiyatda oʻz oʻrniga ega boʻlishlariga zamin yaratadi.

Uchrashuv davomida probatsiyadagi shaxslar oʻz muammo va takliflari bilan murojaat qilishdi. Jumladan, ishga joylashish, kasb-hunar oʻrganish, ijtimoiy yordam olish masalalari yuzasidan bildirilgan har bir murojaat batafsil oʻrganilib, tegishli choralar belgilandi va ijobiy hal etiladigan boʻldi.

Albatta, bunday uchrashuvlar probatsiyadagi shaxslarga nafaqat huquqiy yordam, balki maʼnaviy qoʻllab-quvvatlash, ularni jamiyatda munosib oʻrin egallashiga xizmat qiladi. Inson shaʼni va qadr-qimmati yuksak qiymatga ega boʻlgan bugungi islohotlar davrida “Inson – jamiyat – davlat” tamoyili amalda oʻz ifodasini topmoqda. Shu boisdan, profilaktik tadbirlarning tizimli va taʼsirchan tashkil etilishi jamiyat xavfsizligi hamda fuqarolar manfaatlarini taʼminlashda muhim oʻrin tutadi.

Amudaryo tumani Ichki ishlar boʻlimi Jamoat xavfsizligi xizmati Probatsiya guruhi