Voyaga yetmaganlar oʻrtasida jinoyat va huquqbuzarliklarning oldini olishga qaratilgan ishlar kuchaytirilmoqda

Yaqinda voyaga yetmaganlar oʻrtasida jinoyat va huquqbuzarliklarning oldini olishga qaratilgan chora-tadbirlarning samaradorligini oshirish maqsadida Qoraqalpogʻiston Respublikasi ishchi guruhi Amudaryo tumaniga tashrif buyurdi.

Tashrif doirasida tuman hokimligi majlislar zalida ishchi guruh aʼzolari, tuman prokurori, tumandagi umumtaʼlim maktablari direktorlari, ularning maʼnaviy-maʼrifiy ishlar boʻyicha oʻrinbosarlari hamda tegishli tashkilotlar masʼullari ishtirokida targʻibot uchrashuvi tashkil etildi.

Uchrashuvda soʻzga chiqqan ishchi guruh vakillari tomonidan yoshlar oʻrtasida huquqbuzarliklarning oldini olish, ota-onalar hamda taʼlim muassasalari oʻrtasidagi hamkorlikni mustahkamlash, bolalar tarbiyasida maʼnaviy-axloqiy omillarni kuchaytirish masalalari yuzasidan fikr-mulohazalar bildirildi. Shuningdek, soha mutaxassislari tomonidan amalga oshirilayotgan chora-tadbirlar tahlil qilinib, mavjud ijobiy tajribalar bilan oʻrtoqlashildi.

Qayd etilganidek, tegishli chora-tadbirlarni tizimli va samarali tashkil etish maqsadida huquqni muhofaza qiluvchi organlar hamda masʼul tashkilotlar oʻrtasida hamkorlikka oid qoʻshma qaror imzolangan.

Mamlakatimizda voyaga yetmaganlar oʻrtasida nazoratsizlik va qarovsizlik holatlarining oldini olish, ularda huquqbuzarlik va jinoyatlarga nisbatan murosasiz munosabatni shakllantirishga qaratilgan bir qator manzilli ishlar amalga oshirilmoqda. Biroq tahlillar shuni koʻrsatmoqdaki, amalga oshirilayotgan profilaktik tadbirlarga qaramasdan, voyaga yetmaganlar tomonidan sodir etilayotgan jinoyatlarning keskin kamayishiga erishilmayapti.

Ayniqsa, jinoyat va huquqbuzarlikka moyilligi bor voyaga yetmaganlar bilan muntazam ish olib borish, ularni toʻgʻri hayot yoʻliga yoʻnaltirish, huquqbuzarliklarga olib kelayotgan shart-sharoitlarni bartaraf etish kabi choralar yetarlicha amalga oshirilmayotgani kuzatilmoqda.

Maʼlumotlarga koʻra, 2024-yil davomida Qoraqalpogʻiston Respublikasida voyaga yetmaganlar tomonidan turli jinoyatlar sodir etilgan. Jinoyat sodir etgan oʻsmirlarning aksar qismi umumtaʼlim maktablari oʻquvchilari boʻlib, qolganlari kasb-hunar taʼlim muassasalarida tahsil oluvchilar, uyushmagan yoshlar, bandligi taʼminlangan hamda boshqa hududlardan kelgan shaxslardir.

Oʻsmirlar asosan oʻgʻrilik, bezorilik, badanga shikast yetkazish, firibgarlik, transport vositalarini olib qochish kabi jinoyatlarni sodir etgan. Shuningdek, voyaga yetmaganlar ishtirokidagi ayrim holatlarda yoshlar oʻrtasidagi tarbiyaviy nazoratning yetarli emasligi ham koʻzga tashlanmoqda.

Jinoyatlarning koʻp qismi koʻcha va mahallalarda, ayrimlari esa xonadonlar, bozor va kompyuter oʻyinxonalari, kafe, restoranlar hamda taʼlim muassasalari hududlarida sodir etilgan.

Ushbu holatlar voyaga yetmaganlar oʻrtasida jinoyatchilikning oldini olishga qaratilgan qoʻshimcha chora-tadbirlarni belgilash zarurligini taqozo etmoqda. Bu borada ayniqsa “oila – mahalla – maktab” tizimi doirasidagi hamkorlik muhim ahamiyat kasb etmoqda.

Nukus shahar ichki ishlar organlari faoliyatini muvofiqlashtirish boshqarmasi va barcha tumanlardagi Ichki ishlar boʻlimlari profilaktika inspektorlari, tuman Ichki ishlar boʻlimi Jamoat xavfsizligi xizmati Huquqbuzarliklar profilaktikasi boʻlimi Voyaga yetmaganlar masalalari boʻyicha inspektor-psixologlari hamda taʼlim muassasalari rahbarlari oʻrtasidagi hamkorlik asosida jinoyat sodir etgan yoki huquqbuzarlikka moyilligi bor voyaga yetmaganlar doimiy roʻyxatga olinib, ular bilan individual profilaktik ishlar olib borilmoqda.

Ayniqsa, tungi vaqtlarda sodir etiladigan oʻgʻirlik va boshqa jinoyatlarning oldini olish maqsadida navbatdagi xizmatlar faoliyati kuchaytirilmoqda, tezkor vaziyatga qarab tungi naryadlar yoʻnalishlari oʻzgartirilmoqda.

Ichki ishlar organlari va taʼlim muassasalari hamkorligida “Davomat”, “Oʻquvchi”, “Tigʻ” va “Tungi reyd” kabi profilaktik tadbirlar muntazam oʻtkazilmoqda. Sababsiz dars qoldiruvchi, maktab nazoratidan chetda qolgan oʻquvchilar aniqlanib, oʻqishga qaytarish, davomatni yaxshilash, maktablarga noqonuniy jism va moddalar olib kirilishining oldini olish yuzasidan taʼsirchan choralar koʻrilmoqda.

Yigʻilishda voyaga yetmaganlar oʻrtasida jinoyatchilik va huquqbuzarliklarni kamaytirishga hissa qoʻshish nafaqat davlat va jamoat tashkilotlarining, balki har bir fuqaroning burchi ekanligi qayd qilindi.

Ogʻabek Erkuliyev, tuman prokurorining katta yordamchisi.