Oʻtgan oʻquv yilida ham yangi marralar zabt etildi

Yurt taraqqiyoti, avvalo, bilimli va maʼnaviy yetuk avlodni voyaga yetkazishga bogʻliq. Taʼlim sifati qaysi hududda yuqori boʻlsa, oʻsha joyning iqtisodiy, ijtimoiy va madaniy rivoji ham shunchalik barqaror boʻladi. Bugungi kunda mamlakatimiz taʼlim tizimida amalga oshirilayotgan islohotlar har bir hududda oʻz samarasini bermoqda. Amudaryo tumanida ham 2024–2025 oʻquv yilida qayd etilgan natijalar bunga yaqqol misol boʻla oladi.

Joriy oʻquv yilida tumanimizdagi umumtaʼlim maktablarini 3480 nafar oʻquvchi-yoshlar tamomlamoqdalar. Ularning 29 nafari oltin va 7 nafari kumush medallar sohib va sohibalari boʻlishdi. 24-may kuni tumanimizdagi barcha umumtaʼlim maktablarida “Ilm – eng buyuk sharaf!” shiori ostida “Soʻnggi qoʻngʻiroq” tadbirlarini oʻtkazildi. Tadbirlarda namunaviy xulqli va aʼlo baholarga oʻqigan iqtidorli oʻquvchilar ragʻbatlantirilib, ularning ota-onalariga “Minnatdorchilik xat”lari topshirildi.

Bu oʻquv yili ham yutuqlarga boy boʻldi. Jumladan, 40-sonli maktab jamoasi “Chet tillarini oʻqitish boʻyicha eng yaxshi maktab” tanlovining II bosqichida 2-oʻrinni egallab, 200 mln soʻm pul mukofotiga sazovor boʻldi. Bu muvaffaqiyatda ingliz tili fani oʻqituvchilari N.Jumaniyazov va S.Karimova katta hissa qoʻshdi.

“Qoraqalpogʻiston ustozi” tanlovida ham 40-sonli maktabning 6 nafar oʻqituvchisi respublika bosqichida 1-oʻrinni egallab, maktab nufuzini yanada yuksaltirishdi. Ayniqsa, matematika fani oʻqituvchisi Sherzod Ashirov va fizika fani oʻqituvchisi Sarvar Yaxshimov gʻoliblik bilan birga Turkiya davlatiga sayohat qilish imkoniyatini qoʻlga kiritdi.

36-sonli maktabning fizika fani oʻqituvchisi Xushnud Charshamov fizika fani oʻqituvchilari oʻrtasida oʻtkazilgan olimpiadaning Qoraqalpogʻiston Respublikasi bosqichida II oʻrin sohibi boʻldi. 30-sonli maktabning oliy toifali ingliz tili fani oʻqituvchisi Farida Shamsutdinova 8 ballik S1 darajadagi xalqaro sertifikatni qoʻlga kiritdi. Shuningdek, 40-sonli maktabning oʻzbek tili va adabiyoti fani oʻqituvchisi Iqboloy Yusupova “Yilning eng yaxshi oʻzbek tili fani oʻqituvchisi” koʻrik-tanlovining Qoraqalpogʻiston Respublikasi bosqichida I oʻrinni, Oʻzbekiston Respublikasi bosqichida esa III oʻrinni egalladi.

Joriy yil 2-may kuni oʻtkazilgan Qoraqalpoq davlat universiteti "Rektor kubogi" olimpiadasida 40-sonli maktabning 11-sinf oʻquvchisi Barchinoy Xudoybergenova fizika fanidan II oʻrinni, 36-sonli maktabning 11-sinf oʻquvchisi Alibek Bobojonov esa kimyo fanidan II oʻrinni qoʻlga kiritib, Qoraqalpoq davlat universitetiga muddatidan oldin talabalikka qabul qilindi. Barchinoy Xudoybergenova MAAB akademiyasidan 35 mln soʻmlik vaucherga ham ega boʻldi.

Olimpiadalardagi umumiy natijaga koʻra, Amudaryo tumani 8 ta sovrinli oʻrin bilan Qoraqalpogʻistondagi 17 ta tuman orasida, Toʻrtkoʻl, Nukus va Qoʻngʻirot tumanlaridan keyin, jamoaviy 4-oʻrinni egalladi.

Eʼtiborli yutuqlardan yana biri — Jasurbek Umarovning Garvard universitetiga toʻliq grant asosida (360 ming AQSh dollari) oʻqishga qabul qilinishi boʻldi. U 9-sinfgacha tumanimizdagi 32-sonli maktabda oʻqigan, keyin esa Toshkent shahridagi “Sodiq School”da oʻqishini davom ettirgan.

Shuningdek, 148 nafar oʻquvchi ingliz tili fanidan V2 darajadagi milliy va xalqaro sertifikatni qoʻlga kiritdi. Jumladan, 15-sonli maktabning 10-sinf oʻquvchisi Eleonora Erkaboyeva, 32-sonli maktabning 11-sinf oʻquvchisi Mirjamol Sultamuratov, 40-sonli maktabning 10-sinf oʻquvchilari Umidaxon Xudoybergenova, Ozoda Nurullayeva, Ogʻabek Joʻrayev, 56-sonli maktabning 9-sinf oʻquvchisi Neʼmatjon Madrahimov, 10-sinf oʻquvchisi Farida Tursunboyeva, 76-sonli maktabning 10-sinf oʻquvchisi Shohrux Baxtiyorov, 11-sinf oʻquvchisi Azimjon Bekporatovlar 6,5 – 7,5 ballik milliy va xalqaro darajadagi S1 sertifikatini qoʻlga kiritdilar.

Taʼlim tizimidagi yangilanishlar va loyihalar yosh avlodning salohiyatini rivojlantirishda muhim ahamiyatga ega. 40-sonli maktabda “Doʻstlik maktablari” loyihasi doirasida oʻtkazilgan festivalda ham tumanimiz maktablarida yaratilgan sharoitlar, taʼlim jarayoni va oʻquvchilar yutuqlari namoyish etildi. 15-sonli maktabda esa xalqaro PISA 2025 baholash tadqiqoti oʻtkazilib, tumanimizning 15 yoshli oʻquvchilari ham ushbu sinovda ishtirok etdi. Mazkur tadqiqot Qoraqalpogʻiston Respublikasi boʻyicha 730 ta maktab orasidan qurʼa tashlash yoʻli bilan tanlab olingan 11 ta maktabda oʻtkazildi.

Tahlillar shuni koʻrsatadiki, 22-, 36- va 40-sonli maktablar taʼlim, ijtimoiy faollik va ijodiy salohiyatda peshqadamlar sirasida. Ayniqsa, 40-sonli maktab jamoasining yutuqlari alohida eʼtirofga loyiq.

Tuman maktablarida oʻtkazilgan koʻrgazma, debat, tanlov va olimpiadalar taʼlim jarayonini yanada boyitib, oʻquvchilarda ijodiy fikrlash, jamoaviylik, milliy qadriyatlarga hurmat tuygʻusini shakllantirdi.

Shuni alohida taʼkidlash joizki, 2024–2025 oʻquv yili Amudaryo tumani Maktabgacha va maktab taʼlimi boʻlimi uchun mazmunli va muvaffaqiyatli yil boʻldi. Bu yutuqlarda fidoyi ustozlar, bilimga chanqoq oʻquvchilar, mehribon ota-onalar va jamoatchilikning hamjihatlikdagi saʼy-harakatlari mujassam.

Mamlakatimizda yaratilayotgan taʼlim muhiti – ertangi barkamol, raqobatbardosh va yurt ravnaqiga munosib hissa qoʻshuvchi avlod uchun mustahkam poydevordir.

Yalgʻash Shomurodov, tuman Maktabgacha va maktab taʼlimi boʻlimi boshligʻi.