9-sonli Bolalar musiqa va sanʼat maktabida oʻquv yili yakuniga bagʻishlangan tadbir boʻlib oʻtdi

Amudaryo tumanidagi 9-sonli Bolalar musiqa va sanʼat maktabida 2024–2025 oʻquv yili yakuniga bagʻishlangan hisobot kontserti hamda tasviriy va amaliy sanʼat yoʻnalishida oʻquvchilar ijodidan tashkil etilgan koʻrgazma boʻlib oʻtdi. Tadbir yil davomida erishilgan yutuqlarni keng jamoatchilik eʼtiboriga havola etish, shuningdek, yosh ijodkorlar iqtidorini ota-onalar va ustozlar oldida namoyon etish imkonini berdi.

Mazkur musiqa va sanʼat maktabi tumandagi yosh avlodga musiqa va sanʼat sohalari boʻyicha bilim berish, ularni ijodiy muhitga jalb etish borasida samarali faoliyat olib bormoqda. Joriy oʻquv yilida maktabda jami 200 nafar oʻquvchi 11 ta yoʻnalish boʻyicha taʼlim oldi. Ularning 150 nafari musiqa, 50 nafari esa tasviriy sanʼat yoʻnalishlarida bilimlarni oʻzlashtirdi.

Maktabda darslar tajribali ustozlar tomonidan olib boriladi. Taʼlim jarayonlariga zamonaviy metodlar, interaktiv mashgʻulotlar va individual yondashuvlar joriy qilingan. Bundan tashqari, oʻquvchilarning ijodiy salohiyatini namoyon etish maqsadida har xil kontsertlar, koʻrgazmalar va tanlovlarda ishtirok etishlari taʼminlab kelinmoqda.

Yil davomida bolalar cholgʻu asboblarini chalish, kuylash, raqs, rassomlik, haykaltaroshlik va sahna sanʼati sirlarini oʻrganib, hisobot kontsert va koʻrgazmada oʻz bilimlarini namoyon etdilar. Tadbir maktabda olib borilayotgan taʼlim-tarbiya jarayonining amaliy natijasi sifatida ishtirokchilar va mehmonlarda katta taassurot qoldirdi.

Ayniqsa, tadbirga kelishgan ota-onalar farzandlarining ijodiy yuksalishiga guvoh boʻlib, ularning qobiliyati va ijodiy bilimlaridan faxrlanishdi. Bunday tadbirlar orqali oila va maktab oʻrtasidagi hamkorlik mustahkamlanmoqda. Bu esa bolalarning yanada masʼuliyatli va shijoatli boʻlishiga ijobiy taʼsir koʻrsatadi.

Musiqa va sanʼat taʼlimi bolalarning estetik didi, his-tuygʻusi va fikrlash qobiliyatini rivojlantirib, ularning ichki dunyosini boyitadi, maʼnaviy kamolotiga xizmat qiladi, zehn va qalb uygʻunligini taʼminlaydi. Maktabda fortepiano, skripka, violonchel, dutor, rubob, gʻijjak, doira kabi cholgʻu asboblari, shuningdek, vokal va xor kabi musiqa yoʻnalishlari boʻyicha darslar tashkil etilgan.

Tasviriy sanʼat yoʻnalishida esa oʻquvchilar qalam, boʻyoq va grafik chizmachilik, haykaltaroshlik hamda amaliy va grafik dizayn asoslarini oʻzlashtirdilar. Sahna sanʼati boʻyicha ham aktyorlik mahorati, drama, milliy va zamonaviy raqs turlari, balet, sahnaviy nutq kabi darslar oʻqitildi. Bu kabi imkoniyatlar bolalarning ijodiy imkoniyatlarini shakllantirishda muhim ahamiyat kasb etadi.

Hisobot kontsert dasturida xoreografiya, bayan-akkordeon, torli-kamonli va nafasli cholgʻu asboblari, anʼanaviy ijro va estrada yoʻnalishlarida taʼlim olgan oʻquvchilar kuy-qoʻshiq va raqslar orqali tomoshabinlarga xush kayfiyat ulashdilar.

Kontsert dasturida oʻzbek va qoraqalpoq xalq bastakorlari asarlari bilan bir qatorda jahon musiqa asarlari ham ustoz-shogird hamkorligida ansambl tarzida ijro etildi.

Kontsert yakunida maktab direktori Toʻliboy Xaytboyev soʻzga chiqib, farzandlarini qoʻllab-quvvatlayotgan ota-onalarga minnatdorlik bildirdi. Shu bilan birga, yil davomida samarali mehnat qilgan va har bir oʻquvchining ijodiy oʻsishiga hissa qoʻshgan ustozlarga chuqur tashakkur izhor etdi.

Maktab direktori tomonidan oʻquvchilarning kontsert dasturidagi chiqishlari yuksak baholandi va bu yutuqlar ularning sanʼatga boʻlgan ishtiyoqi hamda ustozlarning mehnati samarasi ekani taʼkidlandi.

Tadbir davomida “Mumtoz navolar”, “Ustoz izidan”, “Milliy raqs jilosi” nomli sinf kontsertlarida hamda maktab miqyosida oʻtkazilgan boshqa ijodiy loyihalarda faol ishtirok etgan oʻquvchilar maktab maʼmuriyati tomonidan faxriy yorliq va esdalik sovgʻalari bilan taqdirlandilar.

Shuningdek, respublika miqyosida tashkil etilgan “Xalq cholgʻulari va anʼanaviy cholgʻu” hamda “Estrada cholgʻu ijrochiligi” tanlovlarida gʻolib boʻlgan oʻquvchilar va ularning mutaxassis oʻqituvchilari “Tashakkurnoma” va esdalik sovgʻalari bilan taqdirlandi.

9-sonli Bolalar musiqa va sanʼat maktabida oʻtkazilgan hisobot kontserti va koʻrgazma — yosh avlodning maʼnaviy, estetik va ijodiy rivojlanishida muhim ahamiyatga ega boʻlgan tadbir boʻldi. Tadbir nafaqat jamoaning oʻquv yili yakunidagi hisoboti boʻldi, balki bolalarning isteʼdodi, mehnati va muvaffaqiyatini keng jamoatchilikka namoyon etdi.

Shohzod Qurbonboyev