Kutubxona — sokinlik makoni

Har bir insonning qalbiga yaqin, oʻzgacha xotirjamlik bagʻishlaydigan, ilhom oladigan joyi boʻladi. Kimdir tabiat qoʻynidagi dam olish maskanini yoqtirsa, yana kimdir yolgʻiz qolib vaqt oʻtkazishni afzal biladi. Mening esa eng sevimli joyim – bu kutubxona. U yerga kirganimda, qalbimda taskin, maʼnaviy yuksalish va bilimga chanqoqlik tuygʻulari uygʻonadi.

Mahallamizdagi kutubxona katta emas, ammo u oʻzining mazmunan boy kitob fondi, shinam va maftunkor muhiti bilan qalbimdan alohida oʻrin olgan. Bu yerda adabiyot, tarix, falsafa, tabiiy fanlar, psixologiya va bolalar uchun moʻljallangan asarlardan tortib, zamonaviy mualliflar qalamiga mansub romanlar, esselargacha mavjud. Javonlar orasida yurar ekanman, goʻyo butun bir maʼnaviy olamni aylanib chiqqandek boʻlaman. Kitoblarning sirli dunyosida sayr qilish insonni nafaqat bilim bilan boyitadi, balki hayoti, his-tuygʻulari, maqsadlari haqida oʻylashga, oʻzini anglashga chorlaydi.

Kutubxonadagi osoyishtalik — uning eng goʻzal jihatlaridan biri. Har bir sahifaning “shivirlashi”, pichir-pichir tovushlar, yumshoq qadamlar, ehtiyotkor harakatlar – bularning barchasi bu joyga xos tinch muhitni yaratadi. Oʻqish uchun ajratilgan stollar yonida oʻtirib, sekinlik bilan kitob varaqlash, uning har bir satridan ilhom olish men uchun chinakam ruhiy ozuqa hisoblanadi. Ayniqsa, qish faslida, tashqarida yomgʻir yogʻib turgan bir paytda issiq va yorugʻ xonalarda, kitoblar bagʻrida oʻtirish — beqiyos baxt!

Kutubxona men uchun faqat oʻqish joyi emas, balki u ruhiy tarbiya maktabi, fikrlashni oʻrgatuvchi, tasavvurni kengaytiruvchi, kelajak haqidagi orzularim qanot bogʻlaydigan maskandir. U har gal menga yangi sahifalarni ochadi — yangi gʻoyalar, yangi qahramonlar, hayot haqiqatlari bilan tanishtiradi. Kutubxonada oʻqilgan har bir kitob menga hayot haqidagi tushunchamni kengaytirdi, dunyoqarashimni boyitdi.

Men uchun kutubxona — bu shunchaki bino yoki kitoblar toʻplami emas. U — qalbimning sokinligi, ruhimning ozuqa manbai, bilim yoʻlidagi sodiq yoʻldoshimdir. U yerda men jimlik bagʻrida oʻzimni topaman, xayol qilaman, katta orzular sari uchaman. Shu bois, men kutubxonani sevib qadrlayman.

Dildora Urinova, OʻzDJTU Xalqaro jurnalistika fakulteti talabasi.