"MENING BIRINChI KUTUBXONAM" LOYIHASI BOLALARNI ERTA YoShDAN KITOBXONLIKKA QIZIQTIRIShGA XIZMAT QILADI

Oʻzbekiston “Milliy tiklanish” demokratik partiyasi Markaziy Kengashi tashabbusi bilan Qoraqalpogʻiston Respublikasi Amudaryo tumanidagi 40-sonli maktabgacha taʼlim tashkilotida “Bolangiz bilan kitob oʻqing” aktsiyasi doirasida “Mening birinchi kutubxonam” loyihasi amalga oshirildi.

Shu munosabat bilan tashkil qilingan tadbirda Oʻzbekiston “Milliy tiklanish” demokratik partiyasi Markaziy Kengashi raisi oʻrinbosari Firuza Muhamedjanova ishtirok etib, bunday loyihalarning yosh avlod tarbiyasidagi ahamiyati xususida alohida toʻxtalib oʻtdi. U kitob oʻqish bolaning fikrlash qobiliyatini oʻstirish, nutqini rivojlantirish va maʼnaviy olamini boyitishda muhim ahamiyatga ega ekanligini qayd etdi. Tadbir doirasida bolalarga moʻljallangan eng sara adabiyotlardan iborat kitob javoni muassasaga sovgʻa qilindi.

Tadqiqotlarga koʻra, har kuni 15 daqiqa davomida kitob oʻqish bolaning til rivoji, miyaning ish qobiliyati va maktabga tayyorgarlikda sezilarli natija beradi. Shu bois dunyoda eng koʻp kitob oʻqiydigan xalqlar yashovchi davlatlarda yosh avlodni kitobga qiziqtirishning dastlabki davri, yaʼni kitob bilan tanishtirish davri bola tugʻilganidan boshlab 3 yoshgacha etib belgilangan. Oʻzbekistonda esa bolalarni kitobga qiziqtirish davri 3 yoshdan boshlanadi.

Loyihaning asosiy maqsadlari milliy kontentni rivojlantirishda bolalar kitobxonligini qoʻllab-quvvatlashga ustuvor ahamiyat qaratish, bolalarning murgʻak yoshidan boshlab ota-onalari bilan birgalikda kitob oʻqishini aholi oʻrtasida ommalashtirish, bolalar uchun moʻljallangan adabiyotlarni chop etayotgan nashriyotlarni moddiy va maʼnaviy ragʻbatlantirish hamda oilaviy mutolaa anʼanasini tiklash va rivojlantirishdir. Kitobxon yoshlar safini kengaytirish orqali esa bolalarning dunyoqarashi, maʼnaviyati va intellektual salohiyatini oshirishga hissa qoʻshish koʻzda tutilgan.

Tadbir doirasida ota-onalar hamda tarbiyachilar uchun “Mahorat darslari” oʻtkazilib, bolalar uchun kitob tanlash hamda ularni oʻqib berishda nimalarga eʼtibor qaratish kerakligiga oid maslahatlar berildi. Muassasa tarbiyalanuvchilari va ularning ota-onalari uchun bir qator madaniy-maʼrifiy dasturlar tashkil etildi. Bolalar uchun ertak oʻqib berish mashgʻulotlari va kitoblar koʻrgazmasi shular jumlasidandir. Bolalar oʻzlarining eng sevimli kitoblari haqida hikoyalar soʻzlab, kitob mutolaasining foydasi haqida ota-onalari bilan fikr almashish imkoniyatiga ega boʻldilar.

Loyihadan bolalarni, ularning ota-onalarni mamlakatimizda chop etilayotgan adabiyotlar bilan yaqindan tanishtirish, maktabgacha taʼlim tashkilotlarida oʻzbek va jahon adabiyotiga mansub bolalar uchun moʻljallangan kitob javonlarini tashkil qilish hamda bu tashabbusni umummilliy harakatga aylantirish, bolalar adabiyoti targʻibotiga koʻmaklashish va eng muhimi, har bir xonadonda oilaviy kutubxonalarni tashkil etish kabi ulugʻvor maqsadlar koʻzlangan.

Mazkur loyiha boshqa tumanlarda ham davom ettirilishi rejalashtirilgan boʻlib, bu oʻz navbatida yosh avlod tarbiyasida kitobning oʻrnini yanada mustahkamlashiga xizmat qiladi.