Prezident qarori bilan tadbirkor xotin-qizlar safi yanada kengayadi

Mamlakatimizda xotin-qizlarning jamiyatdagi faol ishtirokini taʼminlash, tadbirkorlik salohiyatini roʻyobga chiqarish, kasb-hunar oʻrganishi va oliy taʼlim bilan qamrab olishini ragʻbatlantirish maqsadida tizimli va maqsadli chora-tadbirlar amalga oshirilmoqda. Ayniqsa, soʻnggi yillarda ayollar manfaatiga qaratilgan islohotlar va qarorlar ularning jamiyatdagi oʻrnini yanada mustahkamlashga xizmat qilmoqda.

Shu maʼnoda, Prezidentimizning 2025-yil 7-martdagi “Oila va xotin-qizlarni qoʻllab-quvvatlash tizimini yanada takomillashtirish chora-tadbirlari toʻgʻrisida”gi Qarori ayollar hayotida sifat jihatdan yangi bosqichni boshlab berdi. Mazkur qaror bilan xotin-qizlarning ijtimoiy-iqtisodiy faolligini oshirishga qaratilgan aniq vazifalar, maqsad va mexanizmlar belgilab berildi.

Qarorga muvofiq, 2025-yilda 2 million nafar xotin-qizning bandligini taʼminlash, 250 ming nafarini kasb-hunar va tadbirkorlikka oʻqitish, yana shuncha xotin-qizni oliy taʼlimga qamrab olish, 50 ming nafar ehtiyojmand xotin-qizni sanatoriylarda sogʻlomlashtirish va tadbirkorlik koʻnikmalariga ega qilish boʻyicha motivatsion seminarlar tashkil etish belgilandi.

Ayollarni tadbirkorlikka jalb qilish va yangi imkoniyatlar yaratish maqsadida 2025-yil 1-may kunidan “HAMROH” dasturi doirasida “yashil loyihalar” va IT sohasidagi tashabbuslarni amalga oshirishga grantlar ajratish yoʻlga qoʻyildi. Jumladan, kamida 5 nafar xotin-qizning tadbirkorligini yoʻlga qoʻyishga koʻmaklashgan “ustoz” tadbirkorlarga 50 million soʻmgacha grant ajratiladi. Shuningdek, ijobiy kredit tarixiga ega boʻlgan xotin-qizlarga 100 million soʻmgacha garovsiz kredit berish tizimi joriy etildi.

Bundan tashqari, “Xalq banki” va Savdo-sanoat palatasi hamkorligida 2025-yil 1-iyulga qadar “Tadbirkor ayollar” platformasi ishga tushirilishi belgilangan. Bu platforma orqali xomashyo xarid qilish, mahsulotni bozorga chiqarish, mutaxassis topish va muammolarni hal etish imkoniyatlari yaratiladi. Platforma tijorat banklari, davlat organlari va manfaatdor tashkilotlar oʻrtasidagi axborot almashinuvini ham taʼminlaydi.

Shuningdek, 2025-yil 1-maydan boshlab Savdo-sanoat palatasi “Hamkor tadbirkor” dasturini amalga oshiradi. Dastur orqali oʻz biznesini boshlamoqchi boʻlgan xotin-qizlarga zarur koʻnikmalar beriladi, kooperatsiya asosida faoliyatni yoʻlga qoʻyish va elektron platformalarda mahsulot sotishga koʻmaklashiladi.

Tadbirkorlikni rivojlantirishda bosqichma-bosqich yondashuv ham yoʻlga qoʻyilgan. “Biznesga ilk qadam” bosqichida tashabbuskor xotin-qizlar aniqlanib, tadbirkorlikka oʻqitiladi. Keyingi bosqichlarda esa ularning kichik biznes loyihalariga koʻmaklashiladi, moliyalashtirish, bozorga chiqish, biznes-reja tuzish boʻyicha koʻnikmalar beriladi hamda aylanma mablagʻni 100 milliard soʻmgacha oshirish koʻzda tutilgan.

Amudaryo tumanida ham mazkur qaror ijrosini taʼminlash maqsadida Oila va xotin-qizlar boʻlimi, mahalla faollari va tegishli tashkilotlar bilan hamkorlikda bir qator amaliy chora-tadbirlar olib borilmoqda. Belgilangan vazifalarning oʻz vaqtida va samarali bajarilishi tuman prokuraturasi tomonidan qatʼiy nazoratga olingan.

Tumanda bajarilayotgan ishlarga nazar tashlasak, Durunki mahallasida yashovchi Sevara Xudoyberganova “Ayollar daftari”ning II toifasiga — tadbirkorlik qilish istagida boʻlgan ehtiyojmand xotin-qizlar qatoriga kiritilib, 30 million soʻmlik kredit mablagʻi asosida oʻz tomorqasida issiqxona faoliyatini yoʻlga qoʻydi va shu orqali oʻzini oʻzi band qildi.

Shuningdek, Olmazor mahallasidan Dildora Matsapayeva ham yuqoridagi qaror asosida 30 million soʻm kredit olib, tikuvchilik faoliyatini boshladi. Ushbu mahallada yashovchi Muqaddas Ibodullayeva esa 50 million soʻm kredit evaziga issiqxona tashkil etgan holda, oʻz tomorqasidan samarali foydalanib, daromad manbaini yaratdi.

Taʼkidlash joizki, yuqoridagi qaror bilan belgilangan vazifalar joriy yilda ayollarning jamiyatdagi oʻrnini mustahkamlash, iqtisodiy va ijtimoiy faolligini oshirish, tadbirkorlik faoliyatini rivojlantirishni yangi bosqichga olib chiqadi. Bunda davlat va nodavlat tuzilmalarning birgalikdagi harakatlari, zamonaviy moliyaviy yechimlar, taʼlim va psixologik qoʻllab-quvvatlash kabi omillar ayollarning faol hayotga yanada kengroq jalb etilishiga zamin yaratadi. Bu yoʻlda amalga oshirilayotgan ishlar xotin-qizlar faolligini yanada oshirishga xizmat qiladi.

Shohzod Qurbonboyev