Prezident qarori ijrosi tuman prokuraturasi nazoratida

Maʼlumki, Oʻzbekiston Respublikasi Prezidentining 2025-yil 1-apreldagi PQ-133-sonli Qarori bilan “Atrof-muhitni asrash va “yashil iqtisodiyot” yilida energiya resurslaridan noqonuniy foydalanish hamda behuda sarflanishining oldini olish, iqtisodiyot tarmoqlarida, davlat idoralari, ijtimoiy soha obʼektlari hamda aholi xonadonlarida energiya tejamkorligi va samaradorligini yanada oshirish yuzasidan aniq maqsad va vazifalar belgilab berilgan edi.

Mazkur qaror ijrosini taʼminlash maqsadida Amudaryo tuman prokuraturasi tomonidan joylardagi holat oʻrganilib, bir qator amaliy chora-tadbirlar tashkil etilmoqda.

Jumladan, “Hududgaz Qoraqalpogʻiston” aktsiyadorlik jamiyatiga qarashli “Amudaryo tumangaz” gaz taʼminoti boʻlimi bilan hamkorlikda “Chordara” mahalla fuqarolar yigʻini hududidagi diametri 159 mm boʻlgan gaz quvurida aniqlangan tabiiy gaz sizib chiqish holati zudlik bilan bartaraf etildi. Shuningdek, “Oybek” MFY hududidagi diametri 114 mm boʻlgan gaz quvurida ham taʼmirlash ishlari olib borildi.

Bundan tashqari, “Hududgaz Qoraqalpogʻiston” gaz taʼminoti filialiga tegishli maxsus texnika bilan jihozlangan mobil laboratoriya yordamida tuman hududidagi 25,6 km uzunlikdagi yer osti gaz quvurlari koʻzdan kechirildi. Natijada 5 ta gaz sizib chiqish holatlari aniqlanib, bartaraf qilinishi taʼminlandi.

Elektr energiyasi sohasida ham yoʻqotishlarni kamaytirish, energiya tejamkorligini oshirish borasida tizimli ishlar olib borilmoqda. Jumladan, “Hududiy elektr tarmoqlari” AJga qarashli Amudaryo tuman elektr taʼminoti korxonasi xodimlari tomonidan “Oybek” MFY hududida joylashgan 172-sonli transformator punktida joriy taʼmirlash ishlari olib borildi. Shuningdek, mazkur hududdagi 6 ta eskirgan yogʻoch tayanch ustunlari yangilanib, mustahkam beton ustunlarga almashtirildi.

Prezident qarori ijrosi doirasida qayta tiklanadigan energiya manbalariga oʻtish borasida ham amaliy tadbirlar koʻrilmoqda. Jumladan, “Jayhun mobile gaz” MChJ va “Mangʻit metan gaz” MChJga qarashli avtomobillarga gaz quyish shoxobchalariga 50 kVt quvvatga ega quyosh panellari oʻrnatildi. Shuningdek, “Nukus Dilisha” MChJga qarashli un ishlab chiqarish korxonasi ham 50 kVtlik quyosh panellari joylashtirilishi orqali qayta tiklanuvchi energiya manbalaridan samarali foydalanishga erishilmoqda.

Qaror ijrosini samarali taʼminlash maqsadida tuman prokuraturasi rahbarligida idoralararo ishchi guruhi yigʻilishi oʻtkazildi. Unda ishchi guruh rahbari, tuman prokurori B. Masharipov tomonidan ishlarni yanada jadallashtirish, energiya resurslaridan noqonuniy foydalanish holatlarini oldini olish, monitoring va nazorat ishlarini kuchaytirish yuzasidan mutasaddi idoralarga aniq koʻrsatmalar berildi.

Mazkur ishlar nafaqat qaror ijrosining taʼminlanishi, balki jamiyatda ekologik madaniyatni shakllantirish, resurslardan oqilona foydalanishni yoʻlga qoʻyish va kelajak avlod uchun sogʻlom va barqaror muhit yaratishga xizmat qiladi.

Sh. Joldasov, Amudaryo tuman prokurorining katta yordamchisi.