Mahallada sodir etilgan ogʻir jinoyat muhokama qilindi

Soʻnggi yillarda mamlakatimizda tinchlik va osoyishtalikni taʼminlash hamda huquqbuzarliklarning oldini olishga qaratilgan yangi mexanizmlar joriy etildi. Shu maqsadda ijtimoiy-maishiy muammolarni bartaraf etishga qaratilgan profilaktik tadbirlar ham samarali amalga oshirib kelinmoqda. Afsuski, olib borilayotgan ishlarga qaramay, jamiyatda jinoyatchilik holatlari kuzatilib turibdi.

Qoraqalpogʻiston Respublikasi Ichki ishlar vaziri, polkovnik Baxtiyar Torebekov raisligida Amudaryo tumanining Tor yop mahallasi hududidagi 21-sonli umumtaʼlim maktabi faollar zalida jinoyatchilikning oldini olish va jamoat xavfsizligini taʼminlash masalalari yuzasidan muhokama yigʻilishi oʻtkazildi.

Unda tuman Ichki ishlar boʻlimi boshligʻi Muxammetali Xoʻjamuratov, Oʻzbekiston Mahallalar uyushmasi tuman boʻlimi boshligʻi Alisher Yuldashev, profilaktika inspektorlari, “Mahalla yettiligi” aʼzolari hamda aholi vakillari ishtirok etdi.

Yigʻilishda joriy yil 20-iyun kuni Tor yop mahallasi hududida sodir etilgan oilaviy nizo oqibatida yuz bergan jinoyat muhokama markazida boʻldi. Dastlabki maʼlumotlarga koʻra, Zaxmatkash koʻchasida yashovchi 1978-yilda tugʻilgan fuqaro uyidagi oʻgʻay ukasi tomonidan tan jarohati yetkazilib, ogʻir holatda tuman tibbiyot birlashmasining jonlantirish boʻlimiga olib kelingan va shoshilinch jarrohlik amaliyoti oʻtkazilgan.

Tergovga qadar oʻtkazilgan tekshiruvlar davomida, voqea kuni kechki payt uy ishlari bilan bogʻliq kelishmovchilik tufayli jabrlanuvchi va uning oʻgay ukasi — 2003-yilda tugʻilgan yigit oʻrtasida janjal kelib chiqqanligi maʼlum boʻlgan. Janjal chogʻida gumonlanuvchi tovuqxona devoriga suyab qoʻyilgan belni olib, jabrlanuvchining ortidan borgan va kesuvchi temir qismi bilan jabrlanuvchining boshining ensa sohasiga zarba bergan. Jabrlanuvchi yerga yiqilgandan soʻng, gumonlanuvchi uning boshining ensa va yuz qismlariga yana bir necha marta urgan. Oqibatda belning temir qismi yogʻoch dastasidan ajralib tushgan va gumonlanuvchi harakatini toʻxtatgan.

Hushini yoʻqotgan jabrlanuvchini koʻrib qolgan oʻgay onasi tez tibbiy yordam xizmatiga qoʻngʻiroq qilgan va jabrlanuvchi shifoxonaga yetkazilgan. Mazkur holat yuzasidan Amudaryo tumani prokuraturasi tomonidan Oʻzbekiston Respublikasi Jinoyat kodeksining tegishli moddalariga asosan jinoyat ishi qoʻzgʻatildi.

Gumonlanuvchining koʻrsatmasida qayd etilishicha, oʻsha kuni parrandalar qoʻrasining eshigi yopilmay qolgani tufayli u va oʻgay opasi oʻrtasida ogʻzaki tortishuv yuzaga kelgan. Unga koʻra, janjal chogʻida opasi uni haqorat qilgan va u oʻzini tutib turolmasdan, bel bilan uning bosh qismiga bir necha marta zarba bergan.

Yigʻilish yakunida masʼullar tomonidan jamiyatda tinchlik va osoyishtalikni taʼminlash, jinoyatchilikning oldini olishda fuqarolarning faol ishtiroki muhim ahamiyatga ega ekanligi taʼkidlandi. Ayniqsa, oilaviy nizolarni barvaqt bartaraf etish, mahalladoshlar va profilaktika inspektorlari oʻrtasidagi hamkorlikni mustahkamlash zarurligiga eʼtibor qaratildi.

Shuningdek, yoshlar oʻrtasida huquqbuzarliklarning oldini olishga qaratilgan targʻibot-tashviqot ishlarini yanada kuchaytirish, jinoyatchilikka nisbatan murosasiz munosabatda boʻlish jamiyat xavfsizligining muhim kafolati ekani alohida qayd etildi. Darhaqiqat, huquqbuzarliklarga qarshi kurashishda har bir fuqaroning javobgarligi va faolligi hal qiluvchi oʻrin tutadi. Shunday ekan, jamiyatda tinchlik va xotirjamlikni taʼminlashga har birimiz hissa qoʻshishimiz lozim.

Shohzod Qurbonboyev tayyorladi.