Joriy yil 49-sonli DMTTni 38 nafar tarbiyalanuvchi tamomladi

Mamlakatimizda maktabgacha taʼlim tizimini rivojlantirish, bogʻchalarga bolalarni toʻliq qamrab olish uchun zarur sharoit yaratishga alohida eʼtibor qaratilmoqda. Bu bejiz emas. Chunki har qanday jamiyatning kelajagi bolalarga beriladigan taʼlim va tarbiyaga bevosita bogʻliq. Prezidentimiz tashabbusi bilan qabul qilingan davlat dasturlari va amalga oshirilayotgan islohotlar aynan shu ezgu maqsadga yoʻnaltirilgan.

Qishloq va chekka hududlarda ham maktabgacha taʼlim maskanlarini zamon talablari darajasida jihozlash, bolalarni qamrab olish koʻlamini kengaytirish, pedagoglarning mehnatiga munosib sharoit yaratish bugungi kunning dolzarb vazifalaridan biriga aylangan. Bu boradagi saʼy-harakatlar samarasini Amudaryo tumanining Qangli ovulida joylashgan 49-sonli davlat maktabgacha taʼlim tashkiloti misolida yaqqol koʻrish mumkin.

1978-yilda qurilgan mazkur muassasa binosi “Obod mahalla” dasturi doirasida tubdan taʼmirlanib, 2025-yilda qayta foydalanishga topshirildi. Bugungi kunda tashkilot binosi mutlaqo yangi qiyofa kasb etgan: har bir guruh xonasi shinam va yorugʻ, zamonaviy talablarga toʻliq javob beradi. Bolajonlarning yosh xususiyatlariga mos oʻyin va oʻquv qurollari, axborot texnologiyalari va multimedia vositalari bilan jihozlangan xonalar ularning jismoniy hamda aqliy rivojiga xizmat qilmoqda.

Hozirda asosiy binoda 120 nafar bola taʼlim-tarbiya bilan qamrab olingan. Shuningdek, hududdagi 67-sonli maktab qoshida tashkil etilgan qisqa muddatli guruhlarda yana 20 nafar bola tarbiyalanmoqda. Muassasada 29 nafar xodim mehnat qilmoqda, ularning 17 nafari malakali tarbiyachi-pedagoglardir. Dars jarayonlarida bolalarning fikrlash qobiliyati, ijodiy salohiyati, nutqi va axloqiy tarbiyasiga alohida eʼtibor qaratiladi. Shu bilan birga, musiqa, sport, rassomlik, sheʼrxonlik kabi toʻgaraklar bolalarning qiziqish va qobiliyatlarini rivojlantirishda muhim oʻrin tutadi.

Yaqinda bolajonlarni maktabga kuzatish munosabati bilan “Xayr, bogʻcham – salom, maktab!” nomli adabiy-badiiy va musiqiy chiqishlarga boy bayram tadbiri tashkil etildi. Joriy yil mazkur maktabgacha taʼlim tashkilotini 38 nafar tarbiyalanuvchi tamomladi.

Tadbirda tashkilot direktori Zina Ismoilova, bolalar, ularning onalari va buvijonlari ishtirok etdi. Dastlab Oʻzbekiston hamda Qoraqalpogʻiston Respublikalarining Davlat madhiyalari yangradi. Shundan keyin maktabgacha taʼlim tashkiloti direktori Zina Ismoilova tadbirni ochdi va barcha bolajonlarning kelgusi maktab taʼlimida aʼlo baholarga oʻqishlariga tilakdosh boʻldi.

Tadbir davomida bolalar tomonidan ona Vatan, maktab va bolalik mavzularidagi sheʼrlar oʻzbek, rus va ingliz tillarida ifodali tarzda yoddan oʻqildi. Chiqishlarda bolalarning bogʻchada olgan taʼlim-tarbiyasi, tarbiyachilar mehnati oʻz ifodasini topdi. Xorijiy tillarda oʻqilgan sheʼrlar va ijro etilgan raqslarda bolalarning koʻp qirrali isteʼdodlari aks etdi.

Milliy va zamonaviy raqslar, shoʻx qoʻshiqlar sadosi ostidagi chiqishlar har bir tomoshabinning qalbida iliq tuygʻular uygʻotdi. Ayniqsa, bolalarning onalari ishtirokidagi oʻyinlar tadbirga yanada yuqori kayfiyat ulashdi.

Tadbir yakunida bolajonlar soʻzga chiqib, tarbiyachilari hamda ota-onalariga sheʼrlar orqali samimiy minnatdorlik bildirishdi. Shuningdek, chuqur hurmat ifodasi sifatida bolajonlarning onalariga guldasta topshirish jarayoni hayajonli lahzalarga boy boʻldi.

Taʼlimning ilk bosqichi — maktabgacha taʼlimga qaratilayotgan eʼtibor yosh avlodni barkamol, bilimli va vatanparvar etib tarbiyalashda muhim oʻrin tutadi. Kichkintoylar uchun yaratilayotgan qulayliklar, ularning baxti va kamoliga yoʻnaltirilayotgan mehr — bu milliy taraqqiyotning poydevori hisoblanadi. Taʼlimga qaratilgan bugungi investitsiya — ertangi salohiyatli va barkamol jamiyatning kafolatidir.

Zina Ismoilova, 49-sonli DMTT direktori.