Harbiy xizmatchilarning ota-onalari sharaflandi
Mamlakatimizda yosh avlodni yuksak vatanparvarlik, milliy gʻurur va yurtga sadoqat ruhida tarbiyalashga katta eʼtibor qaratilmoqda. Ayniqsa, Vatan sarhadlari himoyasida sadoqat bilan xizmat qilayotgan harbiy xizmatchilarni ragʻbatlantirish, ularning ota-onalariga hurmat koʻrsatish va mehnatini munosib qadrlashga ustuvor ahamiyat berilmoqda. Bu kabi chora-tadbirlar Vatan himoyasida xizmat qilayotgan yoshlarni yanada ruhlantiradi.
Yaqinda ana shunday tadbirlardan biri Amudaryo tumanidagi Davlat xavfsizlik xizmati Chegara qoʻshinlariga qarashli harbiy qismda tashkil etildi. Unda mamlakatimiz sarhadlarida yurt himoyasi yoʻlida sadoqat bilan xizmat qilayotgan harbiy xizmatchilarning ota-onalariga hurmat va eʼtirof ramzi sifatida “Minnatdorlik xati” topshirildi.
Tadbirda soʻzga chiqqan masʼullar tomonidan harbiy xizmat — bu yurt, millat va xalq oldidagi yuksak insoniy masʼuliyat ekani taʼkidlandi. Shuningdek, bugungi tinch va osuda hayotimiz, mamlakat taraqqiyoti zamirida ana shunday jasur va intizomli yoshlarning xizmatlari mujassam ekani alohida qayd etildi. Shu maʼnoda, har bir ota-ona farzandining bu yoʻldagi xizmatidan faxr tuyayotgani eʼtirof etildi. Tadbir davomida Oʻzbekiston Respublikasi Davlat xavfsizlik xizmati rahbariyati tomonidan yuborilgan “Minnatdorlik xati” oʻqib eshittirilib, harbiy xizmatchilarning ota-onalariga tantanali ravishda topshirildi.
Shu munosabat bilan Toshkent viloyatidagi harbiy qismda xizmat qilayotgan kichik serjant Shohzod Yodgorovning Vatan oldidagi burchiga sadoqati, davlat chegaralarini qoʻriqlashdagi jasorati, intizomi va namunaviy faoliyati yuksak eʼtirof etildi. Uning ota-onasi — Amudaryo tumanida istiqomat qiluvchi Farhod Xaqnazarov va Maqsuda Yusupovalarga “Minnatdorlik xati” tantanali ravishda topshirildi.
Shuningdek, Jizzax viloyatidagi harbiy qismda oʻz xizmat burchini oʻtayotgan kichik serjant Akmal Xolboyevning faoliyati ham namuna sifatida qayd etildi. Uning onasi — Amudaryo tumanidagi Toʻlqin ovulida istiqomat qiluvchi Nasiba Saparboyeva ham shu mazmundagi “Minnatdorlik xati”ni faxr bilan qabul qilib oldi.
Qashqadaryo viloyatida xizmat qilayotgan oddiy askar Olimboy Gulimbatovning ham Vatan oldidagi xizmati munosib baholandi. Uning ota-onasi — Amudaryo tumani Xitoy ovulida istiqomat qiluvchi Anvar Aytbayev va Gulchexra Karimovalarga ham Davlat xavfsizlik xizmati rahbariyati tomonidan “Minnatdorlik xati” topshirildi.
Shubhasiz, bunday tadbirlar yurtimizda xizmat qilayotgan har bir harbiy xizmatchi va ularning oila aʼzolariga faxr-iftixor bagʻishlaydi. Farzandini Vatanga sadoqatli, fidoyi inson sifatida tarbiyalagan ota-onalar mehnatining eʼtirof etilishi — jamiyatda inson qadrini yuksaltirish, ona Vatanga muhabbat va sadoqat tuygʻusini yoshlar qalbiga mustahkam singdirishga xizmat qiladi. Bu esa, oʻz navbatida, tinchlik va osoyishtalikni taʼminlash, muqaddas Vatan sarhadlarini qoʻriqlashdek sharafli burchni sidqidildan ado etayotgan yurt farzandlarini har tomonlama qoʻllab-quvvatlashga xizmat qiladi.
Shohzod Qurbonboyev.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
