Amudaryo tumanida yoʻl harakati xavfsizligini taʼminlash va avtohalokatlarning oldini olish boʻyicha muhim yigʻilish boʻlib oʻtdi

Amudaryo tumani hokimligi majlislar zalida yoʻl harakati xavfsizligini taʼminlash, avtotransport vositalari ishtirokida sodir boʻlayotgan yoʻl-transport hodisalarining oldini olish, ularning ayanchli oqibatlarini bartaraf etish hamda ushbu sohadagi huquqbuzarliklarga qarshi kurashish borasida muhim yigʻilish boʻlib oʻtdi.

Tadbirda Qoraqalpogʻiston Respublikasi Ichki ishlar vaziri polkovnik Baxtiyar Torebekov ham ishtirok etib, avtohalokatlarning borgan sari koʻpayib borayotgani, ularning salbiy ijtimoiy-psixologik va iqtisodiy oqibatlari haqida keng tushuntirish berdi. Yigʻilishda tuman hokimi Sobir Xoʻjametov boshchiligida hokim oʻrinbosarlari, tuman Ichki ishlar boʻlimi masʼullari, tegishli tashkilotlar rahbarlari, haydovchilar hamda OAV vakillari ishtirok etdi.

Ichki ishlar vaziri polkovnik Baxtiyar Torebekov oʻz soʻzida bu borada profilaktik tadbirlarni yanada kuchaytirish, aholiga, xususan, haydovchilarga qoidabuzarliklarning oqibatlari haqida muntazam ravishda tushuntirish ishlari olib borish zarurligini taʼkidladi. U, shuningdek, har bir tashkilot, mahalla va jamoatchilik vakillari bu masalada befarq boʻlmasligi lozimligini qayd etdi.

Tuman hokimi Sobir Xoʻjametov esa oʻz nutqida yoʻl-transport hodisalari oqibatida oilalar ogʻir fojialarga uchrayotgani, ayrim hollarda butun oilaning parokanda boʻlishi, farzandlarning yetim qolishi kabi ayanchli holatlar yuz berayotganini afsus bilan tilga oldi. U yoʻl harakati madaniyatini yuksaltirish, haydovchilar va piyodalar oʻrtasida huquqiy savodxonlikni oshirish boʻyicha aniq chora-tadbirlar belgilanishi zarurligini taʼkidladi.

Yigʻilish davomida yoʻl-transport hodisalarining ayanchli oqibatlarini aks ettirgan videorolik hamda taqdimot namoyish etildi. Unda hayotdan olingan misollar orqali yoʻl harakati qoidalariga rioya qilmaslik qanday ogʻir oqibatlarga olib kelishi koʻrsatildi. Bu esa yigʻilish ishtirokchilarida chuqur taassurot qoldirdi.

Tadbir yakunida tegishli mutasaddilarga aniq topshiriqlar berilib, tumanda yoʻl harakati xavfsizligini taʼminlash borasidagi chora-tadbirlarni kuchaytirish, bu borada aholi oʻrtasida muntazam ravishda tushuntirish ishlari olib borish, yoʻllardagi nosozliklarni bartaraf etish hamda yoʻl belgilarining toʻgʻri oʻrnatilishi boʻyicha tegishli choralar koʻrilishi belgilandi.

Yigʻilish ishtirokchilari yoʻl harakati xavfsizligini taʼminlash – bu nafaqat IIB, balki har bir fuqaroning, har bir haydovchining fuqarolik burchi ekani toʻgʻrisida yakdil fikrga kelishdi.

Shubhasiz, yoʻl – bu har bir insonning hayot yoʻli. Bu yoʻlda har bir qadam ehtiyotkorlik, har bir harakat masʼuliyat bilan oʻlchanmogʻi lozim. Avtomobil ruliga oʻtirgan inson oʻz hayotini emas, boshqalarning ham taqdirini boshqarayotganini unutmasligi kerak. Chunki birgina beparvolik – bir umrning xazon boʻlishiga olib kelishi mumkin.

Bu kabi uchrashuvlar, profilaktik tadbirlar aholining huquqiy ongini oshirish, yoʻl harakati madaniyatini shakllantirishda muhim ahamiyat kasb etadi. Zero, inson hayoti – bebaho qadriyat, har bir haydovchi va piyoda buni chuqur anglab yetishi zarur.

Charos Arslonova, tuman hokimligining Axborot xizmati rahbari.