Amudaryo tumanida huquqni muhofaza qiluvchi idoralar Kengashining kengaytirilgan yigʻilishi boʻlib oʻtdi

Amudaryo tumani Madaniyat markazi binosida huquqni muhofaza qiluvchi idoralar muvofiqlashtiruvchi Kengashining kengaytirilgan yigʻilishi boʻlib oʻtdi. Yigʻilishda tuman hokimi Sobir Xoʻjametov, tuman prokurori Bahrom Masharipov, tuman Ichki ishlar boʻlimi boshligʻi Muxammetali Xoʻjamuratov hamda tumandagi tashkilot va muassasalar rahbarlari ishtirok etishdi.

Taʼkidlash joizki, yigʻilishda joriy yilning birinchi yarmida jinoyatchilikka qarshi kurash, huquqbuzarliklarning oldini olish, jamoat xavfsizligini taʼminlash hamda ijtimoiy-iqtisodiy sohalarda kuzatilayotgan muammolar va yoʻl qoʻyilayotgan kamchiliklar tanqidiy muhokama qilindi.

Tuman Prokurori – Muvofiqlashtiruvchi Kengashi raisi Bahrom Masharipov oʻz maʼruzasida  hisobot davrida 100 ga yaqin nazorat tadbirlari oʻtkazilib, 789 ta qonunbuzilish holati aniqlangani, ular boʻyicha 133 ta prokuror nazorati hujjatlari qoʻllanilganini maʼlum qildi.

Shuningdek, 400 ga yaqin murojaatning 78 foizi prokuratura organlarida koʻrib chiqilgani, 200 dan ziyod sayyor qabullar tashkil etilgani va aholini xabardor qilish maqsadida 200 dan ortiq huquqiy-targʻibot tadbirlari oʻtkazilgani qayd etildi.

Prokuratura organlari tomonidan aniqlangan qonunbuzilish holatlarining kelib chiqishiga, asosan idora va tashkilotlar rahbarlari, masʼul shaxslarining oʻz xizmat vazifalarini lozim darajada bilmasligi, kasbiga sadoqat ruhi shakllanmagani, ishlar toʻgʻri tashkil etilmagani, sohadagi tizimli xato va kamchiliklarni, mavjud muammolarni oʻz vaqtida bartaraf etish borasida shaxsiy tashabbus yoʻqligi sabab qilib koʻrsatildi.

Bundan tashqari, xizmat vazifasiga yuzaki va masʼuliyatsizlik bilan qarab, qonunbuzilish holatlariga yoʻl qoʻygan xodimlarga nisbatan qatʼiy choralar koʻrilishi lozimligi taʼkidlandi.

Shundan soʻng, yoʻl qoʻyilgan kamchiliklar boʻyicha masʼullarning tushuntirishlari va hisobotlari tinglandi.

Yigʻilish soʻngida Kengash Qarori bilan, hududda kriminogen vaziyat barqarorligini taʼminlashda huquqni muhofaza qiluvchi organlar hamda hokimlik, idora va tashkilotlarning hamkorligini yanada kuchaytirish boʻyicha chora-tadbirlar belgilanib, ijrosi nazoratga olindi.

Shuningdek, yigʻilishda Oʻzbekiston Respublikasi Prezidentining 2025-yil 3-yanvardagi “2025-yilda Respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarori ijrosi  va  bu borada yoʻl qoʻyilgan xato va kamchiliklar atroflicha muhokama etildi.

“Mahalla yettiliklari”ga mazkur Qaror talablaridan kelib chiqqan holda amalga oshirilishi lozim boʻlgan vazifalar yuzasidan aniq koʻrsatma va topshiriqlar berildi.

Amudaryo tuman Prokuraturasi.