Prezident Farmoni ijrosi va maʼnaviy-maʼrifiy ishlarda samaradorlik masalalari muhokama qilindi

Maʼlumki, mamlakatimizda soʻnggi yillarda xalq hokimiyatchiligini toʻlaqonli roʻyobga chiqarish borasida keng koʻlamli islohotlar amalga oshirilmoqda. Xususan, xalq deputatlari mahalliy Kengashlarining hududlarni ijtimoiy-iqtisodiy rivojlantirish, aholini tashvishga solayotgan dolzarb masalalarni hal etish boʻyicha vakolatlarining takomillashayotganligi, shuningdek, yangilangan Konstitutsiyaga muvofiq Kengash raisi va hokim lavozimi bir-biridan ajratilib, "Kuchli Kengash, hisobdor va tashabbuskor hokim" tamoyilining amaliyotga joriy etilgani tizimdagi byurokratik toʻsiqlarga barham berish imkonini yaratdi.   Ayniqsa, bu 2025-yil 23-iyunda Prezidentimiz tomonidan imzolangan "Oʻzbekiston Respublikasida mahalliy davlat hokimiyati vakillik   organlari faoliyatini 2030-yilga qadar    rivojlantirish Kontseptsiyasini tasdiqlash toʻgʻrisida"gi 98-sonli Farmonida belgilangan keng koʻlamli vazifalarning amaliy ijrosiga bagʻishlangan saʼy-harakatlarda yaqqol namoyon boʻlmoqda.

Ushbu Farmonga koʻra, 2025-yil 14-iyulda Qoraqalpogʻiston Respublikasi Joʻqorgʻi Kengesi Raisi tomonidan "Xalq deputatlari tuman Kengashlari yonidagi Yoshlar maslahat guruhi aʼzolari, OFY va MFY raislari, maʼnaviyat sohasi mutaxassislari ishtirokida amalga oshiriladigan chora-tadbirlar dasturi" tasdiqlangan edi. Joriy yilning 29-iyul sanasida Amudaryo tuman hokimligi binosida mazkur chora-tadbirlar dasturi doirasida kengaytirilgan yigʻilish boʻlib oʻtdi. Yigʻilishda Qoraqalpogʻiston Respublikasi Joʻqorgʻi Kengesining qoʻmita boshligʻi Sharapatdin Oʻtemisov, Maʼnaviyat va maʼrifat markazi Qoraqalpogʻiston Respublikasi boʻlimi boshligʻining oʻrinbosari Nariman Shinnazarov, Amudaryo tumani hokimi Sobir Xoʻjametov, Tuman Kengashi deputatlari, idora va tashkilotlar rahbarlari, umumtaʼlim maktablari direktorlarining maʼnaviy-maʼrifiy ishlar boʻyicha  oʻrinbosarlari, OFY va MFY raislari, maktabgacha taʼlim tashkilotlari metodistlari hamda OAV vakillari ishtirok etdilar.

Yigʻilishni tuman hokimi S. Xoʻjametov ochdi va olib bordi. Yigʻilish avvalida Xalq deputatlari tuman Kengashi kotibiyati bilan ovul va mahallalar oʻrtasidagi oʻzaro xabardorlik va hamkorlik masalalari yuzasidan fikrlashib olindi. Shundan soʻng yigʻilish kun tartibidagi asosiy masala – Kengash kotibiyati bilan OFY va MFYlar oʻrtasidagi xabardorlik va hamkorlik xizmatini yanada jonlantirish, Oʻzbekiston Respublikasi Prezidentining 2025-yil 23-iyundagi "Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish kontseptsiyasini tasdiqlash toʻgʻrisida"gi Farmonidan kelib chiqadigan vazifalar muhokama etildi. Ushbu masala yuzasidan Qoraqalpogʻiston Respublikasi Joʻqorgʻi Kengesining qoʻmita boshligʻi Sharapatdin Oʻtemisov maʼruza qildi. U oʻz maʼruzasida Prezident Farmoniga koʻra, jamiyatimizda "Kuchli Kengash, hisobdor va tashabbuskor hokim" tamoyilini amaliyotga joriy etishdan koʻzlangan maqsad va vazifalar  xususida batafsil maʼlumotlar berdi.

Xususan, mahalliy darajada xalq hokimiyatchiligini toʻlaqonli roʻyobga chiqarish, jamiyat va davlat hayotining muhim masalalarini hal etishda davlat hokimiyati vakillik organlarining rolini oshirish, fuqarolarning mahalliy boshqaruvda keng ishtirokini taʼminlash orqali demokratik jarayonlarni mustahkamlash, ijro hokimiyati organlarining mahalliy xalq vakillari oldidagi hisobdorligini oshirish, hududiy boshqaruvni aholi manfaatlariga xizmat qilish tamoyili asosida nomarkazlashtirish, hududlararo savdo-iqtisodiy va madaniy aloqalarni kuchaytirish, ushbu jarayonlarda yoshlarning ishtirokini qoʻllab-quvvatlash kabi masalalarga yigʻilish ishtirokchilarining eʼtiborini qaratdi.

Shundan soʻng Respublika Maʼnaviyat va maʼrifat markazining Qoraqalpogʻiston Respublikasi boʻlimi boshligʻi oʻrinbosari Nariman Shinnazarovning maʼruzasi tinglandi. U oʻz maʼruzasida Respublika Maʼnaviyat markazining 2025-yil 3-iyuldagi xabarnoma xatida qayd etilgan maʼnaviy-maʼrifiy ishlarni olib borishdagi kamchiliklar va ularni bartaraf etish boʻyicha umumtaʼlim maktablarining maʼnaviy-maʼrifiy ishlar boʻyicha direktor oʻrinbosarlari hamda MTTlarda faoliyat olib boruvchi metodistlarning ishini samarali tashkil etish yuzasidan zarur tushuncha va tavsiyalar berdi.

Har ikkala maʼruza yuzasidan muzokaralarda ishtirok etgan Qoraqalpogʻiston Respublikasi Joʻqorgʻi Kengesi deputati, 40-sonli maktab direktori Sanobar Xoʻjamurotova va boshqalar Kontseptsiyada belgilab berilgan ustuvor vazifalarni amalga oshirish, shuningdek, Respublika Maʼnaviyat va maʼrifat markazining xabarnoma xatida qayd etilgan kamchiliklarni bartaraf etish boʻyicha oʻz fikr va mulohazalarini bildirdilar. Shuningdek, yigʻilish davomida Oʻzbekiston Respublikasi Prezidentining 2025-yil 2-fevraldagi "Mahalla institutining jamiyatdagi rolini tubdan oshirish va uning aholi muammolarini hal etishda birinchi boʻgʻin sifatida ishlashini taʼminlashga qaratilgan chora-tadbirlar toʻgʻrisida"gi Farmonining ijrosi hamda galdagi vazifalar boʻyicha OFY va MFY raislari ishtirokida amaliy seminar ham tashkil etilib, mahalla institutini yanada takomillashtirish, aholi bilan ishlashda yangi mexanizmlarni amaliyotga izchil joriy etish yuzasidan oʻzaro fikrlar almashildi va Xalq deputatlari tuman Kengashi qoshidagi Yoshlar maslahat guruhi aʼzolariga Prezident Farmon va Qarorlari ijrosini taʼminlash borasida aniq rejalar belgilab, shu asosda ish yuritish yuzasidan zarur tushuncha va tavsiyalar ham berildi.

Robiya Yoʻldosheva.