Amudaryo tumanida paxta yetishtirish jarayonlari toʻliq nazorat ostida

Qishloq xoʻjaligi sohasida mavsumiy agrotexnik tadbirlarning oʻz vaqtida, sifatli amalga oshirilishi yuqori hosil olishdan tashqari, ekin maydonlarining sifati va samaradorligini ham oshirish imkonini beradi.  Ayniqsa, paxta ekiladigan maydonlarda   tuproq eroziyasining oldini olish, yerning haddan tashqari shoʻrlanishi yoki tuproqning hosildor qatlami zararlanib, chim bosib ketishi nafaqat ekinlar hosildorligining kamayishiga, balki yerning maʼlum maʼnoda yaroqsiz holatga kelib qolishiga sabab boʻladi. 

Bunday koʻngilsiz holatlarning oldini olish maqsadida mohir dehqonlar, fermerlar ekin maydonlarining hosildorligini oshirishning barcha choralarini koʻradilar. Xususan, dehqonchilik madaniyatini oshirish maqsadida barcha mavsumiy ishlarni agrotexnika talablari darajasida amalga oshirish, ayniqsa, paxtachilikda sohaga ilgʻor tajribalarni keng joriy etish orqali malakali mutaxassislar bilan hamkorlikda ish yuritishlari tufayli yuqori natijalarga erishadilar.

Amudaryo tumanida joriy yilgi paxta mavsumida 13 ming gektar yer maydoniga paxta ekildi. Hozirgi kunda dalalarda suvdan keyingi shudgorlash, oziqlantirish va chilpish ishlari agrotexnika qoidalariga muvofiq sifatli amalga oshirilmoqda. Ushbu jarayonlar ustidan Agroinspektsiya tomonidan toʻliq nazorat oʻrnatilgan boʻlib, ishlarning samarali va oʻz vaqtida bajarilishi muntazam ravishda monitoring qilib borilmoqda.

Mutaxassislarning taʼkidlashicha, suvdan keyingi shudgorlash jarayoni tuproqning donadorligini oshirib, yerni yumshatish, begona oʻtlarni yoʻqotish hamda namni saqlash orqali oʻsimlikning sogʻlom rivojlanishiga xizmat qiladi. Shu bois, tumandagi barcha fermer xoʻjaliklarida mavsumning bu muhim ishlarini belgilangan muddat va agrotexnik talablar asosida bajarishga asosiy eʼtibor qaratilmoqda.

Ayniqsa, dalalarda chilpish ishlarini sifatli amalga oshirish juda katta ahamiyatga ega. Chunki bu jarayon paxta oʻsimligining sogʻlom rivojlanishini taʼminlashdan tashqari, hosil nishonalarining sonini koʻpaytiradi va kelgusida hosildorlikka ijobiy taʼsir koʻrsatadi.

Bundan tashqari, mavsumiy agrotexnik tadbirlar – oʻgʻitlash, gʻoʻzani begona oʻtlardan tozalash, zararkunanda hashoratlarga qarshi kimyoviy ishlov berish ishlari ham tizimli ravishda olib borilmoqda. Amalga oshirilayotgan agrotexnik chora-tadbirlarning barchasi yuqori hosil olish va paxtaning sifat koʻrsatkichlarini yaxshilashga qaratilgan.

Shu bilan birga, Agroinspektsiya mutaxassislari tomonidan tuman hududidagi fermer xoʻjaliklari dalalarida yetishtirilayotgan paxta hosilini chamalash ishlariga ham alohida eʼtibor qaratilmoqda. Unga koʻra, dalalardagi oʻsimliklarning rivojlanish holati, gullash darajasi va hosil tugish koʻrsatkichlari oʻrganilib, kutilayotgan hosil hajmi boʻyicha dastlabki tahliliy va taxminiy hisob-kitoblar qilinmoqda. Bu boradagi maʼlumotlar kelgusi yigʻim-terim mavsumiga puxta tayyorgarlik koʻrish imkonini beradi.

Agroinspektsiya mutaxassislari tomonidan olib borilayotgan oʻrganishlar boʻyicha taqdim etilgan xulosalarga koʻra, dalalarda qatʼiy uzviylik asosida amalga oshirilgan mavsumiy agrotexnik tadbirlar —  chilla suviga qondirib sugʻorilgan gʻoʻza qator oralarini shudgorlash, chilpish, zararkunanda hashoratlarga qarshi kimyoviy kurashish va hosilni chamalash ishlarining puxta olib borilishi tufayli Amudaryo tumanida bu yil ham yuqori hosil olish uchun mustahkam zamin yaratilmoqda.

Ravshan Bahromov.