BOGʻDORChILIK VA BALIQChILIK SOHALARIDA AMALGA OShIRILAYoTGAN IShLAR YuZASIDAN PRESS-TUR TAShKIL ETILDI

Qoraqalpogʻiston Respublikasi Qishloq xoʻjaligi vazirligi hamda Agrosanoatni rivojlantirish agentligi Qoraqalpogʻiston Respublikasi boʻlimi hamkorligida Amudaryo tumanida ommaviy axborot vositalari uchun press-tur tashkil etildi.

Tadbirda Amudaryo tumani va Qoraqalpogʻiston Respublikasidagi bir qator OAV vakillari ishtirok etishdi. Mazkur tadbir tumandagi meva va uzum yetishtirishga ixtisoslashgan fermer xoʻjaliklari faoliyati, yerdan unumli foydalanish tajribasi hamda qishloq xoʻjaligini rivojlantirishga qaratilgan amaliy chora-tadbirlarni jamoatchilikka yetkazishda muhim ahamiyat kasb etdi.

Press-tur doirasida ommaviy axborot vositalari vakillari dastlab Choykoʻl ovulidagi “Amu anorlari” MChJ tomonidan barpo etilgan 8 gektarlik anor bogʻida amalga oshirilayotgan ishlar bilan tanishdilar. Xususan, Amudaryo tumanida anorchilik yoʻnalishini rivojlantirish, anorning mahalliy iqlim sharoitiga mos navlarini yaratish, mavjud anor daraxtlarining Qoraqalpogʻiston Respublikasining oʻzgaruvchan ob-havosiga moslashishini taʼminlash, mavsumiy ishlarni tashkillashtirish borasidagi bogʻbonlarning tajribalari ham oʻrganildi.

Press-tur ishtirokchilari ayni paytda olib borilayotgan agrotexnik tadbirlar natijasida moʻl hosil toʻplayotgan har bir tup anor daraxtidan kuzda qancha meva yigʻishtirib olinishi boʻyicha bogʻbonlarning rejalari, mamlakatimizda oziq-ovqat xavfsizligini taʼminlashga munosib hissa qoʻshishga qaratilgan ezgu niyatlari bilan qiziqdilar. Mazkur bogʻda yetishtirilayotgan anor mevalari tuman aholisining ehtiyojini toʻla qondirishdan tashqari, hosilning bir qismini yondosh ichki bozorlarga yoʻnaltirish imkoniyatining mavjudligi ishtirokchilarda katta taassurot qoldirdi.

Shundan soʻng, press-tur ishtirokchilari “Mangʻit omad savdo” MChJga qarashli 12 gektar maydonda tashkil etilgan uzumzor bogʻda ham boʻldilar. Sohibkor bogʻbonlar tomonidan uzumzorda parvarish qilinayotgan serhosil uzum navlari, mevalarni zararkunanda hasharotlardan asrash maqsadida olib borilayotgan kimyoviy ishlov berishning ahamiyati, shuningdek, uzum toklarini xomtok qilishning hosildorlikni oshirishdagi foydali jihatlari, mazkur xoʻjalik mutaxassislarining nazariy va amaliy tajribalari hamda agrotexnik yondashuvlari haqida maʼlumotlar berildi.

Press-turning keyingi manzili “Amu toʻlqin baligʻi” MChJ boʻlib, bu yerda ishtirokchilar 10 gektarlik olma va 6 gektarlik oʻrik bogʻlari faoliyati bilan yaqindan tanishish imkoniga ega boʻldilar. Shuningdek, ishtirokchilarga “Amu toʻlqin baligʻi” MChJ mutaxassislarining tumanda baliqchilikni rivojlantirish, aholining baliqchilik mahsulotlariga boʻlgan ehtiyojini toʻliq qondirishga qaratilgan reja va tashabbuslari, bu borada amalga oshirilayotgan loyihalar, ularning natijadorligi haqidagi maʼlumotlar ham taqdim etildi. Bundan tashqari, mazkur MChJ tasarrufidagi 10 gektarlik olma va 6 gektar maydondagi oʻrikzor bogʻlar, mazkur bogʻlarda yetishtirilayotgan mevalarni hoʻl va quritilgan holda qishga saqlash, aholi ehtiyojidan ortigʻini ichki bozorga yoʻnaltirish hamda MChJning eksport salohiyati xususida raqamlar asosida batafsil maʼlumotlar berildi.

Maʼlumot oʻrnida taʼkidlash joizki, hozirgi kunda Amudaryo tumanida bogʻdorchilik va uzumchilik yoʻnalishida 61 ta qishloq xoʻjaligi korxonasi faoliyat yuritmoqda. Ularning umumiy yer maydoni 1046 gektarni tashkil etib, shundan 641 gektari — hosildor, 405 gektari esa yangidan barpo etilgan bogʻlardir.

Joriy yilning bahor mavsumida fermer va qishloq xoʻjaligi korxonalari tomonidan 76 gektar maydonda intensiv bogʻlar tashkil etildi. Ayniqsa, tumanda bogʻdorchilik yoʻnalishiga qiziquvchi faol yoshlar soni ortib bormoqda.

Shuningdek, Yoshlar agentligi tuman boʻlimi hamda tuman Agrosanoatni rivojlantirish agentligi mutaxassislari hamkorligida tashkil etilayotgan bu kabi chora-tadbirlar tufayli bogʻlarda ishsiz yoshlarni bandlikka jalb etish boʻyicha tizimli ishlar amalga oshirilmoqda. Press-tur ishtirokchilari tadbir davomida nafaqat tumanda bogʻdorchilikni rivojlantirish, balki bogʻdorchilik mahsulotlarini qishgi mavsumga saqlash, qayta ishlash, baliqchilik sohasini zamon talablari darajasida rivojlantirish borasidagi innovatsion gʻoya va tashabbuslar, anorchilikni daromadli sohaga aylantirish borasidagi reja va tajribalar bilan ham batafsil tanishish imkoniga ega boʻldilar.

ROBIYa YOʻLDOShEVA.