TEMIR YOʻL TRANSPORTI XODIMLARI KUNI MUNOSABATI BILAN SOBIQ HAMKASBLAR UChRAShDILAR

Oʻzbekistonda 2017-yildan beri avgust oyining birinchi yakshanbasi Temir yoʻl transporti xodimlari kuni sifatida keng nishonlanadi.

Ayni paytda mamlakatimizda zamonaviy infratuzilmaga ega boʻlgan, aholi va iqtisodiyot tarmoqlari ehtiyojlarini toʻliq taʼminlay oladigan yaxlit temir yoʻl tarmoqlari yetib bormagan bironta ham hudud yoʻq hisobi. Amudaryo tumanida ham 1968-1969-yillarda Jumurtov togʻ-kon hududida temir yoʻl tarmogʻi qurilib, Jumurtov stantsiyasi tashkil etilgan. Mazkur stantsiya 1985-yildan Urganch lokomotiv deposi tarkibida, 2000-yildan boshlab esa Jumurtov stantsiyasi Qoʻngʻirot lokomotiv deposi tarkibida faoliyat olib bordi. 2008-yilda Jumurtov stantsiyasi faoliyati tugatilib, mazkur stantsiyada ishlovchi xodimlar “Oʻzbekiston temir yoʻllari” aktsiyadorlik jamiyati tasarrufidagi Qoraoʻzak stantsiyasida oʻz mehnat faoliyatlarini davom ettirishdi va aksariyat temir yoʻlchi xodimlar shu yerdan nafaqaga chiqdilar.

Joriy yilning 3-avgust sanasida Temir yoʻl transporti xodimlari kuni munosabati bilan oʻzlarining ilk kasbiy faoliyatlarini Jumurtov stantsiyasida ishlashdan boshlagan, 1970-yildan boshlab turli yillarda ushbu sohaga kirib kelgan va nafaqaga chiqqunlariga qadar temir yoʻl transporti sohasida mashinist vazifasida ishlagan, ayni paytda keksalik gashtini surayotgan sobiq hamkasblar uchrashdilar.

Oʻz hayotlarining asosiy qismini temir yoʻl transporti sohasiga bagʻishlagan sobiq hamkasblar oʻzlari ishlagan davr bilan hozirgi zamon temir yoʻl transporti sohasi oʻrtasidagi keskin farq, sohadagi yangilanishlar va oʻzgarishlar, yuksak taraqqiyot haqida mamnuniyat bilan soʻz yuritdilar. Shu bilan birga oʻzlari ishlagan davr bilan bogʻliq xotiralarini esga oldilar.

Aytish joizki, Amudaryo ustidan oʻtuvchi temir yoʻl va avtomobil yoʻli qoʻshma koʻprigining foydalanishga topshirilishi xalqimiz uchun asr yangiligi boʻlishi bilan birga ushbu qurilish Qoraqalpogʻiston Respublikasi va Xorazm viloyatining har tomonlama ravnaq topishida juda katta ahamiyatga ega yirik loyiha boʻldi. 423 metr uzunlikdagi muhtasham koʻprik bilan birga Xorazm viloyatining Shovot va Qoraqalpogʻistonning Qoraoʻzak bekatlarini bogʻlovchi 85 kilometrlik temir yoʻl tarmogʻi, 3 ta zamonaviy qulayliklarga ega vokzal binolari barpo etilib, ushbu yoʻnalish boʻyicha temir yoʻl masofasi 180 kilometrga, yuk tashish tezligi 6 soatga qisqargani sobiq hamkasblarning ham eʼtirofiga sazovor boʻldi.

Ayniqsa, Jumurtov stantsiyasining 2025-yildan boshlab faoliyati qayta tiklangani Qoraoʻzak konlari, Jumurtov togʻ-kon mahsulotlarini poyezdlarda tashish imkoniyatini yaratib, Orolboʻyi mintaqasidagi aholi va mintaqaga tashrif buyuruvchi turistlarga xizmat koʻrsatadigan avtomobil yoʻllarining sifatli saqlanishiga zamin yaratadi.

Xalqimiz bekorga “yoʻl mashaqqatini yoʻlchi biladi”, degan iborani yaratmagan. Sobiq hamkasblarning deyarli barchasi nafaqaga chiqqunlariga qadar mashaqqatli yoʻl azobini tortgan fidoyilar sifatida temir yoʻl transporti sohasining bugungi yosh mutaxassislariga muvaffaqiyatlar tiladilar.

Bayramona uchrashuv davomida sobiq hamkasblar ushbu uchrashuvni tashkil etgan hamkasblari Oʻrolboy Rahimov va Oʻrinboy Eshchanovlarga chin dildan minnatdorchilik bildirdilar. Bayram bahona, oʻzlari faoliyat olib borgan sohaga oid yangiliklar, oʻzgarishlardan xabardor boʻlgan, fayzli dasturxon atrofida kasbiy faoliyatlari davomidagi xotiralarni yodga olib, samimiy suhbat qurgan doʻstlar davrasi uzoq davom etdi va qalblarga joʻshqin kayfiyat bagʻishladi.

ROBIYa YOʻLDOShEVA.