Mahallalarda xavfsizlikni taʼminlash: zamonaviy yondashuv va amaliy natijalar

Prezidentimizning shu yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori xavfsizlik sohasida yangi bosqichni boshlab berdi. Bu muhim hujjat asosida Qoraqalpogʻiston Respublikasida keng qamrovli profilaktik ishlar olib borilmoqda va jamiyatning barcha qatlamlarini qamrab olgan kompleks tizim yaratilmoqda.

Qoraqalpogʻiston Respublikasi qoʻriqlash boshqarmasi, hududlardagi “Mahalla yettilik”lari hamda IIB xodimlari oʻrtasidagi uzviy hamkorlik tufayli “Xavfsiz shahar” va “Xavfsiz mahalla” tamoyili asosida “Xavfsiz va sogʻlom el” tezkor profilaktik-targʻibot tadbirlari oʻtkazilmoqda. Bu kabi tadbirlar jinoyatchilik va huquqbuzarliklarning oldini olishda muhim vosita boʻlib, fuqarolarning tinch-osoyishta yashashiga zamin yaratmoqda.

Soha mutaxassislari tomonidan olib borilayotgan tushuntirish-targʻibot ishlari fuqarolarning xavfsizlik boʻyicha tushunchalarini oshiribgina qolmay, ularni zamonaviy qoʻriqlash vositalaridan foydalanishga ragʻbatlantirmoqda. Yaqinda Amudaryo tumani IIB va qoʻriqlash boʻlimi xodimlari tomonidan Boyovul mahalla fuqarolar yigʻini hamda tuman dehqon bozori atrofida oʻtkazilgan tadbirlar bu boradagi ishlarning amaldagi ifodasi boʻldi.

Tadbir davomida fuqarolarga jinoyatchilik va huquqbuzarliklarning oldini olish, oʻgʻirlik jinoyatlariga yoʻl qoʻymaslik maqsadida qoʻriqlash xizmatining afzalliklari toʻgʻrisida batafsil maʼlumot berildi. Soha xodimlari mahallalarda joylashgan koʻp qavatli uylarda yashovchi fuqarolar bilan alohida uchrashuvlar oʻtkazib, ularga zamonaviy qoʻriqlash signalizatsiya uskunalaridan foydalanishning muhim jihatlari haqida tushuntirish ishlarini olib bordi. Bu vositalar birinchi navbatda fuqarolarning xavfsizligi va tinchligini taʼminlashda muhim rol oʻynashi, shuningdek ularning mol-mulkini himoya qilishda ishonchli vosita boʻlib xizmat qilishi taʼkidlandi.

Bugungi kunda Amudaryo tumani Qoʻriqlash boʻlimi Texnik qoʻriqlash markazi tomonidan 510 ta obʼekt va 340 ta fuqaro uyi ishonchli qoʻriqlanib kelinmoqda. Bu koʻrsatkichlar tumanda xavfsizlik tizimining puxta tashkil etilganligidan dalolat berib, aholining bu sohaga boʻlgan ishonchining amaliy isbotidir. Oʻtkazilgan targʻibot ishlari davomida jami 54 turdagi xizmat koʻrsatuvchi obʼektlar va 10 dan ortiq fuqarolarning yashash uylari himoyaga olindi.

Aytish joizki, qoʻriqlash tizimida qoʻllanilayotgan zamonaviy texnologiyalar fuqarolarning mol-mulki va shaxsiy xavfsizligini taʼminlashda muhim rol oʻynamoqda. Signalizatsiya tizimlari, videokuzatuv kameralari va boshqa texnik vositalar yordamida har qanday xavfli vaziyatlarni oldindan aniqlash va tegishli choralarni koʻrish imkoni yuzaga keladi. Soha mutaxassislari taʼkidlashicha, zamonaviy qoʻriqlash tizimlari nafaqat jinoyatchilikning oldini olishda, balki sodir boʻlgan holatlarni tezkor hal etishda ham katta samara beradi. Bu tizimlar 24 soat davomida ishlab, darhol signal berish orqali va amaliy chora qoʻllashga imkon yaratgani sababli fuqarolarga doimiy xavfsizlik hissini bagʻishlamoqda.

Tumanda xizmat koʻrsatayotgan tadbirkorlik obʼektlari va savdo shoxobchalarida zamonaviy qoʻriqlash signalizatsiya uskunalaridan unumli foydalanish boʻyicha tushuntirish ishlari davom etmoqda. Koʻpchilik tadbirkorlar bunday xizmatlardan foydalanish boʻyicha oʻzlarining ijobiy takliflarini bildirib, obʼektlarini soha xodimlari tomonidan qoʻriqlashga topshirmoqda.

Xavfsizlik masalalarida jamiyat va davlat organlari oʻrtasidagi hamkorlik muhim ahamiyat kasb etib, fuqarolarning faol ishtiroki va davlat organlarining professional faoliyati birgalikda yuqori natijalarga erishishga imkon beradi. “Mahalla yettilik”lari va IIB xodimlarining birgalikdagi ishlari natijasida hududlarda jinoyatchilik koʻrsatkichlari sezilarli darajada kamaymoqda. Qolaversa, bu kabi targʻibot ishlari ham izchil ravishda davom ettirilayotgani kelajakda xavfsizlik tizimining yanada mustahkamlanishiga va barcha hududlarni qamrab olishga xizmat qiladi.

Shuni ham taʼkidlash kerakki, zamonaviy dunyoda xavfsizlik tizimlari nafaqat jinoyatchilikning oldini olish vositasi, balki jamiyatning barqaror rivojlanishi uchun zarur shart sifatida qaralmoqda. Bu borada mamlakatimizda aholining tashabbuskorligi va davlat dasturlarining maqsadli amalga oshirilishi muhim rol oʻynamoqda. Xavfsizlik tizimini mustahkamlash yoʻlida qoʻllanilayotgan kompleks yondashuv esa kelajakda yanada keng qamrov kasb etib, yuksak natijalarga erishish imkonini beradi.