Davlat kadastrlari palatasi Qoraqalpogʻiston Respublikasi boshqarmasi tomonidan press-tur tashkil qilindi

Oʻzbekiston Respublikasining “Oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish toʻgʻrisida”gi qonuni ijrosi yuzasidan Davlat kadastrlari palatasi Qoraqalpogʻiston Respublikasi boshqarmasi va uning tuman, shahar filiallari tomonida keng qamrovli  xatlov ishlari olib borilmoqda.

Qonun ijrosi doirasida amalga oshirilayotgan ishlar haqida aholiga yanada kengroq maʼlumot berish maqsadida ommaviy axborot vositalari xodimlari uchun press-tur tashkil qilindi. Press tur ishtirokchilari Nukus shahrining Gone qala mahallasidagi xatlov jarayonlari, xususan, xatlov jarayonida Davlat kadastrlari palatasi Qoraqalpogʻiston Respublikasi boshqarmasi va uning Nukus shahar filiali xodimlari tomonidan amalga oshirilayotgan ishlar bilan yaqindan tanishdilar.

Ommaviy axborot vositalari vakillariga xonadonma-xonadon yurish, oʻlchov ishlarini amalga oshirish, xodimlar va aholi vakillarining muloqot jarayonlari, oʻlchov maʼlumotlarini qogʻozda qayd etish tartibi haqida batafsil maʼlumotlar berildi.

Qayd etish kerakki, Qoraqalpogʻiston Respublikasi boʻyicha 2025-yilda 166 ta mahallada xatlov ishlari amalga oshirilishi belgilangan. Bu ishlarga hududlarda jami 175 nafar xodimlar safarbar qilingan.

Davlat kadastrlari palatasi Qoraqalpogʻiston Respublikasi boshqarmasida qonun ijrosi boʻyicha ishchi guruh tuzilgan boʻlib, bugungi kunga qadar 48 ming 498 ta koʻchmas mulk obʼektlari xatlovdan oʻtkazildi. 34 ming 277 ta obʼekt haqida maʼlumotlar UZKAD axborot tizimiga yuklangan va 18 ming 640 dona obʼekt “E’tirof” avtomatlashtirilgan tizimga oʻtkazilgan. 14 ming 992 ta obʼekt hozirda muhokama jarayonida boʻlib, 2 ming 401 ta obʼekt haqida maʼlumotlar Kadastr agentligining rasmiy kadastr.uz saytida va mahalla fuqarolar yigʻinlari binolarida eʼlon qilingan. Qolgan 561 ta obʼekt Adliya organlari tomonidan oʻrganilmoqda va komissiya tomonidan 23 ta obʼektning mulk huquqini eʼtirof etish rad etilgan. 54 ta koʻchmas mulk boʻyicha huquqlarni tan olish uchun xalq deputatlari mahalliy kengashlarining qarorlari kutilmoqda.

Nukus shahri boʻyicha joriy yil mobaynida 28 ta mahallada xatlov ishlari amalga oshirilishi belgilangan.  18-avgust holatiga koʻra 6 ming 105 dona koʻchmas mulk obʼektlari xatlovdan oʻtkazilib, 1 ming 584 dona obʼekt “E’TIROF” axborot tizimiga kiritilgan.

3 ming 786 ta obʼekt haqidagi maʼlumotlar UZKAD axborot tizimiga yuklangan boʻlib, 1 ming 584 dona obʼekt “E’tirof” avtomatlashtirilgan tizimiga oʻtkazilgan. 1 ming 417 ta obʼekt hozirda muhokama jarayonida boʻlsa, 165 ta obʼekt haqida maʼlumotlar Kadastr agentligining rasmiy kadastr.uz veb-saytida va mahalla fuqarolar yigʻinlari binolarida eʼlon qilingan.

Davlat kadastrlari palatasi Qoraqalpogʻiston Respublikasi  boshqarmasi boshligʻi Sardor Urunboyev va Kadastr agentligi Qoraqalpogʻiston Respublikasi  boshqarmasi boshligʻi Isatay Tleuovlar ishtirokida oʻtkazilgan matbuot anjumanida jurnalistlarga qonun ijrosi boʻyicha batafsil maʼlumotlar berildi.

Qonunga koʻra, ijobiy xulosa qabul qilinganidan keyin fuqarolarga Kadastr agentligi tomonidan bir martalik toʻlovni amalga oshirish borasida sms-xabarnoma yuboriladi. Xabarnoma asosida bir martalik toʻlovni amalga oshirganlarga esa har chorakda xalq deputatlari mahalliy Kengashlarining qarorlari bilan tegishli huquqlar eʼtirof etiladi.

Shu oʻrinda aytish kerakki, baʼzi fuqarolar tomonidan bir martalik toʻlovlarni toʻlashni kechiktirish holatlari kuzatilib, bu egalik huquqini tan olish muddatining choʻzilishiga olib kelmoqda va oʻz-oʻzidan qonun ijrosini taʼminlashdagi muddatlarning buzilishiga sabab boʻlmoqda.

Masalan, bugungi kunda ijobiy xulosalar olgan 176 nafar fuqarolarga toʻlov borasida sms-xabarnoma yuborilgan boʻlishiga qaramasdan, mulk egalari tomonidan toʻlovlarni amalga oshirish jarayoni kechiktirilmoqda. Shu oʻrinda fuqarolarga mazkur qonun bilan yaratib berilgan qulaylik va imkoniyatlardan unumli foydalanib qolishlarini, mulklariga nisbatan tegishli huquqlarni rasmiylashtirib olishlari uchun bir martalik toʻlovlarni oʻz vaqtida amalga oshirishlarini tavsiya qilamiz.

Oʻzbekiston Respublikasining “Oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish toʻgʻrisida”gi qonuni koʻp yillardan beri yechimini topmay kelayotgan muammolarni hal qilishga, fuqarolarning mulkka oid huquqlarini kafolatlashga, ijtimoiy adolatni taʼminlashga va koʻchmas mulk bozorini tartibga solishga xizmat qilishi bilan ahamiyatlidir.