“Obod va fayzli mahalla – yurt koʻrki” shiori ostida umumxalq xayriya hashari oʻtkazilmoqda

Hashar – asrlar davomida avloddan avlodga oʻtib kelayotgan umrboqiy anʼana, xalqimizga xos boʻlgan birdamlik, saxovat va fidoyilikning yorqin koʻrinishidir. Xalqimiz ayniqsa, bayramlar, toʻy-tomoshalar oldidan hamjihatlikda hasharlar tashkil qilib, hovli-joylari, koʻcha-guzarlar, ovul va mahallalar hamda shahar-u qishloqlarni obod qilishga odatlangan. 22-23-avgust kunlari butun mamlakatimiz boʻylab “Obod va fayzli mahalla – yurt koʻrki” shiori ostida oʻtkazilayotgan umumxalq xayriya hashari ham ushbu asriy anʼanalarning amaliy ifodasidir.

Mustaqillik bayrami oldidan tashkil qilingan umumxalq xayriya hashari Vazirlar Mahkamasining maxsus farmoyishi asosida oʻtkazilayotgan boʻlib, unda fuqarolar, korxona va tashkilotlar jamoalari faol ishtirok etmoqda.

Amudaryo tumanida ham umumxalq xayriya hashari keng koʻlamda oʻtkazilib, tuman aholisi va tashkilotlari bu ezgu ishda bir yoqadan bosh chiqarib qatnashmoqda. Ayniqsa, tuman Sanitariya-epidemiologik osoyishtalik va jamoat salomatligi boʻlimi xodimlari hasharda hammadan faol ishtirok etishmoqda. Sababi, toza va ozoda, saranjom va sarishta hovlida sanitariya holati, shu bilan birga bu yerda yashovchi odamlarning salomatligi ham aʼlo darajada boʻladi.

Hashar doirasida amalga oshirilayotgan ishlar keng qamrov kasb etmoqda. Hasharchilar nafaqat koʻcha va hovlilarni tozalash, balki koʻp qavatli uylar atrofini, xiyobonlar, ziyoratgohlar va qabristonlarni tartibga keltirish, ariq va zovurlarni tozalash kabi ishlarda ham faollik koʻrsatmoqdalar. Bundan tashqari, daraxtlarni oqlash va butash ishlari ham amalga oshirilmoqda. Ayniqsa, ushbu tadbirning ijtimoiy jihati alohida eʼtiborga loyiq. Hashar davomida ijtimoiy himoyaga muhtoj, boquvchisini yoʻqotgan keksalar va nogironligi boʻlgan fuqarolarning uy-joy sharoitlarini yaxshilashga yordam berilmoqda. Bu esa jamiyatda mehr-oqibat tuygʻularini qaror toptirishda muhim vosita sanaladi.

Amudaryo tumani Tibbiyot birlashmasi jamoasi ham hudud obodligiga oʻz hissalarini qoʻshmoqdalar. Ularning bu ishtiroki aholi salomatligini muhofaza qilish bilan birga, ona Vatanimizga boʻlgan yuksak mehrlarini ham namoyish etadi.

Bu tadbirning muhim jihati shundaki, hashar jarayonida majburiy mehnatga yoʻl qoʻyilmaydi. Bu “Oʻzbekiston Respublikasida majburiy mehnatga barham berishga doir qoʻshimcha chora-tadbirlar toʻgʻrisida”gi hukumat qarori bilan qatʼiy belgilab qoʻyilgan. Har bir fuqaro hasharda oʻz istagi bilan, ixtiyoriy asosda ishtirok etmoqda. Bu oʻz navbatida, tadbirning maʼnaviy qiymatini oshiradi, chunki insonlar oʻz yurti obodligi uchun chin yurakdan, ixlos bilan mehnat qilsa, natija ham shunga yarasha goʻzal boʻladi.

“Obod va fayzli mahalla – yurt koʻrki” shiori ostidagi umumxalq xayriya hashari – bu faqatgina tozalik va obodonlashtirish ishlaridan iborat emas. Bu tadbir xalqimizning maʼnaviy birdamligini, mehnatsevarligini va bir-biriga boʻlgan mehr-muruvvatini namoyon etadigan ulkan ijtimoiy-siyosiy tadbir boʻldi. Har bir sarflangan kuch, har bir terilgan chiqindi va oqlangan daraxt bizning kelajak avlodlarga toza, obod va fayzli Vatan qoldirishga boʻlgan intilishimizning amaliy isbotidir.