Qurilishlar Prokuratura nazoratida

Soʻnggi yillarda Prezidentimizning alohida eʼtibor va tashabbuslari bilan mamlakatimiz taʼlim-tarbiya tizimida jiddiy islohotlar amalga oshirilib, oʻsib kelayotgan yosh avlodning mukammal bilim olishlari uchun zarur shart-sharoitlar yaratildi. Eng olis hududlardagi umumtaʼlim maktablari va maktabgacha taʼlim tashkilotlarining ham eskirgan binolarini taʼmirlash, rekonstruktsiya qilish, zamonaviy taʼlim standartlariga javob bermaydigan muassasalarni yangidan bunyod etish borasida keng koʻlamli bunyodkorlik ishlari olib borilmoqda.

Ayniqsa, mamlakatimiz Prezidentining 2024-yil 24-dekabrdagi “2025-2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qarori ijrosini taʼminlashga qaratilgan saʼy-harakatlar tufayli mamlakatimizda, shu jumladan Amudaryo tumanida ham taʼmirtalab holatga kelib qolgan taʼlim-tarbiya muassasalari joriy taʼmirlanib, rekonstruktsiya qilinmoqda. Yillar davomida taʼlim-tarbiya ishlarini olib borishda oʻqituvchilar uchun noqulaylik tugʻdirayotgan, moslashtirilgan binolarda faoliyat olib borayotgan taʼlim muassasalari uchun yangi binolar qurib berilmoqda.

Maʼlumot oʻrnida aytish joizki, Prezident qarori bilan “Oʻzbekiston–2030” strategiyasida belgilab berilgan vazifalarni hayotga tatbiq etish, hududlarda, shuningdek, mahallalarda ijtimoiy va ishlab chiqarish infratuzilmasini yanada rivojlantirish orqali aholining turmush darajasini oshirish hamda qurilish sohasidagi tadbirkorlar uchun qulay investitsiya muhitini yaratish, atrof-muhitni asrash, “Yashil iqtisodiyot” yoʻnalishlaridagi bunyodkorlik ishlariga 2025-yil davomida 2,4 trillion soʻm mablagʻ ajratildi.

Shuningdek, obʼektlarni loyihalashtirish va qurishda atrof-muhitga taʼsirni kamaytirish va qayta tiklanuvchi energiya manbalaridan foydalanish, 2025-yildan boshlab har yili umumtaʼlim maktablarining sanitariya-gigiyenik infratuzilmasini yaxshilash uchun kamida 100 mlrd soʻm mablagʻ ajratib borish belgilangan edi.

Ayni paytda ushbu qaror asosida Amudaryo tumanida 8 ta ijtimoiy soha obʼektlarida keng koʻlamli qurilish, joriy taʼmirlash va rekonstruktsiya ishlari olib borilmoqda. Mazkur qurilish-taʼmirlash va rekonstruktsiya ishlarining sifatli bajarilishi va belgilangan muddatlarda foydalanishga topshirilishi yuzasidan prokuror nazorati oʻrnatilib, haftalik, oylik va yil chorakligi boʻyicha belgilangan rejalarning sifatli bajarilishi qatʼiy monitoring qilib borilmoqda.

Yaqinda Amudaryo tuman prokurori Bahrom Masharipov rahbarligida ushbu 8 ta ijtimoiy soha obʼektlarida olib borilayotgan bunyodkorlik ishlari joyiga chiqqan holda oʻrganildi.

Dastlabki kuzatishlar tumanning Choykoʻl ovulidagi 59-sonli umumtaʼlim maktabi hududida amalga oshirilayotgan rekonstruktsiya ishlari bilan tanishishdan boshlandi. Mazkur maktab binosining rekonstruktsiya ishlarini “Amudaryo xizmat koʻrsatish markazi” masʼuliyati cheklangan jamiyat quruvchilari amalga oshirishmoqda. Tuman prokurori rekonstruktsiya ishlari bilan tanishish asnosida qurilishning loyihada belgilangan talablar darajasida bajarilayotgani bilan yaqindan tanishdi.

Shu bilan birga, maktab hududi va binoning sanitariya-gigiyenik infratuzilmasini sifatli amalga oshirish zarurligini, barcha qurilish va rekonstruktsiya ishlarini muvaffaqiyatli yakunlash, yangi oʻqish yiliga maktab binosini foydalanishga topshirish yuzasidan zarur tavsiyalar berdi.

Shu kuni tuman prokurori Bahrom Masharipov Boʻzyop ovulidagi 68-sonli umumtaʼlim maktabida “Qizketken maxsus qurilish” masʼuliyati cheklangan jamiyati quruvchilari tomonidan olib borilayotgan rekonstruktsiya ishlari bilan ham yaqindan tanishdi. Bino eshik va derazalarining zich yopilishi, infratuzilma inshootlarining sifatli oʻrnatilishi, bino hududidagi obodonlashtirish ishlarining loyiha hujjatlariga qay darajada mosligi monitoring qilindi.

Oʻrganishlar jarayonida tumani prokurori bunyodkorlik ishlari ikki smenada olib borilayotgan mazkur obʼektlarda aniqlangan kamchiliklarni bartaraf etish va yangi oʻquv yilida yuz foiz tayyor holda, eng muhimi, sifatli foydalanishga topshirish boʻyicha masʼullarga zarur tavsiyalar berdi.

Shuningdek, tuman prokurori tomonidan Oʻzbekiston Respublikasi Prezidentining “Yangi Oʻzbekiston” massivlarini qurish va hududlarning ijtimoiy-iqtisodiy rivojlanishini taʼminlash chora-tadbirlari toʻgʻrisida”gi Farmonida belgilangan vazifalarning amaliy ijrosi Amudaryo tumanida qay darajada taʼminlanayotgani boʻyicha ham joyiga chiqqan holda oʻrganishlar olib borildi.

Masʼullar ayni paytda mazkur Farmon asosida Mangʻit shahrining Doʻstlik mahallasi hududida barpo etilayotgan “Yangi Oʻzbekiston” massividagi koʻp xonadonli uy-joylarning qurilish-taʼmirlash ishlari, ijtimoiy-maishiy infratuzilmasi, qurilish ishlarining ekologik, sanitariya-gigiyenik talablarga muvofiqligi bilan yaqindan tanishdi.

“Yangi Oʻzbekiston” massivida har biri 30 ta xonadonga moʻljallangan va 5 qavatli boʻlgan 8 ta koʻp xonadonli turar joy binolari qurilishi jadal surʼatlarda olib borilmoqda.

Oʻrganishlar jarayonida Bahrom Masharipov mazkur uy-joylarni barpo etayotgan qurilish tashkilotlarining quruvchi-muhandislari, pudratchilar bilan uchrashib, turar joylarning belgilangan loyiha talablariga toʻliq javob beradigan darajada sifatli qurilishi, oʻz vaqtida foydalanishga topshirilishi yuzasidan maslahat va koʻrsatmalar berdi. Ayniqsa, aholining mahalliy turmush tarzidan kelib chiqib, uylarning ichki va tashqi infratuzilmasiga, obodonlashtirish ishlariga hamda massiv hududida joylashtiriladigan bolalar oʻyin maydonchalarida xavfsizlik qoidalariga qatʼiy amal qilgan holda ish olib borish zarurligini alohida taʼkidlandi.

Tuman hududida olib borilayotgan ijtimoiy soha obʼektlaridagi qurilish-taʼmirlash va rekonstruktsiya ishlarini belgilangan loyiha talablari darajasida amalga oshirish yuzasidan nazorat tadbirlari davom etmoqda.

ROBIYa YOʻLDOShEVA.