Amudaryo tumanida bogʻdorchilik rivojlanmoqda

Mamlakatimizda qishloq xoʻjaligi sohasiga berilayotgan eʼtibor tufayli bugungi kunda agrar tarmoq jadal rivojlanmoqda. Davlatimiz rahbari tomonidan sohani isloh qilish, modernizatsiyalash va uning samaradorligini oshirishga qaratilgan qator farmon va qarorlar qabul qilindi. Buning natijasida, qishloq xoʻjaligiga zamonaviy texnologiyalar, innovatsion yechimlar va xorijiy investitsiyalar keng jalb etilmoqda. Maqsad – nafaqat ichki bozorni sifatli va arzon mahsulotlar bilan taʼminlash, balki eksport salohiyatini ham oshirishdir.

Sababi, qishloq xoʻjaligi – mamlakat iqtisodiyotining tayanchi, oziq-ovqat xavfsizligining asosi, qishloq aholisining bandligini taʼminlashda asosiy tarmoq hisoblanadi. Ushbu sohaning barqaror rivojlanishi, aholi turmush darajasining yuksalishiga, mamlakatning iqtisodiy qudratining oshishiga xizmat qiladi.

Ayniqsa, bogʻdorchilik sohasi qishloq xoʻjaligining eng serdaromad va istiqbolli yoʻnalishlaridan sanaladi. Meva-sabzavot mahsulotlariga boʻlgan talab nafaqat ichki, balki tashqi bozorda ham yuqori. Shu sababli, intensiv bogʻlarni tashkil etish, serhosil va eksportbop navlarni ekish, ularni yetishtirishda ilgʻor agrotexnologiyalarni qoʻllash muhim ahamiyat kasb etadi.

Amudaryo tumanining Xolimbeg ovuli hududida joylashgan “Xolimbeg mevasi” MChJ tasarrufidagi 15 gektar yer maydoniga 2023-yilda Turkiyadan keltirilgan 8 ming 200 tup turk nok nihollari ekilgan boʻlib, mazkur bogʻ joriy yilda meva bera boshladi.

Turkiyadan keltirilgan ushbu nok navi oʻzining tez hosilga kirishi, yuqori hosildorligi va mevasining totliligi bilan ajralib turadi. Ushbu navning mevalari yirik, sersuv va xushboʻy boʻlib, inson salomatligi uchun zarur boʻlgan koʻplab vitamin va minerallarga boy.

MChJ rahbari Qurolbay Japaqov davlatimiz tomonidan dehqon va fermerlarga, yer egalariga, tomorqachilarga berilayotgan keng imtiyozlar va amaliy qoʻllab-quvvatlashlar soha vakillarining ish unumdoriligini yanada oshirishga, daromadlarini koʻpaytirishga katta turtki berayotganini alohida minnatdorchilik bilan taʼkidlaydi.

U oʻz tasarrufidagi yerga erta bahorda kartoshka va piyoz ekib, kartoshkadan gektaridan 400 tsentner, piyozdan esa 250 tsentner hosil oldi. Shuningdek, boʻshagan maydonlarga karam, koreys karami, bulgʻor qalampiri hamda sabzi ekib, ulardan ham moʻl hosil olishni maqsad qilgan.

Bogʻ qator oralariga takroriy ekinlar ekishning ahamiyati juda katta. Bu birinchidan, ikki-uch marta hosil olish imkonini beradi, yaʼni yerdan foydalanish samaradorligini keskin oshiradi. Ikkinchidan, bu qoʻshimcha daromad manbai boʻlib, fermer xoʻjaligining iqtisodiy barqarorligini mustahkamlaydi. Qolaversa, turli ekinlarni almashlab ekish tuproq unumdorligini saqlashga beradi.

Darhaqiqat, soʻnggi yillarda Qoraqalpogʻiston Respublikasini ijtimoiy-iqtisodiy rivojlantirish, tadbirkorlikni qoʻllab-quvvatlash borasida keng koʻlamli ishlar amalga oshirilmoqda. Qishloq xoʻjaligi sohasida faoliyat yuritayotgan tadbirkorlar uchun soliq imtiyozlari, subsidiyalar va imtiyozli kreditlar ajratilmoqda. Bu esa, oʻz navbatida, mintaqada yangi loyihalarning koʻpayishiga, ishlab chiqarish hajmining oshishiga va aholi farovonligining yuksalishiga xizmat qilmoqda.

Bunday imtiyoz va imkoniyatlardan samarali foydalanib, oilasiga va xalqiga foydasi tegayotgan, mamlakat iqtisodi rivojiga hissa qoʻshayotgan Qurolbay Japaqov kabi mahoratli dehqonlar zamonaviy agrotexnologiyalarni joriy etish orqali qishloq xoʻjaligida yuqori natijalarga erishmoqdalar. Ularning fidoyi mehnatlari samarasi bozorlarimizdagi arzonchilik, dasturxonlarimiz toʻkinligida oʻz aksini topmoqda.