AMUDARYoLIK YoQUBBOY AShIROV URUGʻChILIK YOʻNALIShIDA SANOATChI FERMERGA AYLANDI

Mamlakatimizda qishloq xoʻjaligi mahsulotlaridan yuqori hosil olish, oziq-ovqat xavfsizligini taʼminlash, ayniqsa, paxtachilikni rivojlantirish davlatimiz siyosatining ustuvor yoʻnalishi hisoblanadi. Ana shu maqsadga erishishning eng maqbul yoʻli — ilgʻor innovatsion agrotexnologiyalarni amaliyotga keng joriy etish, qolaversa, ilm-fan yutuqlaridan, tadbirkorlarning yangi-yangi gʻoyalaridan samarali foydalanishdir.

Paxtachilik mamlakatimizda qishloq xoʻjaligining muhim tarmoqlaridan biri sanaladi va bu sohada katta malaka, tajriba va oʻziga xos maktab yaratilgan. Garchi soʻnggi yillarda oziq-ovqat xavfsizligini taʼminlash, qishloq joylarda aholi bandligi bilan bogʻliq muammolarni hal etish maqsadida koʻp tarmoqli fermer xoʻjaliklarini koʻpaytirishga qaratilgan chora-tadbirlar tufayli paxta ekiladigan maydonlar 15-16 foizgacha kamaygan boʻlsa-da, omilkor dehqonlarning sohaga innovatsion yondashuvlari natijasida mamlakatimizda paxta hosildorligi kamaymadi. Aksincha, ilm-fan va yangi innovatsion agrotexnologiyalarni qoʻllash paxta urugʻchilik tizimini takomillashtirish, mehnat samaradorligini oshirish hisobiga yalpi paxta hosilini yuqori koʻrsatkichlarga yetkazishga erishilmoqda.

Bu borada Amudaryo tumanida ham oʻziga xos tajriba maktabi yaratilgan. Xususan, yerning mahalliy sharoitidan kelib chiqib, turli kasalliklarga chidamli urugʻlik mahsulotlarini tanlash va ekish orqali paxtadan har yili yuqori hosil olishga erishilmoqda. Ayniqsa, tumandagi "Yoqubboy Ashirov" fermer xoʻjaligida paxta va gʻalla urugʻchiligi yoʻnalishida yuqori natijalarga erishilmoqda.

Oʻz faoliyatini 2009-yilda boshlagan Yoqubboy Ashirov rahbarligidagi mazkur fermer xoʻjaligi 114 gektar yer maydonida dehqonchilik qiladi. Yangiliklarga intiluvchan va hamisha oʻz faoliyatiga innovatsion gʻoya va tashabbuslarni joriy etish orqali paxta va gʻalla urugʻchiligi sohasida yuqori natijalarga erishib kelayotgan fermer tumandagi urugʻlik paxta va gʻalla yetishtiruvchi qishloq xoʻjaligi korxonalari uchun yanada qulayliklar yaratish, shu bilan birga paxta va gʻalla hosildorligini oshirishga munosib hissa qoʻshish maqsadida Xitoy Xalq Respublikasida boʻlib, xitoylik urugʻshunoslar faoliyati bilan yaqindan tanishdi.

Shu bilan birga davlatimiz tomonidan tadbirkor va ishbilarmonlar uchun yaratilgan imkoniyatlardan samarali foydalangan holda 3 milliard soʻmlik imtiyozli kredit oldi. Unga qoʻshimcha 3 milliard soʻm oʻz mablagʻi hisobiga Xitoy davlatidan paxta, gʻalla va boshqa donli ekinlar urugʻlarini mahalliy sharoitda qayta ishlaydigan zavod uskunalarini olib keldi hamda "Amu sara urug'lari" MChJ shaklidagi korxonaga asos soldi. Bu bilan Yoqubboy Ashirov sanoatchi fermerga aylandi.

Amudaryo tumanida yagona boʻlgan mazkur urugʻchilik korxonasi tumandagi fermer xoʻjaliklari uchun sifatli urugʻlik mahsulotlarini yetkazib berish orqali qishloq xoʻjaligi mahsulotlari yetishtirishda sifat va samaradorlikka erishishlariga munosib hissa qoʻshib kelmoqda.

Ayni paytda korxona joriy paxta yigʻim-terim mavsumi oldidan toʻliq quvvat bilan ishlashga shay qilinib, urugʻlik paxta yetishtiruvchi fermer xoʻjaliklaridan yangi paxta hosilini qabul qilish va qayta ishlash, sara urugʻlarni ajratib olishga tayyor qilib qoʻyildi. Korxonaning barcha tsexlari, ayniqsa, paxtadan sara urugʻlarni ajratib olish mexanizmlari benuqson ishlashi uchun zarur shart-sharoitlar yaratildi. Korxona ishchilari va mutaxassislari maxsus tayyorgarlikdan oʻtkazilib, ularga mehnat qonunchiligi va texnika xavfsizligi qoidalari yuzasidan tushuncha va tavsiyalar berildi.

Biz ijodiy jamoamiz bilan korxonada boʻlganimizda urugʻlik sifatini nazorat qilish uskunalari, laboratoriya jihozlari, paxtani qabul qilish, tola sifati boʻyicha toifalarga ajratishga qaratilgan barcha tadbirlarni tez va samarali amalga oshirish imkonini beruvchi texnologiyalar ishlash uchun shay holatga keltirilganining guvohi boʻldik. Bundan ham muhimi, mazkur korxonada faqat qishloq yoshlari mehnat qilishib, zamonaviy texnologiyalarni mahorat bilan boshqarishmoqda.

— Barchasi muhtaram Prezidentimizning biz —­ qoraqalpogʻistonlik tadbirkorlarga qaratayotgan yuksak eʼtibor va ragʻbatlari tufayli, — deydi Yoqubboy Ashirov mamnuniyat bilan. — Ana shu eʼtibor va ragʻbat tufayli tumanning eng chekka hududi — Yuqori qishloq mahallasiga sanoatni olib keldik, bir necha mahalla yoshlarining doimiy va mavsumiy ish bilan bandligi taʼminlandi.

Ayni paytda korxona mehnat jamoasi hududdagi urugʻlik paxta yetishtiruvchi fermer xoʻjaliklaridan dastlabki hosilni qabul qilib olishga taraddud koʻrishmoqda.

ROBIYa YOʻLDOShEVA.