"KEKSALAR MASLAHATI – OLTINDAN QIMMAT" MAVZUSIDA DAVRA SUHBATI OʻTKAZILDI

Nuroniylar — xonadonlarimizning farishtalari. Ularning katta hayotiy tajribalari oʻsib kelayotgan yosh avlod uchun misli bir dorilfunundir. Ularning davrasida boʻlish, hayot hikmatlariga toʻla, sermazmun suhbatlarini tinglash qalblarga maʼnaviy kuch bagʻishlaydi, shu barobarida xatolarimizdan tegishli xulosalar chiqarish, turmush tarzimizni ijobiy va yaxshi tomonga oʻzgartirish, axloqan poklanish sari intilib yashashga daʼvat etadi.

Shuning uchun ham mamlakatimizda keksa avlod vakillarining ibrat va hikmatga toʻla hayot yoʻllari, maslahat va oʻgitlari maʼnaviy tarbiyaning namunali tamoyili sifatida alohida eʼtirof etiladi. Xalqimiz “Keksalar maslahati – oltindan qimmat”, “Qari bilganini pari bilmas”, “Otalar soʻzi — aqlning koʻzi” kabi hikmatli iboralarni bekorga yaratmagan.

“Nuroniy” jamgʻarmasining Amudaryo tuman boʻlimi tomonidan nuroniy otaxon va onaxonlar ishtirokida tashkillashtirilayotgan “Uch avlod uchrashuvi”, “Nuroniylar – xonadonlarimiz koʻrki” mavzularidagi yoshlar bilan uchrashuvlar, dildan samimiy muloqot tadbirlari ham ushbu hikmatlarning amaldagi tasdigʻidir.

Yaqinda jamgʻarmaning Amudaryo tuman boʻlimi binosida oʻtkazilgan “Keksalar maslahati – oltindan qimmat” mavzusidagi davra suhbatida ham nuroniylar oʻsib kelayotgan yosh avlodni milliy-maʼnaviy qadriyatlarga hurmat, halollik va mehnatsevarlik, vatanparvarlik ruhida tarbiyalashga qaratilgan qimmatli fikr va maslahatlari bilan faol ishtirok etib, tadbir ishtirokchilariga maʼnaviy ruh bagʻishladilar.

Ochiq muloqot va samimiylik ruhida oʻtgan davra suhbatida Oʻzbekiston Respublikasi “Nuroniy” jamgʻarmasi Toshkent shahar boʻlimidan tashrif buyurgan mehmon Jumamurod Sobirov, Amudaryo tumani hokimining oʻrinbosari, Oila va xotin-qizlar boʻlimi boshligʻi Goʻzal Saburova, “Nuroniy” jamgʻarmasi Amudaryo tuman boʻlimining jamoatchilik Kengashi rahbari Bekman Allamberganov, nuroniylardan Amangul Qayupova, Madamin Kazakovlar hamda tuman yoshlari bilan ishlashda oʻziga xos tajriba maktabini yaratgan faol nuroniylar ishtirok etdilar.

Davra suhbati davomida “Nuroniy har bir oilaga masʼul” loyihasi asosida muammoli oilalarning har biriga “Keksalar maslahati” guruhlari tomonidan biriktirilgan nuroniylar hududlardagi notinch oilalar bilan ishlashdagi tajriba va tashabbuslari xususida batafsil soʻz yuritishib, ajrashish holatiga borib qolgan oilalarni yarashtirish borasidagi fikr va maslahatlarini bildirdilar.

Oilalardagi nizo va janjallar oʻz-oʻzidan kelib chiqmaydi. Koʻpincha iqtisodiy jihatdan yaxshi taʼminlanmaganlik, kambagʻallik, oila aʼzolarining ishsizligi natijasida oila poydevori darz ketadi. Shu bois, Amudaryo tumanida “Bir nuroniy — oʻn yoshga masʼul” tamoyili asosida hududlardagi kam taʼminlangan, ijtimoiy himoyaga muhtoj oilalarning oʻz daromad manbaiga ega boʻlishlariga koʻmaklashishga alohida eʼtibor qaratiladi.

Yoshlarning bandligini taʼminlash, ularni kasb-hunarga oʻqitish orqali tadbirkorlik faoliyatiga keng jalb qilish maqsadida nuroniylar oʻzlariga biriktirilgan yoshlar bilan muntazam ravishda ish olib borib, koʻplab oilalarning kambagʻallikdan chiqishlariga koʻmakdosh boʻlishmoqda.

Davra suhbati ishtirokchilari oilaviy ajrashishlarning oldini olish, shu toifadagi oilalarni yarashtirish borasida “Nuroniy” jamgʻarmasi tuman boʻlimi huzuridagi “Buvijonlar maktabi” jamoatchilik tuzilmasi va “Keksalar maslahati” guruhi aʼzolarining birgalikdagi saʼy-harakatlari oʻzining ijobiy natijasini berayotganini mamnuniyat bilan taʼkidladilar.

Shuningdek, bugungi kunda amudaryolik faol nuroniylar mahallalarda “Kambagʻallikdan farovonlik sari” tamoyili asosida amalga oshirilayotgan barcha ezgu ishlarning ilhomchilari, yaqin maslahatgoʻylari, tashabbuskorlari sifatida izchil faoliyat olib borishayotganlari alohida eʼtirof etildi.

“Keksalar maslahati — oltindan qimmat” mavzusida oʻtkazilgan davra suhbati nuroniylarning nafaqat bosib oʻtgan ibratli hayot yoʻllari, balki yosh avlodni milliy-maʼnaviy qadriyatlar ruhida tarbiyalash borasidagi har bir ishi kelajak avlod uchun chinakam dorilfunun boʻlib xizmat qilishining amaliy isboti boʻldi.

Robiya YOʻLDOShEVA.