Xalq deputatlari Amudaryo tuman kengashining 13-sessiyasi toʻgʻrisida axborot

16-sentyabr kuni Amudaryo tumani hokimligining majlislar zalida Xalq deputatlari tuman kengashining navbatdagi 13-sessiyasi boʻlib oʻtdi. Sessiyada deputatlar, tuman hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Xalq deputatlari tuman Kengashi raisining oʻrinbosari – 3-“Doʻstlik” saylov okrugidan deputat Madamin Kazakov olib bordi. Sessiya kotibligiga “14-Boʻz yop” saylov okrugidan deputat Muzaffar Yeshchanov saylandi.

Sessiya kun tartibidagi dastlabki – tuman mahalliy byudjetining qoʻshimcha manbalari hisobidan mablagʻ ajratish, 2-bosqich drayver loyihalarning manzilli roʻyxatini tasdiqlash, “Tashabbusli byudjet” ning gʻolib boʻlgan loyihalarining roʻyxatini tasdiqlash toʻgʻrisidagi masalalar yuzasidan tuman hokimligining Moliya, iqtisodiyot va kambagʻallikni qisqartirish masalalari boʻyicha bosh mutaxassisi Otabek Olloyorov hisobot berdi.

Hisobotlarda keltirilishicha, Oʻzbekiston Respublikasi Iqtisodiyot va Moliya vazirligi tomonidan ochilgan Ochiq byudjet portalida 2025-yil 15-iyulidan 3-avgustga qadar boʻlgan davrda tuman fuqarolari tomonidan jami 72 ta tashabbuslar kiritilgan. Ishchi komissiyaning 2025-yil 21-avgustdagi yigʻilishida ushbu tashabbuslar komissiya aʼzolari tomonidan qayta koʻrib chiqilib, 2 ta tashabbus belgilangan tartibga zid ekanligi sababli rad etilgan. Tanlab olingan 70 ta tashabbuslar, masʼullar tomonidan qayta hisob-kitoblar qilinib, ovoz berish jarayoniga ruxsat berilgan. Ovoz berish yakunlariga koʻra 12 ta tashabbus gʻolib deb topilgan. Ushbu tashabbuslarning umumiy qiymati 18 mlrd soʻmni tashkil etadi.

Sessiya kun tartibidagi navbatdagi masala – tuman Tibbiyot birlashmasida 2025-yil 7 oyi davomida aholiga malakali tibbiy xizmat koʻrsatish boʻyicha amalga oshirilayotgan ishlar yuzasidan Tibbiyot birlashmasi bosh shifokori oʻrinbosari Gulshod Yusupovaning hisoboti tinglandi.

Hisobotda qayd qilinganidek, joriy yilning 7 oy davomida tumanda 2193 nafar chaqaloq tugʻilgan, 540 kishi vafot etgan, 17 yoshgacha boʻlgan bolalar oʻlimi 49 nafarni, 1 yoshgacha boʻlgan bolalar oʻlimi 39 nafarini tashkil qilgan.

Hisobot davrida jami 20 ming 793 nafar bolalar turli kasalliklarga qarshi emlangan. Shundan epidemiologik koʻrsatma asosida 1678 nafar bolalar qizilcha kasalligiga, 6 yoshli 3760 nafar bolalar va kam taʼminlangan oilalarning 500 nafar farzandlari esa gepatit “A” kasalligiga qarshi emlangan. Ushbu davr mobaynida onalar oʻlimi kuzatilmagan.

Sessiya kun tartibidagi soʻnggi masala – Maktabgacha taʼlim tashkilotlarida bolalarning ovqatlanish jarayonida sanitariya talablariga rioya qilnishi yuzasidan Amudaryo tumani Sanitariya epidemiologik osoyishtalik va jamoat salomatligi boʻlimi boshligʻi Gulmurod Bekiyev hisobot berdi.

Hisobotda 2025-yildan boshlab maktabgacha taʼlim tashkilotlarida bolalarni ovqatlantirishning autsorsing tizimi joriy qilingani, bu tizim orqali xususiy tashkilotlar tomonidan ovqat tayyorlanishi va yetkazib berilishi yoʻlga qoʻyilgani xususida soʻz yuritildi va bu jarayonlarda sanitariya talablari va normalariga amal qilish holati haqida maʼlumotlar berildi.

Sessiya kun tartibiga kiritilgan barcha masalalar atroflicha muhokama qilinib, fikr-mulohazalar tinglangan holda tegishli qarorlar qabul qilindi. Shuning bilan Xalq deputatlari tuman kengashining 13- sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.