KORRUPTsIYaGA QARShI TARGʻIBOT TADBIRLARI OʻTKAZILDI

Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Taraqqiyot koʻzgusi” gazetasi tahririyatining “Biz korruptsiyaga qarshimiz!” nomli hamda “Amudaryo televideniyesi” tahririyatining “Korruptsiya – davlat va jamiyat taraqqiyotiga tahdid” nomli grant loyihalari doirasida mazkur ommaviy axborot vositalari hamkorligida tadbir tashkil qilindi.

Grant loyihasi ish rejasiga koʻra davlat xizmatlaridan foydalanuvchilarga bukletlar va flayerlar tarqatish orqali ular ongida korruptsiya nisbatan murosasizlik tuygʻusini shakllantirishga hissa qoʻshish maqsadida loyiha koordinatorlari tumanning Navoiy va Oybek nomli mahallalarida boʻldilar.

Tadbir avvalida mahalla fuqarolar yigʻini raisi Azamat Xidirov ishtirokchilarga nafaqat davlatimiz taraqqiyoti, balki har bir inson kamoloti, oilalar farovonligi uchun jiddiy tahdid boʻlgan korruptsiyaga qarshi kurashish bugungi kunda umummilliy harakatga aylanganini taʼkidladi va mahalla ahlini ushbu illatga qarshi kurashishda hamjihatlikka chaqirdi.

Shundan soʻng loyiha koordinatori Robiya Yoʻldosheva tadbir ishtirokchilariga mazkur loyihalarning dolzarbligi, loyihalar doirasida amalga oshirilayotgan keng koʻlamli targʻibot-tashviqot ishlari va ulardan kutilayotgan ijobiy natijalar xususida soʻz yuritdi.

Xususan, loyihalar ish rejasi doirasida umumtaʼlim maktablarining oʻquvchilari oʻrtasida tashkil etilgan “Korruptsiyasiz jamiyat quramiz!”, “Biz korruptsiyaga qarshimiz!” mavzularidagi insholar tanlovlari, ovul va mahalla fuqarolar yigʻinlarida, davlat va jamoat tashkilotlarida huquqshunoslar, deputatlar, imomlar va nuroniylar ishtirokida oʻtkazilayotgan uchrashuvlar, davra suhbatlari qamrov darajasi kengligi bilan aholining huquqiy savodxonligini oshirishda ijobiy samara bermoqda.

Fuqarolar bilan muloqot chogʻida korruptsiyaga qarshi kurashish faqat huquqni muhofaza qilish organlari xodimlarininggina emas, balki har bir birimizning zimmamizidagi burch va masʼuliyat ekani taʼkidlandi. Shu bilan birga, manfaatlar toʻqnashuvi, poraxoʻrlik, aldov, firibgarlik yoʻli bilan oʻzganing mulkini oʻzlashtirib olish koʻrinishidagi huquqbuzarliklar haqida hayotiy misollar keltirilib, bu kabi jinoyatlarga jazo muqarrarligi taʼkidlandi.

Loyiha koordinatorlari aholi xonadonlariga ham tashrif buyurib, korruptsiyaga qarshi targʻibot ishlarini olib bordilar. Muloqot jarayonida ishtirokchilarga davlat organlarining korruptsiyaga qarshi kurashuvchi vakolatli tuzilmalarining “Ishonch telefonlari”, “Call markazlari” haqida maʼlumotlar taqdim etilib, korruptsiya holatlariga duch kelganda ushbu organlar murojaat qilish lozimligi taʼkidlandi.

Bundan tashqari, loyiha koordinatorlari mahallalar hududidagi maktabgacha taʼlim tashkilotlariga ham tashrif buyurishib, korruptsiya holati yuz berishining oldini olish, korruptsiyaga qarshi kurashishda jamoaviy birdamlikni taʼminlash yuzasidan muassasa xodimlari bilan suhbatlashdilar. Ularga, korruptsiya, manfaatlar toʻqnashuvi, firibgarlik, taʼmagirlik bilan bogʻliq holatlar sodir boʻlgan taqdirda zudlik bilan davlat organlarining vakolatli tuzilmalariga tegishli “Ishonch telefonlari” orqali xabar berish zarurligi, har qanday vaziyatda xabar beruvchining shaxsiy maʼlumotlari sir tutilishi toʻgʻrisidagi maʼlumotlar taqdim etildi.

Oʻtkazilgan tadbirlar Navoiy va Oybek nomli mahallalar aholisi ongida korruptsiyaga nibatan murosasizlik tuygʻusini shakllantirish, bu illatga qarshi kurashishda jamoaviy birdamlikni taʼminlashga qaratilgani bilan muhim ahamiyatga ega boʻldi.

Robiya YOʻLDOShEVA, Mahmudjon ShOMURODOV, Ravshan BAHROMOV, loyiha koordinatorlari.