"QIShLOQ JOYLARNI BARQAROR RIVOJLANTIRISh" LOYIHASI DOIRASIDA YaNGI BOGʻChA BINOSI FOYDALANIShGA TOPShIRILDI
Soʻnggi yillarda mamlakatimizda qishloqlardagi aholi punktlarining meʼmoriy qiyofasini tubdan yangilash, hududlarni kompleks rivojlantirish, yoʻl-transport infratuzilmasi, muhandislik-kommunikatsiya tarmoqlari va ijtimoiy soha obʼektlarini barpo etish orqali aholiga qulay turmush sharoitini yaratishga katta eʼtibor qaratilmoqda. Bu borada 2021-yil 18-sentyabr sanasida “Islom taraqqiyot banki va OPEK xalqaro taraqqiyot jamgʻarmasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari toʻgʻrisida”gi Prezident qarori qabul qilinib, “Qishloq joylarni barqaror rivojlantirish” loyihasi amaliyotga joriy etilgan edi. Unga koʻra, mazkur loyihani Qoraqalpogʻiston Respublikasi, Buxoro, Navoiy, Xorazm viloyatlarida jami 20 ta tumandagi 170 ta mahallalarda amalga oshirish ishlari izchillik bilan olib borilmoqda.
Amudaryo tumanida ham Prezident qarori ijrosini taʼminlash, loyiha doirasidagi qurilish-taʼmirlash ishlarini sifatli olib borish va obʼektlarni oʻz vaqtida foydalanishga topshirish boʻyicha tizimli ishlar amalga oshirilmoqda. Ayni paytda hududlarda “Qishloq joylarni barqaror rivojlantirish” loyihasi doirasida yangidan bunyod etilgan va rekonstruktsiya qilingan bino va inshootlar foydalanishga topshirilmoqda. Loyiha asosida qisqa muddat ichida Mangʻit shahrining Olmazor mahallasi hududida ham 120-oʻrinli davlat maktabgacha taʼlim tashkiloti binosi qurilib, foydalanishga topshirildi.
Muassasaning ochilish marosimida Amudaryo tuman hokimining oʻrinbosari Nodirbek Kamolov ishtirok etib, mamlakatimizda maktabgacha taʼlim tizimida amalga oshirilayotgan keng koʻlamli islohotlar, aholining turmush farovonligini oshirishga qaratilgan chora-tadbirlar xususida batafsil soʻz yuritdi va Olmazor mahallasi aholisini, ayniqsa, yosh ota-onalarni farzandlari taʼlim-tarbiyasi uchun yaratilayotgan shart-sharoitlar, barcha qulayliklarga ega muassasa binosining foydalanishga topshirilishi munosabati bilan tabrikladi.
Shuningdek, tadbirda soʻzga chiqqan Olmazor mahallasi faollari va ota-onalar davlatimizning yosh avlod taʼlim-tarbiyasi yoʻlidagi gʻamxoʻrliklari uchun minnatdorlik bildirishdi hamda mazkur muassasa binosini bunyod etgan “Zamin qurilish-trans servis” masʼuliyati cheklangan jamiyati quruvchi-bunyodkorlariga chin dildan rahmatlar aytishdi.
Shundan soʻng, quruvchi tashkilot masʼullari tomonidan muassasa binosining ramziy kaliti muassasa rahbariyatiga topshirildi va mahalla faollari hamda ota-onalar bino ichkarisiga kirib, bolajonlar uchun yaratilgan shart-sharoitlar, bogʻcha hovlisida amalga oshirilgan obodonlashtirish ishlari, bolalar oʻyin maydonchalarining jihozlanishi bilan tanishdilar.
Zamon talablari darajasida jihozlangan muassasa binosining koʻrkam meʼmoriy qiyofasi barchaga manzur boʻldi va shu kunning oʻzida muassasaga ilk tarbiyalanuvchilar qabul qilinib, oʻz faoliyatini boshladi.
“Qishloq joylarni barqaror rivojlantirish” loyihasini amalga oshirish orqali hududlarni kompleks rivojlantirish, ularda yoʻl-transport infratuzilmasi, muhandislik-kommunikatsiya tarmoqlari va ijtimoiy soha obʼektlarini barpo etish va aholi turmush madaniyatini yuksaltirish maqsadida qilinayotgan barcha ezgu ishlar xalqimizning kelajakka va davlatga ishonchini yanada mustahkamlamoqda.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
