Xotin-qizlar faolligi – jamiyat taraqqiyotining kaliti

Bugungi kunda mamlakatimizda xotin-qizlarni har tomonlama qoʻllab-quvvatlash, ularning bandligini taʼminlash, ijtimoiy faolligini oshirish va tadbirkorligini rivojlantirish borasida keng koʻlamli ishlar amalga oshirilmoqda. Ushbu ezgu tashabbuslarning amaliy ifodasini Amudaryo tumani Oq oltin ovuli misolida ham koʻrish mumkin.

Bu yerda davlatimiz taraqqiyoti yoʻlidagi islohotlar ijrosini taʼminlash yoʻlida “Mahalla yettiligi” mehnati va tashabbusi tufayli qator ijobiy natijalarga erishilmoqda. Jumladan, ovul fuqarolar yigʻini xotin-qizlar faoli Mohira Yakubovaning fidoyiligi, masʼuliyati va cheksiz shijoati tufayli bugun koʻplab oila va ayollarning turmush tarzida ijobiy oʻzgarishlar sezilmoqda.

Mohira Yakubova oʻz kasbiga mehr qoʻygan, tashabbuskor, masʼuliyatli va fidoyi xodim. Uning faoliyati nafaqat mahalladoshlariga, balki boshqa hududdagi hamkasblariga ham ibrat boʻlib xizmat qilmoqda. U nafaqat mahalla hayotida faol, balki tuman va respublika miqyosida oʻtkazib kelinayotgan turli koʻrik-tanlovlarning ham faol ishtirokchisi boʻlib kelmoqda.

Yaqinda oʻtkazilgan “Eng namunali xotin-qizlar faoli” respublika koʻrik-tanlovining tuman bosqichida “Oq oltin” OFY xotin-qizlar faoli Mohira Yakubova faxrli birinchi oʻrinni egallab, respublika bosqichiga yoʻllanmani qoʻlga kiritdi. Bu nafaqat xotin-qizlar faoli uchun, balki butun “Mahalla yettiligi” uchun katta sharaf boʻldi.

Oq oltin ovulida bugungi kunda, 1327 xonadonda 7568 nafar aholi istiqomat qiladi. Shundan 3778 nafarini xotin-qizlar tashkil etadi. Ana shu katta ijtimoiy qatlam hayotini yaxshilash, ularning muammolarini hal etish hamda bandligini taʼminlashda soʻnggi yillarda katta siljishlar kuzatilmoqda.

Xususan, “Ayollar daftari”ning 6-bosqichiga “Mahalla yettiligi” qarori bilan 174 nafar xotin-qiz kiritilgan boʻlsa, ularning qariyb yarmi — 96 nafariga amaliy yordam koʻrsatilgan. Mahallada 136 nafar ishsiz xotin-qiz aniqlanib, shundan 96 nafari kasbiy layoqatidan kelib chiqib, tadbirkorlik, hunarmandchilik va kasanachilikka jalb qilingan. Tashqi migratsiyadan qaytgan 14 nafar ayoldan 6 nafari parrandachilik va chorvachilik kabi sohalarga yoʻnaltirilib, ularning bandligi taʼminlangan.

Shuningdek, 2 ta holatda oilaviy nizolar aniqlanib, shundan bittasi mahalla faollari va hamkor tashkilotlar koʻmagi bilan hal qilingan. Yordamga muhtoj 36 nafar xotin-qizlarning muammolari oʻrganilib, 12 nafarining masalasi amaliy yordam berish orqali ijobiy hal etilgan. Probatsiya nazoratida turgan 7 nafar ayol ham kasbiy layoqatidan kelib chiqib, ish bilan taʼminlangan.

Mahallada xotin-qizlarni iqtisodiy faoliyatga keng jalb qilish maqsadida hunarmandchilik, tikuvchilik, chorvachilik va parrandachilik yoʻnalishlarida loyihalar yoʻlga qoʻyilgan. Ayniqsa, migratsiyadan qaytgan ayollarni ijtimoiy hayotga qaytarish boʻyicha amalga oshirilgan ishlar diqqatga sazovor.

Masalan, joriy yil boshida xorijdan qaytgan 3 nafar xotin-qizga parrandachilik faoliyatini boshlash uchun maqsadli kreditlar olishda amaliy yordam koʻrsatilgan. Bu orqali ular nafaqat mustaqil daromad topish imkoniga ega boʻldilar, balki oʻz oilalarining iqtisodiy barqarorligiga ham hissa qoʻshmoqdalar.

Oq oltin ovulida nafaqat xotin-qizlarning bandligini taʼminlash, balki qadimiy hunarlarni asrab-avaylash va kelajak avlodlarga yetkazish borasida ham katta ishlar qilinmoqda.

Gilamdoʻzlik – ota-bobolarimizdan avloddan-avlodga yetib kelayotgan eng qadimiy hunarlardan biridir. Bu borada ovul faxri, mohir hunarmand Toʻlgʻonoy opa Xudaybergenovaning mehnati alohida eʼtiborga loyiq. U gilam toʻqish sirlarini ota-bobolaridan oʻrgangan boʻlib, maktab davridan boshlab bu sanʼatga mehr qoʻygan. Maktabni tamomlagach, otasi va akasi Toʻlgʻonoy opaga katta gilam toʻqish dastgohini yasab berishgan. U esa bu uskunani hozirgi kungacha avaylab saqlab, uyidagi barcha gilamlarni oʻz qoʻli bilan toʻqigan. Eng quvonarlisi, Toʻlgʻonoy opa nafaqat oʻzi hunarmandlik qilmoqda, balki bugungi kunga qadar koʻplab shogirdlar ham tarbiyalab yetishtirdi. Kelinlari va nevaralari ham Toʻlgʻonoy opaning yonida, katta qiziqish bilan gilamdoʻzlik sirlarini oʻrganmoqda. Bu esa qadimiy hunarning yoʻqolib ketmasligi, balki yangi avlodlar qoʻlida yanada rivojlanishini taʼminlamoqda.

Oq oltin ovulida olib borilayotgan ishlar, xususan, Mohira Yakubova kabi fidoyi faollarning tashabbuslari nafaqat bir mahalla, balki butun tuman miqyosida xotin-qizlar hayotida ijobiy oʻzgarishlar yasamoqda.

Bugun jamiyatimizda ayollarning oʻrni tobora ortib borayotgani, ularning nafaqat oilada, balki ijtimoiy-siyosiy, iqtisodiy hayotda ham faol ishtirok etayotganini Oq oltin ovuli misolida ham yaqqol koʻrish mumkin.

Charos Arslonova, tuman hokimligining Axborot xizmati rahbari.