Oila — jamiyatning mustahkam tayanchi, inson kamolotining bebaho maskani

15-may — Xalqaro oila kuni munosabati bilan Amudaryo tumanida tantanali bayram tadbiri boʻlib oʻtdi. Ushbu qutlugʻ sana nafaqat oilaning jamiyat hayotidagi oʻrnini mustahkamlash, balki mehr-oqibat, sadoqat va milliy qadriyatlarimiz ulugʻlangan ayyomga aylandi.

Tadbirda tuman nuroniylari, uzoq yillar davomida ahil va namunali hayot kechirib kelayotgan ibratli oilalar, mahalla faollari, xotin-qizlar, yoshlar hamda keng jamoatchilik vakillari ishtirok etdi. Bayram davomida oilaviy qadriyatlarni asrash, farzand tarbiyasida ota-ona masʼuliyati, mahallalarda sogʻlom maʼnaviy muhitni shakllantirish kabi masalalar xususida samimiy suhbatlar boʻlib oʻtdi.

Tadbirni Amudaryo tumani hokimining birinchi oʻrinbosari Fahriddin Yusupov ochib berdi. U oʻz nutqida oila inson hayotidagi eng muqaddas maskan, jamiyatning eng mustahkam boʻgʻini ekanini alohida taʼkidladi. Zero, insonning maʼnaviy qiyofasi, hayotga boʻlgan munosabati, vatanparvarlik tuygʻusi avvalo oilada shakllanadi. Mehr-muhabbat, hurmat, oqibat va tarbiya hukm surgan xonadonda ulgʻaygan farzand esa kelajakda jamiyatning munosib vakili boʻlib voyaga yetadi.

Taʼkidlanganidek, oila — bu ijtimoiy barqarorlikning eng muhim kafolatidir. Mustahkam oilalarda ulgʻaygan farzandlar hayotda oʻz yoʻlini topgan, maqsadli, bilimli, vatanparvar va maʼnaviy barkamol insonlar boʻlib voyaga yetadi. Bunday yoshlar esa jamiyatning ilmiy, iqtisodiy va maʼnaviy taraqqiyotiga munosib hissa qoʻshadi. Chunki har qanday buyuk jamiyatning ildizi avvalo sogʻlom va ahil oilalarga borib taqaladi.

Bayram tadbiri Oʻzbekiston Respublikasi Vazirlar Mahkamasining 2023-yil 2-sentyabrdagi 437-sonli qaroriga muvofiq taʼsis etilgan “Ibratli oila” koʻkrak nishonini topshirish marosimi bilan davom etdi. Amudaryo tumanidan munosib deb topilgan 9 ta namunali oilaga mukofotlar tantanali ravishda topshirildi.

Mazkur oilalar uzoq yillik ahil turmushi, farzand tarbiyasidagi ibratli faoliyati, mahalladagi faolligi, qoʻni-qoʻshnichilik munosabatlaridagi samimiyligi hamda yosh oilalarga namuna boʻlib kelayotgani bilan alohida eʼtirof etildi. Ularga koʻkrak nishonlari bilan birga esdalik sovgʻalari topshirilib, jamiyat ravnaqiga qoʻshayotgan hissasi uchun minnatdorlik bildirildi.

Bugungi kunda mamlakatimizda oilani qoʻllab-quvvatlash, xotin-qizlar va yoshlarning huquq hamda manfaatlarini himoya qilish, sogʻlom va mustahkam oilalarni shakllantirish davlat siyosatining ustuvor yoʻnalishlaridan biriga aylangan. Ayniqsa, yosh oilalarni qoʻllab-quvvatlash, farzand tarbiyasida ota-onalarning masʼuliyatini oshirish, oilalarda maʼnaviy muhitni mustahkamlash borasida keng koʻlamli ishlar amalga oshirilmoqda.

Oila institutini yanada mustahkamlashga qaratilgan qonunlar, ijtimoiy dasturlar, madaniy-maʼrifiy tadbirlar, targʻibot va uchrashuvlar jamiyat taraqqiyoti, yurt tinchligi hamda xalq farovonligini taʼminlashga xizmat qilmoqda. Chunki mustahkam oila — tinch va farovon jamiyatning tayanchidir. Oiladagi ahillik va totuvlik mahalla osoyishtaligini, mahalla osoyishtaligi esa yurt taraqqiyotini taʼminlaydi.

Darhaqiqat, oilani mustahkam qiladigan eng katta kuch — bu oʻzaro hurmat, ishonch va mehrdir. Mehrga asoslangan xonadonda tarbiya topgan farzandning qalbida Vatanga muhabbat, kattalarga hurmat, kichiklarga izzat tuygʻusi kamol topadi. Shu bois ham “Oila tinch — yurt tinch” degan hikmat bugun ham oʻz ahamiyatini yoʻqotmagan.

Tadbir davomida yangragan kuy-qoʻshiqlar, ijro etilgan dilbar raqslar va madaniy chiqishlar bayramga yanada fayz va koʻtarinki ruh bagʻishladi. Ayniqsa, oilaviy qadriyatlarni madh etuvchi sahna koʻrinishlari yigʻilganlarda iliq taassurot qoldirdi.

Xalqaro oila kuni munosabati bilan tashkil etilgan ushbu tadbir barchaga bir haqiqatni yana bir bor eslatdi: oila — insonning eng katta boyligi, hayotining suyanchi va kelajak poydevoridir. Jamiyat taraqqiyoti, yurt tinchligi va millat ravnaqi ham avvalo sogʻlom, maʼnaviy barkamol va ahil oilalardan boshlanadi. Shunday ekan, oiladagi mehr-oqibatni asrash, farzandlarni milliy va umuminsoniy qadriyatlar ruhida tarbiyalash har birimizning sharafli va muqaddas burchimizdir.

Charos Arslonova, tuman hokimligining Axborot xizmati rahbari.