Tibbiyot sohasida korruptsiyaga qarshi kurashish maqsadida tadbirlar oʻtkazildi

Korruptsiya – bu jamiyatning barcha sohalariga salbiy taʼsir koʻrsatuvchi xavfli illatdir. U ijtimoiy adolatsizlikni kuchaytiradi, fuqarolarning davlat organlariga boʻlgan ishonchini susaytiradi, iqtisodiy oʻsishni sekinlashtiradi va investitsiya muhitini yomonlashtiradi. Korruptsiya tufayli byudjet mablagʻlari notoʻgʻri taqsimlanadi, davlat xizmatlari sifati pasayadi va fuqarolarning huquqlari poymol boʻladi. Bu esa pirovardida jamiyatda norozilik kayfiyatini oshirib, barqarorlikka tahdid soladi.

Shu sababli Oʻzbekistonda soʻnggi yillarda korruptsiyaga qarshi kurashish davlat siyosatining ustuvor yoʻnalishlaridan biriga aylandi. Bu borada qator qonun hujjatlari qabul qilindi, maxsus organlar tashkil etildi va jamoatchilik nazoratini kuchaytirishga qaratilgan chora-tadbirlar amalga oshirilmoqda. Maqsad – korruptsiyaga qarshi murosasiz kurashish tizimini yaratish, uning ildizlarini qirqish va jamiyatda korruptsiyaga nisbatan toqatsiz muhitni shakllantirishdir.

Amudaryo tumanida ham bu boradagi ishlar izchil davom ettirilmoqda. Yaqinda tuman Prokuraturasi tomonidan tuman Tibbiyot birlashmasi va unga hududlardagi tibbiy muassasalar masʼul xodimlari ishtirokida shu masalada yigʻilish oʻtkazildi.

Korruptsiyaning zararli oqibatlari va unga jazo muqarrarligi haqida atroflicha maʼlumotlar berilgan ushbu yigʻilishda Amudaryo tumani prokurori Bahrom Masharipov, Prokuratura masʼul xodimlari, Bosh prokuratura huzuridagi iqtisodiy jinoyatlarga qarshi kurashish departamentining tuman boʻlimi mutasaddilari ishtirok etdi.

Aytish joizki, tibbiyot sohasi aholi salomatligi bilan bevosita bogʻliq boʻlgani uchun bu yerda korruptsiyaning har qanday koʻrinishiga qarshi kurashish alohida ahamiyatga ega. Bu borada tibbiyot muassasalarida shaffoflikni oshirish, xizmat koʻrsatish sifatini yaxshilash, elektron tizimlarni joriy etish va xodimlarning huquqiy ongini oshirishga qaratilgan keng koʻlamli ishlar olib borilmoqda. Maqsad – bemorlarning sifatli va adolatli tibbiy xizmatlardan foydalanishini taʼminlashdir.

Shifokorlik – bu nafaqat kasb, balki yuksak masʼuliyat va insoniylikni talab etuvchi sharafli burchdir. Shifokor qasamiga xilof tarzda korruptsion harakatlarga qoʻl ursa, nafaqat oʻz obroʻsini toʻkadi, balki bemorning hayotini xavf ostiga qoʻyadi va butun tibbiyot tizimiga boʻlgan ishonchga putur yetkazadi. Bunday harakatlar qonun oldida javobgarlikka sabab boʻlishi bilan birga, insoniy va axloqiy jihatdan ham kechirilmasdir ishdir.

Tibbiyot tizimida korruptsiyaga qarshi kurashish borasidagi ishlarga jamoat tashkilotlari va ommaviy axborot vositalari ham munosib hissa qoʻshmoqda. Amudaryo televideniyesi tahririyatining Oʻzbekiston Respublikasi Oliy Majlisi huzuridagi fuqarolik jamiyati institutlarini qoʻllab-quvvatlash jamoat fondi moliyalashtirgan “Korruptsiya — davlat va jamiyat taraqqiyotiga tahdid” nomli grant loyihasi doirasida ham tuman Tibbiyot birlashmasi va joylardagi tibbiy muassasalarda targʻibot tadbirlari oʻtkazilmoqda.

Targʻibot tadbirlarida korruptsiyaning oqibatlari haqida tushunchalar berilmoqda. Shifoxonaga tashrif buyurgan bemorlar va ularning yaqinlariga tarqatma materiallar tarqatilib, shifokorlarga milliy qonunchilikda korruptsionerlarga belgilangan jazolar haqida maʼlumotlar taqdim qilinmoqda.

Chindan ham, korruptsiyaga qarshi kurashish faqat davlat organlarining vazifasi emas, balki butun jamiyatning umumiy ishidir. Nodavlat notijorat tashkilotlari, ommaviy axborot vositalari va keng jamoatchilik bu jarayonda yanada faol boʻlsa, bundan davlat ham, jamiyat ham yutadi. Ular jamoatchilik nazoratini kuchaytirish, aholining huquqiy ongini oshirish, korruptsiya holatlarini fosh etish va bu borada davlat organlari bilan hamkorlik qilish orqali korruptsiyaga qarshi kurash samaradorligini oshirishga xizmat qiladi. Zero, bu illatga qarshi kurashishda ochiqlik va shaffoflik eng asosiy qurolidir.

Amudaryo tumanida oʻtkazilayotgan bu kabi tadbirlar korruptsiyaga qarshi kurashishda kompleks yondashuvning amaliy namunasidir. Prokuratura, mahalliy hokimiyat, tibbiyot muassasalari va ommaviy axborot vositalarining hamkorligi korruptsiyaga qarshi samarali kurashish uchun zamin yaratadi. Bunday tadbirlar aholining huquqiy savodxonligini oshirish, jamiyatda korruptsiyaga nisbatan toqatsiz muhitni shakllantirish va adolat tamoyillarini mustahkamlashga xizmat qiladi.